ലൈഫ് പദ്ധതി വരുമാന സര്‍ട്ടിഫിക്കറ്റ് നല്‍കാത്തതില്‍ പ്രതിഷേധിച്ച് സി.പി.എം. പ്രവര്‍ത്തകര്‍ പുത്തൂര്‍ വില്ലേജ് ഓഫീസില്‍ കുത്തിയിരിപ്പുസമരം നടത്തിയിരുന്നു. സമരത്തെത്തുടര്‍ന്നു വില്ലേജ് ഓഫീസര്‍ ഓഫീസില്‍ കൈ ഞരമ്പ് മുറിച്ച് ജീവനൊടുക്കാന്‍ ശ്രമിച്ചു. പുത്തൂര്‍ വില്ലേജ് ഓഫീസര്‍ സി.എന്‍. സിമിയാണ് ഇന്നലെ ഉച്ചയ്ക്ക് രണ്ടിന് ആത്മഹത്യക്കു ശ്രമിച്ചത്.

പഞ്ചായത്തു പ്രസിഡന്റ് മിനി ഉണ്ണിക്കൃഷ്ണന്റെ നേതൃത്വത്തിലായിരുന്നു കുത്തിയിരിപ്പുസമരം. പോലീസെത്തി പ്രശ്നപരിഹാരത്തിനു ശ്രമിക്കുന്നതിനിടെയായിരുന്നു ആത്മഹത്യാശ്രമം. തുടര്‍ന്ന് മുറിഞ്ഞഭാഗം ബലംപ്രയോഗിച്ച് തുണികൊണ്ടു പൊതിഞ്ഞ പോലീസ് ഉടന്‍ സിമിയെ ആശുപത്രിയിലേക്കു മാറ്റി. ഇവരുടെ ആരോഗ്യനില അപകടകരമല്ലെന്ന് ആശുപത്രി അധികൃതര്‍ പറഞ്ഞു.

പഞ്ചായത്ത് ഭരണസമിതിയംഗങ്ങളുടെ നേതൃത്വത്തില്‍ സമരം നടത്തിയത് സര്‍ട്ടിഫിക്കറ്റുകളുടെ അഭാവത്തില്‍ അര്‍ഹര്‍ക്ക് അപേക്ഷിക്കാനാകാത്തതു ചൂണ്ടിക്കാട്ടിയാണ്. സര്‍ട്ടിഫിക്കറ്റ് എപ്പോള്‍ നല്‍കാനാകുമെന്ന് അന്വേഷിച്ചെങ്കിലും താനടക്കം മൂന്നു പഞ്ചായത്തംഗങ്ങളോടും വില്ലേജ് ഓഫീസര്‍ മോശമായി പെരുമാറിയെന്ന് മിനി ഉണ്ണിക്കൃഷ്ണന്‍ പറഞ്ഞു.

തുടര്‍ന്ന്, തഹസില്‍ദാരെ ബന്ധപ്പെട്ട് തീരുമാനമാകാതെ ഓഫീസ് വിട്ടുപോകില്ലെന്ന് അറിയിക്കുകയായിരുന്നു. വില്ലേജ് ഓഫീസറോടു മോശമായി പെരുമാറുകയോ കൃത്യനിര്‍വഹണം തടസപ്പെടുത്തുകയോ ചെയ്തിട്ടില്ലെന്നും പോലീസ് ഉദ്യോഗസ്ഥര്‍ സാക്ഷികളാണെന്നും അവര്‍ പറഞ്ഞു.

എന്നാല്‍, സമരം രാഷ്ട്രീയ പ്രേരിതമാണെന്നും ഇന്റര്‍നെറ്റ് ലഭ്യമാകാത്തതാണ് പ്രതിസന്ധിക്കു കാരണമെന്നും തന്റെ ഭാഗത്തു പിഴവുണ്ടായിട്ടില്ലെന്നും സിമി പിന്നീട് പറഞ്ഞു.

കോവിഡ് മാനദണ്ഡങ്ങള്‍ ലംഘിച്ചാണ് സമരം നടത്തിയതെന്ന് ആക്ഷേപമുണ്ട്. സമരക്കാര്‍ക്കെതിരേ കേസെടുക്കണമെന്ന് യൂത്ത് കോണ്‍ഗ്രസ് ആവശ്യപ്പെട്ടു. ടി.എന്‍. പ്രതാപനടക്കം വിവിധ നേതാക്കള്‍ സംഭവത്തില്‍ പ്രതിഷേധിച്ചു.