എല്ലാം ഓരോരോ നിമിത്തങ്ങളാണ്. അല്ലെങ്കില്‍ ഷേക്ക്മാരെ പറ്റിച്ച ആ പര്‍ദ വേഷം പിടിക്കപ്പെടുമ്പോഴും ധരിക്കുമോ. മാത്രമല്ല പര്‍ദയില്‍ മുഖം മറച്ചാണ് സ്വപ്ന കേരളം കടന്നതും തിരിച്ച് കേരളത്തിലെത്തിയതും. അതേസമയം ഈ പര്‍ദാ വേഷമാണ് പല മലയാളി ഉന്നതരേയും വെട്ടിലാക്കിയത്. അറബിയോടൊപ്പം ചേര്‍ന്ന് പര്‍ദയും ഇട്ട് നിന്ന സ്വപ്ന ശരിക്കും ഷേക്കിന്റെ അടുത്ത ആളായ രാജകുമാരിയെന്നാണ് പലരും കരുതിയത്. മാത്രമല്ല ഷേക്ക്മാര്‍ക്ക് കേരള നേതാക്കളെ പരിചയപ്പെടുത്തിയതും പര്‍ദയണിഞ്ഞ സ്വപ്നയാണ്. മലയാളികള്‍ കാണാതിരിക്കാന്‍ ചാനലുകള്‍ മുഖം ഒപ്പിയെടുക്കാതിരിക്കാനും ഇന്നലെ സ്വപ്ന ഉപയോഗിച്ചതും ഈ പര്‍ദയാണ്. പര്‍ദയണിഞ്ഞ സ്വപ്നയെ കണ്ടപ്പോള്‍ പലര്‍ക്കും പഴയ കാര്യങ്ങളാണ് ഓര്‍മ്മ വന്നത്. അതേസമയം പവിത്രമായ പര്‍ദയെ കുറ്റം മറയ്ക്കാനുള്ള മൂടുപടമായി ഉപയോഗിക്കുന്നതിനെതിരെ അറബ് ലോകം ഉള്‍പ്പെടെയുള്ളവര്‍ കടുത്ത അമര്‍ഷത്തിലുമാണ്.

സ്വപ്ന സുരേഷും സന്ദീപ് നായരും എന്തുകൊണ്ടാണു ബെംഗളൂരുവിലേക്കു കടന്നതെന്ന ചോദ്യത്തിന്മേല്‍ എന്‍ഐഎ പിടിമുറുക്കുമ്പോള്‍ സിനിമാക്കാരുടെയും നെഞ്ചിടിക്കുകയാണ്. രാഷ്ട്രീയം, സിനിമ, രാജ്യാന്തര കണ്‍സല്‍റ്റന്‍സികള്‍, വിനോദസഞ്ചാരം തുടങ്ങി ഒട്ടേറെ മേഖലകളിലേക്ക് അന്വേഷണം നീങ്ങുമെന്നതിന്റെ സൂചനകളാണു പുറത്തുവരുന്നത്.

സ്വപ്ന കുടുംബസമേതം ബെംഗളൂരുവിലെത്തിയത് അവിടെയുള്ള സംരക്ഷകര്‍ ഒരുക്കിയ സുരക്ഷാവലയത്തിലേക്കായിരുന്നു. എന്നാല്‍, കേസ് എന്‍ഐഎ ഏറ്റെടുത്തതോടെ കാര്യങ്ങള്‍ മാറിമറിഞ്ഞു. ബെംഗളൂരുവില്‍ നിന്നു കടക്കാന്‍ കഴിയും മുന്‍പു പിടിയിലായി. യുഎഇ കോണ്‍സുലേറ്റിലെ ജോലിക്കുശേഷം സ്വപ്ന സ്‌പേസ് പാര്‍ക്കില്‍ നിയമിക്കപ്പെട്ടതിനു പിന്നില്‍ സ്വാധീനം ചെലുത്തിയ ഏജന്‍സിയുടെ പ്രവര്‍ത്തനവും അന്വേഷണത്തിനു വിധേയമാകും. ആ ഏജന്‍സിയുടെ ദക്ഷിണേന്ത്യന്‍ ആസ്ഥാനമാണു ബെംഗളൂരു.

തെലങ്കാനയും കേരളവുമടക്കം ദക്ഷിണേന്ത്യയിലെ പല സംസ്ഥാനങ്ങളിലും സര്‍ക്കാര്‍ പദ്ധതികളുടെ കണ്‍സല്‍റ്റന്‍സി കരാര്‍ നേടുന്ന സ്ഥാപനമാണിത്. കോടികളുടെ പദ്ധതികളാണ് മലയാളികള്‍ ഉന്നത ഉദ്യോഗസ്ഥരായുള്ള സ്ഥാപനത്തിനു സര്‍ക്കാരുകള്‍ നല്‍കിയിരുന്നത്. യുഎഇ കോണ്‍സുലേറ്റ് വിട്ട ശേഷം ഇത്തരം സ്ഥാപനങ്ങള്‍ക്കു സര്‍ക്കാര്‍ കരാറുകള്‍ ലഭിക്കുന്നതിനുള്ള കണ്ണിയായി സ്വപ്ന പ്രവര്‍ത്തിച്ചെന്നാണു സൂചന.

ബെംഗളൂരുവിലെത്തിയാല്‍ ഈ മേഖലയിലുള്ളവര്‍ സംരക്ഷിക്കുമെന്ന പ്രതീക്ഷ സ്വപ്നയ്ക്കുണ്ടായിരുന്നെന്ന് അന്വേഷകര്‍ കരുതുന്നു. രക്ഷിക്കാമെന്ന ഉറപ്പ് ഇവര്‍ നല്‍കിയിരുന്നോ എന്നതും അന്വേഷിക്കുന്നുണ്ട്. ഈ ഏജന്‍സികളുടെ ഓഫിസുകളും സ്വപ്ന പിടിയിലായ ഹോട്ടലും ഒരേ മേഖലയിലാണെന്നതും ഇത്തരത്തിലുള്ള സംശയങ്ങള്‍ക്കു ബലം നല്‍കുന്നതാണ്. സ്വര്‍ണക്കടത്തുമായുള്ള ബന്ധത്തിന്റെ കാര്യത്തിലും ബെംഗളൂരുവിനു പ്രത്യേക സ്ഥാനമുണ്ട്. പതിറ്റാണ്ടുകളായി സ്വര്‍ണക്കടത്തു ലോബികളുടെ പ്രവര്‍ത്തനകേന്ദ്രമാണു ബെംഗളൂരു.

കേരളത്തിലേക്കുള്ള സ്വര്‍ണവും സ്വര്‍ണം വാങ്ങിയതോ വിറ്റതോ ആയ പണവും ബെംഗളൂരുവിലോ അവിടെനിന്നു കേരളത്തിലേക്കുള്ള വഴികളിലോ പിടികൂടിയ സംഭവങ്ങള്‍ ഒട്ടേറെ. ഇതു സംബന്ധിച്ച കേസുകള്‍ ഇരു സംസ്ഥാനങ്ങളിലും ഏറെയുണ്ട്. ഇത്തരം ലോബികളുമായി സ്വപ്നയ്ക്കും സന്ദീപിനുമുള്ള ബന്ധവും അന്വേഷണ വിധേയമാകും.

ശനിയാഴ്ച രാത്രി 7 മണിയോടെയാണ് സ്വപ്നയെയും സന്ദീപിനെയും കസ്റ്റഡിയിലെടുത്തത്. ഇവരില്‍ നിന്നു പാസ്‌പോര്‍ട്ടുകള്‍, മൊബൈല്‍ ഫോണുകള്‍, രണ്ടര ലക്ഷം രൂപ തുടങ്ങിയവ പിടിച്ചെടുത്തു. ഇരുവരും ഗോവയിലേക്കു കടക്കാന്‍ പദ്ധതിയിട്ടിരുന്നതായും സൂചന. ഡൊംലൂര്‍ വിശ്വേശ്വരായ കേന്ദ്രീയ ഭവനിലുള്ള എന്‍ഐഎ ഓഫിസിലെത്തിച്ചു ചോദ്യം ചെയ്ത ശേഷം അറസ്റ്റ് രേഖപ്പെടുത്തി. തുടര്‍ന്നാണ് ചരിത്രത്തിന്റെ ഭാഗമായുള്ള പര്‍ദയും ധരിച്ചുള്ള കേരള യാത്ര.