സര്‍ക്കാരിനെതിരെയും മുഖ്യമന്ത്രി പിണറായി വിജയനെതിരെയും ആഞ്ഞടിച്ച് അഭിഭാഷകന്‍ ഹരീഷ് വാസുദേവന്‍ രംഗത്ത്. പാരിസ്ഥിതിക ആഘാതത്തിന് വഴിവയ്ക്കുന്ന ഇഐഎ 2020 കരടിന്റെ പശ്ചാത്തലത്തിലായിരുന്നു ഹരീഷിന്റെ വിമര്‍ശനം. ഇഐഎ 2020 കരട് പിന്‍വലിക്കാന്‍ കേരളം കേന്ദ്രസര്‍ക്കാരിനോട് ആവശ്യപ്പെടാത്തത് എന്താണെന്ന് ഹരീഷ് വാസുദേവന്‍ ചോദിക്കുന്നു. ഇഐഎ 2020 പിന്‍വലിക്കാന്‍ കാരണങ്ങള്‍ അക്കമിട്ടു സിപിഎം പോളിറ്റ്ബ്യുറോയും കേന്ദ്രകമ്മിറ്റിയും കേന്ദ്രസര്‍ക്കാരിനോട് ആവശ്യപ്പെട്ടിട്ടുണ്ട്. അഭിനന്ദനര്‍ഹമായ നിലപാട് ആണത്.

എന്നാല്‍, ഭരണഘടന അനുസരിച്ച്‌ പരിസ്ഥിതി സംസ്ഥാനങ്ങള്‍ക്കും തദ്ദേശസ്വയംഭരണ സ്ഥാപനങ്ങള്‍ക്കും അധികാരമുള്ള വിഷയമാണ്. അവരുടെ അധികാരങ്ങള്‍ ഇല്ലാതാക്കുന്ന വിഷയമാണ്. കേരളാസര്‍ക്കാര്‍ ഈ വിഷയത്തില്‍ ഇഐഎ 2020 പിന്‍വലിക്കാന്‍ ആവശ്യപ്പെട്ടോ? എന്ന് ഹരീഷ് വാസുദേവന്‍ ഫേസ്ബുക്ക് പോസ്റ്റില്‍ ചോദിക്കുന്നു.

ഫേസ്ബുക് കുറിപ്പ്;

മുഖ്യമന്ത്രിയുടെ ഇരട്ടത്താപ്പ്.

EIA 2020 പിന്‍വലിക്കാന്‍ കാരണങ്ങള്‍ അക്കമിട്ടു CPIM പോളിറ്റ്ബ്യുറോയും കേന്ദ്രകമ്മിറ്റിയും കേന്ദ്രസര്‍ക്കാരിനോട് ആവശ്യപ്പെട്ടിട്ടുണ്ട്. അഭിനന്ദനര്‍ഹമായ നിലപാട് ആണത്. പക്ഷെ, ഞാനും നിങ്ങളും ആവശ്യപ്പെടുന്ന വിലയേ അതിനു നിയമത്തിനു മുന്നില്‍ ഉള്ളൂ.

എന്നാല്‍, ഭരണഘടന അനുസരിച്ച്‌ പരിസ്ഥിതി സംസ്ഥാനങ്ങള്‍ക്കും തദ്ദേശസ്വയംഭരണ സ്ഥാപനങ്ങള്‍ക്കും അധികാരമുള്ള വിഷയമാണ്. അവരുടെ അധികാരങ്ങള്‍ ഇല്ലാതാക്കുന്ന വിഷയമാണ്. കേരളാസര്‍ക്കാര്‍ ഈ വിഷയത്തില്‍ EIA 2020 പിന്‍വലിക്കാന്‍ ആവശ്യപ്പെട്ടോ? CPIM ഭരിക്കുന്ന എത്ര തദ്ദേശഭരണ സ്ഥാപനങ്ങള്‍ ആവശ്യപ്പെട്ടു? വൃന്ദകാരാട്ടിന്റെ കത്ത് ഇതിലെത്രപേര്‍ വായിച്ചിട്ടുണ്ടാകും?

ആഗസ്റ്റ് 11 ആണ് അവസാന തീയതി. സ്വന്തം പാര്‍ട്ടിയുടെ രാഷ്ട്രീയ നയം നടപ്പാക്കാന്‍ അല്ലെങ്കില്‍ പിന്നെന്തിനാണ് സഖാവേ നിങ്ങള്‍ക്കീ ഭരണം??? പരിസ്ഥിതി വകുപ്പ് മുഖ്യമന്ത്രിയുടെ കയ്യില്‍ ആണെന്ന് മറക്കരുത്.

സഖാക്കള്‍ ഈ പോസ്റ്റ് ലൈക്ക് ചെയ്യണ്ട, സര്‍ക്കാറിനെക്കൊണ്ട് CPIM ന്റെ നിലപാട് കേന്ദ്രത്തെ അറിയിക്കാന്‍ പറ്റുമോ???