ആ സ്വപ്നവും ഫലിച്ചില്ല... നയതന്ത്ര പ്രതിനിധികളെ സ്വര്ണക്കടത്ത് കേസില് വലിച്ചിഴച്ച് കേസ് ദുര്ബലമാക്കാനുള്ള സ്വപ്നയുടേയും കൂട്ടരുടേയും മോഹത്തിന് കൂച്ചു വിലങ്ങ്; സ്വര്ണക്കടത്ത് കേസില് ഉള്പ്പെട്ട സകല പേരേയും പൊക്കാന് നിര്ണായക നിലപാട് സ്വീകരിച്ച് പ്രധാനമന്ത്രി നരേന്ദ്രമോദി; യുഎഇയുമായുള്ള ബന്ധം നിലനിര്ത്തി എന്ഐഎ സംഘം ദുബായിലേക്ക്
സ്വര്ണക്കടത്ത് കേസില് നയതന്ത്ര പരിരക്ഷയുള്ള ഉദ്യോഗസ്ഥരെ മുന്നില് നിര്ത്തി രക്ഷപ്പെടാനുള്ള ഗൂഢ ശ്രമമാണ് കേസിലെ മുഖ്യ പ്രതികളായ സ്വപ്ന സുരേഷും കൂട്ടരും സ്വീകരിച്ചത്. കോണ്സുലേറ്റിലെ അറ്റാഷെ പറഞ്ഞിട്ടാണ് സ്വര്ണക്കടത്തില് ഇടപെട്ടതെന്നാണ് സ്വപ്ന പറഞ്ഞത്. ഇതോടെ യുഎഇയുമായുള്ള നയതന്ത്ര ബന്ധം കാരണം അന്വേഷണം മരവിക്കുമെന്നാണ് സ്വപ്ന കരുതിയിരുന്നത്. എന്നാല് അന്വേഷണത്തിന് വേണ്ടി ഏതറ്റം വരെ പോകാനും കേന്ദ്ര സര്ക്കാര് അന്വേഷണ സംഘത്തിന് അനുമതി നല്കി. യുഎഇയുമായുള്ള ബന്ധത്തിന് കോട്ടം തട്ടാതെ പ്രതികളെ ദുബായില് പോയി പൊക്കാനുള്ള അനുമതി പ്രധാനമന്ത്രി നരേന്ദ്രമോദി നല്കുകയായിരുന്നു.
അനുമതി ലഭിച്ചതോടെ സര്ണക്കടത്ത് കേസ് അന്വേഷിക്കുന്ന എന്.ഐ.എ. സംഘം ഉടന് യു.എ.ഇ.യില് എത്തും. നയതന്ത്ര ബാഗേജിന്റെ മറവിലാണ് തിരുവനന്തപുരം വിമാനത്താവളം വഴി കോടിക്കണക്കിന് രൂപയുടെ സ്വര്ണം ഇന്ത്യയിലേക്ക് കടത്തിയത്. അന്വേഷണത്തിനായി യു.എ.ഇ. സന്ദര്ശിക്കുന്നതിന് പ്രധാനമന്ത്രിയുടെ നിര്ദേശ പ്രകാരം കേന്ദ്ര ആഭ്യന്തരമന്ത്രാലയം കഴിഞ്ഞ ദിവസമാണ് എന്.ഐ.എ.സംഘത്തിന് അനുമതി നല്കിയത്. രണ്ടുദിവസത്തിനകം സംഘം പുറപ്പെടുമെന്നാണ് സൂചന.
കള്ളക്കടത്തിന്റെ സൂത്രധാരന്മാരില് ചിലര് ഇപ്പോഴും ദുബായിലാണുള്ളതെന്നാണ് അറസ്റ്റിലായ പ്രതികള് എന്.ഐ.എ.ക്ക് നല്കിയ മൊഴി. കേസിലെ മൂന്നാംപ്രതിയായ ഫൈസല് ഫരീദ്, മറ്റൊരു പ്രതി റെബിന്സണ് എന്നിവരെ യു.എ.ഇ.യില്നിന്ന് വിട്ടുകിട്ടാനും ചോദ്യം ചെയ്യാനും അന്വേഷണസംഘം ശ്രമിക്കും. ഇതിനായി ദുബായ് പോലീസിന്റെ സഹായം തേടാനും സാധ്യതയുണ്ട്. ഫൈസല് ഫരീദിന്റെ പാസ്പോര്ട്ട് നേരത്തേതന്നെ കേന്ദ്രസര്ക്കാര് റദ്ദുചെയ്തിരുന്നു.
കേസില് നയതന്ത്ര പ്രതിനിധികളുടെ പേര് അറസ്റ്റിലായ സ്വപ്നയടക്കമുള്ള പ്രതികള് ചോദ്യം ചെയ്യലില് പറഞ്ഞിരുന്നു. ഇതിന്റെ നിജസ്ഥിതി അന്വേഷിക്കാനും ശ്രമമുണ്ടാകും. യു.എ.ഇ.യിലുള്ള അറ്റാഷെയെ ചോദ്യം ചെയ്യാന് അനുവദിക്കണമെന്ന് അഭ്യര്ഥിച്ച് വിദേശകാര്യമന്ത്രാലയംവഴി ഇന്ത്യ നേരത്തേ യു.എ.ഇ.ക്ക് കത്ത് നല്കിയിരുന്നു.
അതേസമയം സ്വപ്ന സുരേഷിന്റെ ബാങ്ക് ലോക്കറില് നിന്ന് കണ്ടെത്തിയ ഒരുകോടി രൂപ, സംസ്ഥാന സര്ക്കാരിന്റെ ലൈഫ്മിഷന് പദ്ധതിയിലെ കരാറിന് സ്വകാര്യ കമ്പനിക്ക് നല്കിയതിന്റെ കമ്മീഷനാണെന്നാണ് സ്വപ്നയുടെ പുതിയ നിലപാട്. ലൈഫ് മിഷന്റെ ഭാഗമായി വീടുകള് പണിതു നല്കാന് യുണിടെക് എന്ന സ്വകാര്യ നിര്മാണ കമ്പനിക്കു കരാര് നല്കിയതിന്റെ കമ്മീഷന് തുകയാണിതെന്നു തെളിയിക്കുന്ന രേഖകള് സ്വപ്ന എന്.ഐ.എ. കോടതിയില് ഹാജരാക്കി. എന്നാല് സ്വര്ണക്കടത്തിലൂടെ സമ്പാദിച്ചതല്ല ഈ പണമെന്നു വരുത്തി തീര്ക്കാനാണ് സ്വപ്ന ശ്രമിക്കുന്നതെന്നാണ് അന്വേഷണ സംഘം കരുതുന്നത്. അവിടേയും ദുബായിയേയാണ് സ്വപ്ന ലക്ഷ്യം വയ്ക്കുന്നത്.
ലൈഫ് മിഷന്റെ ഭാഗമായി വീടുകളും മെറ്റേണിറ്റി സെന്ററും നിര്മിക്കാന് യു.എ.ഇയിലെ സന്നദ്ധസംഘടനയായ എമിറേറ്റ്സ് റെഡ് ക്രസന്റ് അഥവ ഇ.ആര്.സി ഒരുകോടി ദിര്ഹം അതായത് 20 കോടി രൂപ സഹായം പ്രഖ്യാപിച്ചിരുന്നു. സംസ്ഥാന സര്ക്കാരുമായി ചേര്ന്ന് യു.എ.ഇ. കോണ്സുലേറ്റിനായിരുന്നു ഏകോപനച്ചുമതല. യു.എ.ഇയില്നിന്നുള്ള ധന സഹായമുപയോഗിച്ച് വീടുകള് നിര്മിക്കാനുള്ള കരാറാണ് യൂണിടെക്കിനു നല്കിയത്.
2018ല് പ്രളയത്തിനു ശേഷം ശിവശങ്കറും സ്വപ്നയും ഒരേ വിമാനത്തില് ദുബായിലേക്ക് തിരുവനന്തപുരത്ത് നിന്നു പോയെന്ന് അന്വേഷണസംഘം നേരത്തെ കണ്ടെത്തിയിരുന്നു. ആ സന്ദര്ശനത്തിലാണ് യു.എ.ഇ റെഡ് ക്രെസന്റ് അതോറിറ്റി 20 കോടി രൂപയുടെ സഹായം വാഗ്ദാനം ചെയ്തത്. തുടര്ന്ന് കഴിഞ്ഞ വര്ഷം ജൂലൈ 11 ന് ഇതു സംബന്ധിച്ച കരാര് ഒപ്പിട്ടു. സ്വപ്നയാണ് ഈ ചടങ്ങിന് മേല്നോട്ടം വഹിച്ചത്. ഈ പറയുന്ന കാര്യങ്ങളിലെ നിജസ്ഥിതി മനസിലാക്കാന് കൂടിയാണ് എന്ഐഎ സംഘം ദുബായിലേക്ക് പോകുന്നത്. ഏതായാലും വരും നാളുകളില് സ്വപ്നയുടെ അടവെല്ലാം മറനീക്കി പുറത്താകുന്നതാണ്.
https://www.facebook.com/Malayalivartha