തമിഴ്നാട്ടിലെ കൊലപാതകത്തിനു ശേഷം എറണാകുളത്ത് ഒളിവില്‍ കഴിഞ്ഞിരുന്ന പ്രതി കൊച്ചിയില്‍ പിടിയില്‍
തമിഴ്നാട്ടില്‍ കൊല നടത്തി റിമാന്‍ഡില്‍ കഴിഞ്ഞിരുന്ന പ്രതി ജാമ്യം എടുത്ത ശേഷം മുങ്ങി എറണാകുളത്തെത്തി ഒളിവില്‍ കഴിയവേ എറണാകുളം നോര്‍ത്ത് പോലിസ് പിടികൂടി തമിഴ്നാട് പോലീസിനെ ഏല്‍പ്പിച്ചു.
തമിഴ്നാട് രാമനാഥപുരം ജില്ലയിലെ സയല്‍ഗുഡി പോലിസ് സേ്റ്റഷന്‍ പരിധിയിലെ ബിവറേജസ് ഷോപ്പിനു മുന്നിലുണ്ടായ തര്‍ക്കത്തെ തുടര്‍ന്ന് സയല്‍ഗുഡി സ്വദേശി തിരുപ്പതി (48)യെ 2014-ല്‍ കുത്തി കൊലപ്പെടുത്തിയ കേസിലെ പ്രതി സയല്‍ഗുഡി സ്വദേശി പശുമ്പന്‍ ലിംഗം (36)ത്തിനെയാണ് എറണാകുളം നോര്‍ത്ത് പോലിസ് പിടികൂടി തമിഴ്നാട് പോലീസിനെ ഏല്‍പ്പിച്ചത്. ഈ കേസില്‍ റിമാന്‍ഡില്‍ കഴിഞ്ഞിരുന്ന പ്രതി ജാമ്യം എടുത്ത ശേഷം മുങ്ങുകയായിരുന്നു.
പ്രതി ഒളിവില്‍ പോയതിനെതുടര്‍ന്ന് വിചാരണ തടസപ്പെട്ടതിനാല്‍ രാമനാഥപുരം എസ്.പിയുടെ കീഴിലുള്ള പ്രത്യേക അന്വഷണ സംഘം ഇയാളെ കുറിച്ച് അന്വഷണം നടത്തി വരികയായിരുന്നു. ഇയാളുടെ ഫോട്ടോയോ മൊബൈല്‍ നമ്പറോ കയ്യില്‍ ഇല്ലാതിരുന്നതിനാല്‍ ഇയാളെ കണ്ടെത്തുക ബുദ്ധിമുട്ടായിരുന്നു.
എറണാകുളത്തു എത്തിയ ഇയാള്‍ കലൂരിലും കടവന്ത്രയിലും വൈറ്റിലയിലുമായി പണിയെടുക്കുകയും കടത്തിണ്ണകളില്‍ കഴിഞ്ഞു വരികയുമായിരുന്നു. ഒടുവില്‍ പോലിസ് വാട്സ്ആപ്പ് ഗ്രൂപ്പ് വഴി വിവരം അറിഞ്ഞ നോര്‍ത്ത് പോലിസ് കലൂരിലും പരിസരങ്ങളിലും ഇയാളെ കുറിച്ച് നടത്തിയ അന്വഷണത്തിനൊടുവില്‍ പൊറ്റക്കുഴി ഭാഗത്തു നിന്നാണ് ഇയാളെ പിടികൂടിയത്.
അസി. കമ്മിഷണര്‍ കെ.ലാല്‍ജിയുടെ നിര്‍ദ്ദേശപ്രകാരം എറണാകുളം നോര്‍ത്ത് എസ്.എച്ച്.ഒ സിബി ടോം, എസ്.ഐ അനസ്, എ.എസ്.ഐ വിനോദ് കൃഷ്ണ,സി.പി.ഒ അജിലേഷ് എന്നിവര്‍ ചേര്‍ന്നാണ് ഇയാളെ അറസ്റ്റ് ചെയ്തത്. ഇയാളെ പിന്നീട് തമിഴ്നാട്ടിലേക്ക് കൊണ്ടുപോയി.
https://www.facebook.com/Malayalivartha
