ഹൃദയശസ്ത്രക്രിയയ്ക്ക് ഒരുങ്ങുന്ന അച്ഛനെ കാണണമെന്ന് സരിത്, സന്ദീപ് നായരുടെ ബാഗില്‍ കോഡ് വാക്കുകളും ചിഹ്നങ്ങളും നിറഞ്ഞ കടലാസുകള്‍
കസ്റ്റംസ് കസ്റ്റഡിയില്‍ ചോദ്യം ചെയ്യല്‍ പൂര്‍ത്തിയാക്കിയതിനെ തുടര്‍ന്ന് സ്വര്‍ണക്കടത്ത് കേസിലെ ഒന്നാം പ്രതി പി.എസ്.സരിത്തിനെ കോടതിയില്‍ തിരികെ ഹാജരാക്കി സരിത്തിന്റെ അറസ്റ്റ് എന്‍ഐഎ രേഖപ്പെടുത്തി. ഇനി എന്‍ഐഎ കസ്റ്റഡിയില്‍ വാങ്ങി ചോദ്യം ചെയ്യും. അതിനിടെ ഹൃദയശസ്ത്രക്രിയയ്ക്ക് ഒരുങ്ങുന്ന പിതാവിനെ കാണാനുള്ള ആഗ്രഹം സരിത് കോടതിയെ അറിയിച്ചു. ജയിലില്‍ അതിനുള്ള അവസരം നല്‍കും.
ഇന്നലെ സന്ദീപ് നായരുടെ ബാഗ് തുറന്നു പരിശോധിച്ചപ്പോള്‍ ഡയറികളും കടലാസുകെട്ടുകളുമാണ് കണ്ടെത്തിയത്. ഡയറികളുടെ ഓരോ പേജിനും നമ്പറിട്ട് ഉള്ളടക്കം രേഖപ്പെടുത്തി കോടതിയില്‍ റിപ്പോര്‍ട്ട് സമര്‍പ്പിക്കുന്ന നടപടികള്‍ രാത്രി വൈകിയും തുടര്‍ന്നു.
കോഡ് വാക്കുകളും ചിഹ്നങ്ങളും നിറഞ്ഞ, ക്രമത്തിലല്ലാത്ത കടലാസുകളിലെ ഉള്ളടക്കം സന്ദീപ്നായരെ വിശദമായി ചോദ്യം ചെയ്താല്‍ മാത്രമേ കണ്ടെത്താന്‍ കഴിയൂ.സ്വര്‍ണക്കടത്തുമായി ബന്ധപ്പെട്ട നിര്‍ണായക വിവരങ്ങള്‍ ബാഗിലുണ്ടെന്ന് സന്ദീപ് മൊഴി നല്‍കിയിട്ടുണ്ട്. ഡയറികളും കടലാസുകെട്ടുകളും കാണിച്ചുള്ള ചോദ്യം ചെയ്യല്‍ പൂര്‍ത്തിയായാലേ ഇതിന്റെ ചുരുളഴിയൂ. ഇതിനിടെ, ഒളിവില്‍ പോയ കോട്ടയ്ക്കല്‍ കോഴിച്ചെന സ്വദേശി അബ്ദുവിനായുള്ള തിരച്ചില്‍ അന്വേഷണസംഘം തുടരുകയാണ്.
https://www.facebook.com/Malayalivartha
