വയനാട് മാനന്തവാടിയില്‍ കാട്ടിക്കുളം കോണവയലില്‍ കരിമ്പനക്കല്‍ അപ്പച്ചന്‍ എന്നയാള്‍ ഇന്നലെ പുലര്‍ച്ചെ പശുവിനെ കറക്കാന്‍ തൊഴുത്തിലെത്തിയപ്പോള്‍ തൊഴുത്തില്‍ കുതിച്ചെത്തിയ കടുവയുടെ പിടിയില്‍പെടാതെ രക്ഷപ്പെട്ടത് ഭാഗ്യം കൊണ്ടുമാത്രമായിരുന്നു.

കടുവ വന്ന വരവില്‍ തന്നെ കറവയുള്ള പശുക്കളിലൊന്നിനെ കടിച്ചുകൊന്നു. അപ്രതീക്ഷിതമായി തൊട്ടുമുന്‍പില്‍ കടുവയെ കണ്ട പരിഭ്രമത്തില്‍ അപ്പച്ചന്‍ അലറിക്കരഞ്ഞ് ആല അടിക്കുന്ന ചൂലെടുത്തു കടുവയെ തല്ലി. ശബ്ദം കേട്ട് ഓടിയെത്തിയ ഭാര്യ വത്സയും ബഹളം വച്ചതോടെ കടുവ ആലയുടെ ഒരു ഭാഗം തകര്‍ത്തു പുറത്തു ചാടുകയായിരുന്നു.

ദിവസങ്ങളായി കോണവയല്‍ പ്രദേശത്തു കടുവയുടെ സാന്നിധ്യമുള്ളതായി നാട്ടുകാര്‍ പറയുന്നു. പകല്‍പോലും കടുവ പുറത്തിറങ്ങുന്നതിനാല്‍ ജനം ഭയത്തോടെയാണു കഴിയുന്നത്. തലനാരിഴയ്ക്കു ജീവന്‍ തിരിച്ചുകിട്ടിയ ആശ്വാസത്തിലാണ് അപ്പച്ചനും വത്സയും. സ്ഥലത്തു പട്രോളിങ് നടത്തുന്ന വനപാലകരും പലപ്പോഴും കടുവയെ കണ്ടിട്ടുണ്ട്.

തിരുനെല്ലി പഞ്ചായത്തിലെ വിവിധ പ്രദേശങ്ങളില്‍ വന്യമൃഗ ശല്യം രൂക്ഷമായി തുടരുകയാണ്. 2 മാസം മുന്‍പു ബാവലിയില്‍ കട്ടക്കയം ഏലിയാമ്മയുടെ പശുവിനെ കടുവ കൊന്നിരുന്നു. സംഭവ സ്ഥത്ത് എത്തിയ വനപാലകര്‍ പശുവിന്റെ വില ഉടമയ്ക്കു നല്‍കാമെന്ന് ഉറപ്പു നല്‍കി. കാട്ടിക്കുളം വെറ്ററിനറി സര്‍ജന്‍ എത്തി പോസ്റ്റ്‌മോര്‍ട്ടം നടത്തി. തിരുനെല്ലി പൊലീസുകാരും തൃശ്ശിലേരി വില്ലേജ് ഓഫിസറും സ്ഥലത്തെത്തിയിരുന്നു. കടുവകളെ കൂടുവച്ചു പിടിച്ച് ഉള്‍വനത്തില്‍ വിടാന്‍ ഇനിയും നടപടിയില്ലെങ്കില്‍ ശക്തമായ സമരം നടത്തുമെന്ന് വന്യമൃഗശല്യ പ്രതിരോധ കര്‍മസമിതി അറിയിച്ചു.