കരിപ്പൂര്‍ വിമാനാപകടത്തിനിടെ രക്ഷാപ്രവര്‍ത്തനം നടത്തിയവര്‍ക്ക് ആദരവ് അര്‍പ്പിച്ച സംഭവത്തില്‍ പോലീസുകാര്‍ക്കെതിരെ നടപടി ഉണ്ടായേക്കും. ക്വാറന്‍്റീനില്‍ കഴിയുന്ന രക്ഷാപ്രവര്‍ത്തകരെ അവിടെ എത്തിയായിരുന്നു പോലീസ് ഉദ്യോഗസ്ഥന്‍ സല്യുട്ട് ചെയ്തത്. ഇത് ഔദ്യോഗിക അനുമതി ഇല്ലാതെയാണെന്ന് വ്യക്തമായതോടെയാണ് നടപടി ഉണ്ടായേക്കുമെന്ന് റിപ്പോര്‍ട്ടുകള്‍ പുറത്തുവരുന്നത്.

പോലീസ് ഉദ്യോഗസ്ഥന്‍ രക്ഷാ പ്രവര്‍ത്തകരെ സല്യൂട്ട് ചെയ്യുന്നു എന്ന പേരില്‍ സാമൂഹ്യമാധ്യമങ്ങളില്‍ ചിത്രം വൈറലായിരുന്നു. ആദ്യം പോലീസ് കരുതിയിരുന്നത് ചിത്രം വ്യാജമാണെന്നാണ്. എന്നാല്‍ അന്വേഷണം നടത്തിയതോടെ ഉദ്യോഗസ്ഥനെ കണ്ടെത്തി. സംഭവത്തില്‍ പ്രാദേശിക സ്റ്റേഷനില്‍ നിന്ന് റിപ്പോര്‍ട്ട് ആവശ്യപ്പെട്ടതായും ഉദ്യോഗസ്ഥര്‍ വ്യക്തമാക്കി.

ഇതിനിടെ ചിത്രം വ്യാപകമായി ദുരുപയോഗം ചെയ്ത് പ്രചരിപ്പിക്കുന്നതായും പോലീസിന്റെ ശ്രദ്ധയില്‍പ്പെട്ടിട്ടുണ്ട്. കരിപ്പൂരില്‍ രക്ഷാപ്രവര്‍ത്തനം നടത്തിയ ആര്‍.എസ്.എസ് പ്രവര്‍ത്തകരെ പോലീസ് സല്യൂട്ട് ചെയ്യുന്നുവെന്ന രീതിയില്‍ വടക്കേന്ത്യന്‍ ട്വിറ്റര്‍ ഹാന്‍ഡിലുകളിലും ചിത്രം പ്രചരിക്കുന്നുണ്ട്. ഇടത്തോട്ട് മുണ്ട് ഉടുത്തവരായതിനാലാണ് പോലീസ് സല്യൂട്ട് ചെയ്യുന്നതെന്നാണ് സോഷ്യല്‍ മീഡിയയില്‍ നടക്കുന്ന ഒരു പ്രചാരണം.