മുഖ്യമന്ത്രിയുടെ പ്രസ് സെക്രട്ടറി അടക്കമുള്ളവര്‍ മാധ്യമ പ്രവര്‍ത്തകര്‍ക്കെതിരെ നടത്തുന്ന സൈബര്‍ ആക്രമണങ്ങള്‍ താന്‍ അറിഞ്ഞിട്ടില്ലെന്നു മുഖ്യമന്ത്രി പിണറായി വിജയന്‍. ഇതു സംബന്ധിച്ച് പത്രപ്രവര്‍ത്തക സംഘടനയായ കെയുഡബ്ല്യുജെ മുഖ്യമന്ത്രിക്കും ഡിജിപിക്കും നല്‍കിയ പരാതിയെക്കുറിച്ചും അറിയില്ല.

കഴിഞ്ഞ ദിവസം പത്രസമ്മേളനത്തില്‍ സര്‍ക്കാരിനെതിരായ ഗൂഢാലോചന ആരോപിച്ചു മുഖ്യമന്ത്രി മാധ്യമങ്ങള്‍ക്കെതിരെ പൊട്ടിത്തെറിച്ചതിനെത്തുടര്‍ന്നാണു സിപിഎം അനുഭാവികളും മറ്റും മാധ്യമ പ്രവര്‍ത്തകര്‍ക്കെതിരെ സൈബര്‍ ആക്രമണം ശക്തമാക്കിയത്. ഇതു ശ്രദ്ധയില്‍പ്പെട്ടിട്ടില്ലെന്നു പറഞ്ഞ മുഖ്യമന്ത്രി ആരോഗ്യകരമായ സംവാദം നടക്കട്ടേയെന്നും അനാരോഗ്യകരമായി പോകേണ്ടതില്ലെന്നും അഭിപ്രായപ്പെട്ടു.

'അദ്ദേഹത്തിന്റെ പ്രസ് സെക്രട്ടറി മാധ്യമപ്രവര്‍ത്തകരെ വ്യക്തിപരമായി അധിക്ഷേപിക്കുന്നതും മുഖ്യമന്ത്രിയുടെ ഓഫിസ് കേന്ദ്രീകരിച്ചു സൈബര്‍ ആക്രമണ നിര്‍ദേശം പോകുന്നതും മാധ്യമ പ്രവര്‍ത്തകര്‍ ചൂണ്ടിക്കാട്ടിയപ്പോള്‍ അതിനെ പരോക്ഷമായി ന്യായീകരിക്കുകയായിരുന്നു മുഖ്യമന്ത്രി.

'എന്റെ പ്രസ് സെക്രട്ടറിയും ഒരു മാധ്യമ പ്രവര്‍ത്തകനാണ്. നിങ്ങള്‍ തമ്മില്‍ സംവാദമുണ്ടെങ്കില്‍ ആരോഗ്യകരമായി സംവദിച്ചു തീര്‍ക്കുന്നതാണു നല്ലത്. സൈബര്‍ ആക്രമണവും ആരോഗ്യകരമായ വിമര്‍ശനവും സംവാദവും അഭിപ്രായം പറയുന്നതുമെല്ലാം വ്യത്യസ്തമാണ്.

'ഞാന്‍ മാധ്യമ പ്രവര്‍ത്തകരെ ആരെയും വ്യക്തിപരമായി പറഞ്ഞിട്ടില്ല. നിങ്ങള്‍ വ്യക്തിപരമായി തെറ്റ് ചെയ്തു എന്നു പറയുന്നില്ല. ചില മാധ്യമങ്ങള്‍ നിക്ഷിപ്ത താല്‍പര്യമനുസരിച്ചു നിലപാടെടുക്കുന്നു എന്നാണു പറഞ്ഞത്. വിമര്‍ശിച്ച നിങ്ങളെ കൈകാര്യം ചെയ്യണം എന്ന സമീപനം ഞാനോ ഞങ്ങളുടെ ആളുകളോ എടുത്തിട്ടുണ്ടോ?' - മുഖ്യമന്ത്രി ചോദിച്ചു. നിങ്ങള്‍ക്ക് ആക്ഷേപമായി തോന്നുന്ന കാര്യങ്ങള്‍ ഇതില്‍ ഏതു പട്ടികയിലാണു പെടുന്നതെന്നു നോക്കട്ടെ - മുഖ്യമന്ത്രി പറഞ്ഞു.

ഇന്നലെ മുതല്‍ സമൂഹമാധ്യമങ്ങളില്‍ 2 മാധ്യമപ്രവര്‍ത്തകരെയും കുടുംബാംഗങ്ങളെയും അധിക്ഷേപിച്ച് പ്രചാരണം നടക്കുന്നുണ്ടെന്ന് എല്‍ഡിഎഫ് കണ്‍വീനര്‍ എ. വിജയരാഘവന്റെ ശ്രദ്ധയില്‍പ്പെടുത്തിപ്പോള്‍ 'മനോരമയും ഏഷ്യാനെറ്റുമല്ലേ, അവരൊക്കെ മറ്റ് പലരുടെയും കുടുംബജീവിതമെടുത്ത് പല അക്രമണവും നടത്തുന്നത് നമ്മളൊക്കെ കണ്ടിട്ടുണ്ട്. മാധ്യമങ്ങള്‍ക്ക് മാത്രം ആരെയും കുടുംബത്തെ അടക്കം ആക്രമിക്കാനുള്ള സ്വാതന്ത്രമുണ്ടോ' എന്നായിരുന്നു വിജയരാഘവന്റെ പ്രതികരണം.

പണ്ട് തന്റെ വാക്കുകള്‍ വളച്ചൊടിച്ച് മാധ്യമങ്ങള്‍ പ്രചാരണം നടത്തിയിട്ടുണ്ട്. ഒരാള്‍ക്കെതിരെയുള്ള വിമര്‍ശനം അയാളുടെ വ്യക്തിപരമായ കാര്യങ്ങള്‍ ഉപയോഗിച്ച് നടത്തരുതെന്ന് അഭിപ്രായമുള്ളയാളാണ് ഞാന്‍. രാഷ്ട്രീയക്കാരെയും അവരുടെ കുടുംബങ്ങളെയും വിമര്‍ശിക്കുമ്പോള്‍ മാധ്യമങ്ങളും ശ്രദ്ധിക്കണം. മാധ്യമങ്ങളും നിയന്ത്രണം പാലിച്ചാല്‍ കൊള്ളാം - വിജയരാഘവന്‍ പറഞ്ഞു.