സ്‌കൂള്‍ തുറക്കല്‍: സാധ്യതകളും വെല്ലുവിളികളും പഠിച്ച് റിപ്പോര്‍ട്ട് നല്‍കാന്‍ പൊതു വിദ്യാഭ്യാസ ഡയറക്ടറോട് സര്‍ക്കാര്‍
കോവിഡിന്റെ പശ്ചാത്തലത്തില്‍ സ്‌കൂള്‍ തുറക്കുന്നതുമായി ബന്ധപ്പെട്ട സാധ്യതകളും വെല്ലുവിളികളും പഠിച്ച് റിപ്പോര്‍ട്ട് നല്‍കാന്‍ പൊതുവിദ്യാഭ്യാസ ഡയറക്ടറെ സര്‍ക്കാര്‍ ചുമതലപ്പെടുത്തി. സെപ്റ്റംബറിലോ ഒക്ടോബറിലോ നവംബറിലോ സ്‌കൂള്‍ തുറക്കാന്‍ കഴിഞ്ഞാല്‍ അധ്യയനവര്‍ഷം എങ്ങനെ ആസൂത്രണം ചെയ്യാം എന്നതായിരിക്കും റിപ്പോര്‍ട്ടിലെ പ്രധാന ഉള്ളടക്കം.
കഴിഞ്ഞ ദിവസം മന്ത്രി സി.രവീന്ദ്രനാഥിന്റെ അധ്യക്ഷതയില്‍ ചേര്‍ന്ന യോഗത്തിലാണു തീരുമാനം. മാര്‍ച്ചിനു പകരം മേയ് വരെ അധ്യയനവര്‍ഷം നീട്ടുന്നതും പരീക്ഷകള്‍ പുനഃക്രമീകരിക്കുന്നതും ഉള്‍പ്പെടെയുള്ള സാധ്യതകളും ഇതിന്റെ പ്രായോഗികതയും പരിശോധിക്കാനാണു നിര്‍ദേശിച്ചിരിക്കുന്നത്. സെപ്റ്റംബറില്‍ സ്‌കൂളുകള്‍ തുറക്കാന്‍ കഴിഞ്ഞേക്കുമെന്നായിരുന്നു നേരത്തേയുള്ള കണക്കുകൂട്ടല്‍. കോവിഡ് രോഗികളുടെ എണ്ണം വര്‍ധിക്കുന്ന സാഹചര്യത്തില്‍ ആ സാധ്യത കുറഞ്ഞു.
സിലബസ് ചുരുക്കുന്നതുമായി ബന്ധപ്പെട്ടു കര്‍ണാടകയില്‍ ഉള്‍പ്പെടെ വിവാദങ്ങളുയര്‍ന്ന സാഹചര്യത്തില്‍ ഇക്കാര്യം പിന്നീടു പരിശോധിക്കാമെന്നാണു വിദ്യാഭ്യാസവകുപ്പിന്റെ നിലപാട്. കരിക്കുലം കമ്മിറ്റി യോഗവും അനിശ്ചിതമായി നീട്ടി. ഡിജിറ്റല്‍ അധ്യയനപരിപാടി ഫലപ്രദമായി മുന്നോട്ടുപോകുന്നുണ്ടെങ്കിലും ഇതിന്റെ അടിസ്ഥാനത്തില്‍ ഓണപ്പരീക്ഷ നടത്തേണ്ടതില്ലെന്നാണ് ഇപ്പോഴുള്ള ധാരണ. പൊതുവിദ്യാഭ്യാസ ഡയറക്ടറില്‍ നിന്നുള്ള റിപ്പോര്‍ട്ട് വിലയിരുത്തിയ ശേഷമായിരിക്കും ഇക്കാര്യത്തില്‍ അന്തിമതീരുമാനം.
യുനിസെഫ് കേരളത്തിലെ ഡിജിറ്റല്‍ അധ്യയനത്തെക്കുറിച്ച് പഠനം നടത്തുന്നു. ഡിജിറ്റല്‍ അധ്യയനം ഫലപ്രദമാക്കാനും എല്ലാ കുട്ടികള്‍ക്കും ഡിജിറ്റല്‍ ക്ലാസുകള്‍ ലഭ്യമാക്കാനും സ്വീകരിച്ച നടപടികള്‍, അധ്യാപകരുടെ പങ്കാളിത്തം, രക്ഷിതാക്കളുടെയും വിദ്യാര്‍ഥികളുടെയും പ്രതികരണം, ഭിന്നശേഷിക്കാരായ കുട്ടികള്‍ക്കുള്ള പ്രത്യേകപരിശീലനപരിപാടി എന്നിവ വിലയിരുത്തും.
https://www.facebook.com/Malayalivartha
