സമാന സ്വഭാവമുള്ള അഞ്ചുവകുപ്പുകള്‍ ഏകോപിപ്പിച്ച് തദ്ദേശഭരണ പൊതുസര്‍വീസ് രൂപീകരിക്കാന്‍ മന്ത്രിസഭായോഗം തീരുമാനിച്ചു. പഞ്ചായത്ത്, ഗ്രാമവികസനം, മുനിസിപ്പല്‍ കോമണ്‍ സര്‍വീസ്, തദ്ദേശം, ഗ്രാമ-നഗര ആസൂത്രണം എന്നീ വകുപ്പുകളാണ് ഏകോപിപ്പിച്ച് ഒരു ഡയറക്ടറേറ്റിനു കീഴിലാക്കുക. ഈ വകുപ്പുകളിലെ 30,000-ല്‍പ്പരം ജീവനക്കാര്‍ ഇനി ഒറ്റവകുപ്പിനു കീഴിലാകും.ധനബില്ല് പാസാക്കാനായി 27ന് നിയമസഭ വിളിച്ച് ചേര്‍ക്കാന്‍ ഗവര്‍ണറോട് ശുപര്‍ശ ചെയ്യാനും ഇന്നത്തെ മന്ത്രിസഭായോഗം തീരുമാനിച്ചിട്ടുണ്ട്.

ഇതിനിടയില്‍ സെക്രട്ടറിയേറ്റിനുള്ളില്‍ കടന്ന് യൂത്ത് കോണ്‍ഗ്രസ് പ്രതിഷേധിച്ചു. മൂന്ന് യൂത്ത് കോണ്‍ഗ്രസ് പ്രവര്‍ത്തകരാണ് നേര്‍ത്ത് ബ്ലോക്കിലേക്ക് പ്രതിഷേധവുമായി എത്തിയത്. മന്ത്രിസഭാ യോഗം നടന്ന ശേഷം മന്ത്രിമാര്‍ പുറത്തേക്ക് വരുന്ന സമയത്താണ് പ്രതിഷേധം സംഘടിപ്പിച്ചത്.