തിരുവനന്തപുരം വിമാനത്താവളം വഴി നയതന്ത്രമാര്‍ഗം ദുരുപയോഗം ചെയ്ത് നടത്തിയ സ്വര്‍ണക്കടത്തുകളുടെ സമ്പൂര്‍ണ ചിത്രം വ്യക്തമായി. തിരുവനന്തപുരത്തുകാരന്‍ സന്ദീപ് നായരും മലപ്പുറത്തുകാരന്‍ കെ.ടി.റമീസുമാണ് മുഖ്യ ആസൂത്രകര്‍. വിദേശത്തുനിന്ന് എത്തിച്ച് സ്വര്‍ണം സുരക്ഷിതമായി കടത്തിക്കൊടുക്കുന്നത് സ്വപ്നയും സരിത്തും ചേര്‍ന്ന്. വന്‍തോതില്‍ സ്വര്‍ണം വാങ്ങാന്‍ പണം കണ്ടെത്തുന്നത് മൂവാറ്റുപുഴക്കാരന്‍ എ.എം. ജലാല്‍.

സന്ദീപും റമീസും സാഹചര്യങ്ങള്‍ അനുകൂലമെന്ന് വരുമ്പോള്‍ ജലാലിനെ ബന്ധപ്പെട്ട് നീക്കം തുടങ്ങും. ദുബായില്‍നിന്നു വന്‍തോതില്‍ സ്വര്‍ണം വാങ്ങുന്നതിനു ധനസമാഹരണം നടത്തുന്നത് ജലാലാണ്. വന്‍ലാഭം വാഗ്ദാനം ചെയ്ത് പലരില്‍ നിന്നായി പണം ശേഖരിക്കും. ഇതു പിന്നീട് സന്ദീപും റമീസും വഴി ഹവാല മാര്‍ഗത്തിലൂടെ യുഎഇയിലേക്ക് എത്തിക്കും. ഇവര്‍ നിര്‍ദേശിക്കുന്നതിന് അനുസരിച്ച് അവിടെ സ്വര്‍ണം സംഘടിപ്പിക്കുന്നത് ഫൈസല്‍ ഫരീദ് ആണ്.

ഈ സ്വര്‍ണം പിന്നീട് യുഎഇ കോണ്‍സുലേറ്റിന്റെ പേരില്‍ വ്യാജരേഖകള്‍ ഉണ്ടാക്കി ഡിപ്ലോമാറ്റിക് ബാഗേജ് ആയും കാര്‍ഗോ വഴിയും ഫരീദ് നാട്ടിലേക്ക് അയക്കും. കോണ്‍സുലേറ്റ് ഉന്നതരുമായുള്ള ബന്ധം ദുരുപയോഗിച്ച് യാതൊരു പരിശോധനയും കൂടാതെ സ്വപ്നയും സരിത്തും ഈ സ്വര്‍ണം വിമാനത്താവളത്തിനു പുറത്തു കടത്തുന്നു.

തിരുവനന്തപുരം നഗരപരിധിയില്‍വച്ചുതന്നെ ഇത് സന്ദീപ് നായര്‍ ഏറ്റുവാങ്ങി, റമീസും ചേര്‍ന്ന് മുവാറ്റുപുഴയില്‍ ജലാലിന് കൈമാറുന്നു. ആവശ്യക്കാര്‍ക്ക് സ്വര്‍ണം വിതരണം ചെയ്യുന്നതും മറിച്ചു വില്‍ക്കുന്നതുമെല്ലാം ജലാലിന്റെ മേല്‍നോട്ടത്തിലാണ്. ഇതിനായി സ്വര്‍ണവുമായി യാത്ര ചെയ്യാന്‍ ജലാല്‍ ഉപയോഗിച്ച രഹസ്യ അറയുള്ള കാര്‍ കേസിലെ പ്രധാന തെളിവാണ്. ലാഭവിഹിതം ബന്ധപ്പെട്ട എല്ലാവര്‍ക്കുമായി പങ്കുവച്ചിരുന്നതും ജലാല്‍ ആണ്. എന്നാല്‍ സ്വര്‍ണക്കടത്ത് വഴി ഏറ്റവുമധികം പണം സമ്പാദിച്ചിരുന്നത് റമീസും സന്ദീപുമായിരുന്നു എന്നാണ് കസ്റ്റംസ് അന്വേഷകര്‍ കണ്ടെത്തിയിട്ടുള്ളത്.