കോണ്‍ഗ്രസ് തകര്‍ച്ചയിലേക്ക് കൂപ്പുകുത്തുകയാണ് . ജനകീയ അടിത്തറയുളള യുവ നേതാക്കള്‍ എല്ലാവരും തന്നെ ഇപ്പോള്‍ ആ പാര്‍ട്ടിയെ കൈവിടുകയാണ് . എന്നിട്ടും യാതൊരു കുലുക്കവുമില്ലാതെ നിലകൊള്ളുകയാണ് പാര്‍ട്ടി നേതൃത്വം.അതുതന്നെയാണ് കോണ്‍ഗ്രസിന് ഇതെന്താ പറ്റിയത് എന്ന ചോദ്യം എല്ലാവരും ചോദിക്കാനുള്ള കാരണവും . മദ്ധ്യപ്രദേശില്‍ പടുകുഴിയിലായ കോണ്‍ഗ്രസിന് ജീവശ്വാസം നല്‍കി ഉയര്‍ത്തെഴുന്നേല്‍പ്പിച്ച നേതാവായിരുന്നു ജ്യോതിരാദിത്യ സിന്ധ്യ. ആ ജ്യോതിരാദിത്യ സിന്ധ്യയാണ് ആദ്യം പാര്‍ട്ടിയോട് സലാം പറഞ്ഞ് പറഞ്ഞ് ബി ജെ പി പാളയത്തിലെത്തിയത്. അതിന്റെ ചുവടുപിടിച്ച് സച്ചിന്‍ പൈലറ്റും കോണ്‍ഗ്രസിനെ കൈ വിട്ടു.പക്ഷെ പൈലറ്റ് എവിടെ ചേക്കേറും എന്നുമാത്രം ഇതുവരെ വ്യക്തമാക്കിയിട്ടില്ല.
കഴിഞ്ഞ നിയമസഭാ തിരഞ്ഞെടുപ്പില്‍ രാജസ്ഥാന്‍ കൈപ്പിടിയിലൊതുക്കാന്‍ കോണ്‍ഗ്രസിനെ സഹായിച്ചത് സച്ചിന്‍ പൈലറ്റാണെന്നത് യാതൊരു തര്‍ക്കത്തിനും അടിസ്ഥാനമില്ലാതെ തന്നെ പറയാന്‍ സാധിക്കും . വളരെപ്പെട്ടെന്ന് സംസ്ഥാനത്തെ യുവനേതാവായി വളരാന്‍ സച്ചിനെ സഹായിച്ചത് കോണ്‍ഗ്രസിന്റെ പഴയ പടക്കുതിര രാജേഷ് പൈലറ്റിന്റെ മകനാണെന്ന ബോണസ് മാര്‍ക്ക് മാത്രമായിരുന്നില്ല. പ്രവര്‍ത്തനമികവും ബുദ്ധിയും തന്നെയായിരുന്നു. സച്ചിനിലെ നേതാവിനെ തിരിച്ചറിഞ്ഞത് രാഹുല്‍ ഗാന്ധിയായിരുന്നു. ജനങ്ങള്‍ ഈ യുവ നേതാവില്‍ അര്‍പ്പിച്ച വിശ്വാസം വോട്ടായി വീഴുകയും ചെയ്തു. തങ്ങളുടെ ഭാവി മുഖ്യമന്ത്രിയെയാണ് ജനങ്ങള്‍ സച്ചിനില്‍ കണ്ടത്.

രാഹുല്‍ ഗാന്ധിക്കും സച്ചിനില്‍ ഒരുപാട് പ്രതീക്ഷയുണ്ടായിരുന്നു. അതുകൊണ്ടാണ് അശോക് ഗെലാേട്ടിനെപ്പോലുളള തലമുതിര്‍ന്ന നേതാക്കള്‍ ഉണ്ടായിരുന്നിട്ടും സച്ചിനെ പാര്‍ട്ടിയുടെ ചുമതല ഏല്‍പ്പിച്ചത്. ഈ വിശ്വാസം ശരിയാണെന്ന് സച്ചിന്‍ തെളിയിക്കുകയും ചെയ്തു. വൃദ്ധനേതാക്കളല്ലാതെ പാര്‍ട്ടിയില്‍ രണ്ടാംനിര നേതാക്കള്‍ ഇല്ലെന്ന തിരിച്ചറിവാണ് സച്ചിനെയും ജ്യോതിരാദിത്യ സിന്ധ്യയെയുമൊക്കെ വളര്‍ത്തിക്കൊണ്ടുവരാന്‍ രാഹുലിനെ പ്രേരിപ്പിച്ചത്. ഇരുവരെയും മുഖ്യമന്ത്രിമാരാക്കി രാജസ്ഥാനും മദ്ധ്യപ്രദേശും കോണ്‍ഗ്രസിന്റെ ശക്തിദുര്‍ഗങ്ങളാക്കി വളര്‍ത്താമെന്നും രാഹുല്‍ കണക്കുകൂട്ടി.പക്ഷേ, മുതിര്‍ന്ന നേതാക്കളുടെ അധികാര ലഹരി യുവ നേതാക്കളുടെ സ്ഥാനങ്ങള്‍ തട്ടിത്തെറിപ്പിച്ചു. അങ്ങനെ തുടങ്ങിയ മുറുമുറുപ്പാണ് പൊട്ടിത്തെറിയിലേക്ക് എത്തിയത്. ലോക്സഭാ തിരഞ്ഞെടുപ്പില്‍ യു പി എയുടെ താേല്‍വിയുടെ ഉത്തരവാദിത്വമേറ്റെടുത്ത് രാഹുല്‍ ഗാന്ധി കോണ്‍ഗ്രസ് അദ്ധ്യക്ഷ സ്ഥാനം രാജിവച്ചതോടെയാണ് യുവ നേതാക്കള്‍ക്ക് ശനിദശ തുടങ്ങിയത്.

ആരുപോകുന്നെങ്കിലും പോകട്ടെ തങ്ങള്‍ക്ക് അധികാരം മതിയെന്ന നിലപാടാണ് കോണ്‍ഗ്രസിലെ വൃദ്ധനേതാക്കളില്‍ പലര്‍ക്കുമെന്നും ഈ പോക്ക് പാര്‍ട്ടിയെ കുഴിച്ചുമൂടുമെന്ന് പലരും മുന്നറിയിപ്പ് നല്‍കിയിട്ടും ആരും മൈന്‍ഡുചെയ്യുന്നില്ല. കപില്‍സിബലിനെപ്പോലുളള ചുരുക്കം നേതാക്കള്‍ക്കുമാത്രമാണ് പാര്‍ട്ടിയുടെ ഈ പോക്കില്‍ വിഷമമുളളത്. പടക്കുതിരകളെല്ലാം ഓടിപ്പോയ ശേഷമാണ് നമ്മുടെ പാര്‍ട്ടി ഉണരുന്നത് എന്നര്‍ത്ഥത്തിലുളള അദ്ദേഹത്തിന്റെ ട്വീറ്റുതന്നെ ഉദാഹരണം.

രാഹുല്‍ ഗാന്ധി പഴയതുപോലെ ആക്ടീവല്ലാത്തത്തും പ്രായാധിക്യവും മറ്റുപ്രശ്‌നങ്ങളുംമൂലം സോണിയാ ഗാന്ധിക്ക് പാര്‍ട്ടിയില്‍ പഴയതുപാേലെ ആക്ടീവാകാന്‍ കഴിയാത്തതും ഇപ്പോഴത്തെ അവസ്ഥയ്ക്ക് കാരണമെന്നാണ് രാഷ്ട്രീയ നിരീക്ഷകരുടെ വിലയിരുത്തല്‍. പാര്‍ട്ടിയെ ക്‌ളച്ചുപിടിപ്പിക്കാന്‍ രാഹുല്‍ഗാന്ധി മുന്നോട്ടുവയ്ക്കുന്ന ആയങ്ങള്‍ ഒന്നൊന്നായി പാര്‍ട്ടിയിലെ വന്ധ്യവയോധികര്‍ തളളിക്കളയുകയാണ്. ഇതിനെ എതിര്‍ത്തുതോല്‍പ്പിക്കാതെ എല്ലാത്തില്‍നിന്നുംമാറിനില്‍ക്കാനുളള രാഹുലിന്റെ തീരുമാനം പാര്‍ട്ടിയെ കൂടുതല്‍ ഇരുട്ടിലേക്ക് തളളിവിടുകയേ ഉളളൂ എന്നാണ് പലരും ചൂണ്ടിക്കാണിക്കുന്നത്. പ്രിയങ്കയുടെ ഇടപെടലും കാര്യക്ഷമമാകുന്നില്ല .പാര്‍ട്ടിക്ക് ഇപ്പോള്‍ ജനങ്ങള്‍ക്ക് മുന്നില്‍ ഉയര്‍ത്തിക്കാണിക്കാന്‍ കഴിയുന്ന നേതാക്കള്‍ മിക്ക സംസ്ഥാനങ്ങളിലും ഇല്ലെന്നാണ് യാഥാര്‍ത്ഥ്യം. വരുന്ന തിരഞ്ഞെടുപ്പുകളില്‍ ഇത് പാര്‍ട്ടിയുടെ സാദ്ധ്യതകള്‍ കൂടുതല്‍ ഇല്ലാതാക്കുകയേ ഉളളൂ