എല്ലാം കരുതലോടെ... കൊറോണ പേടിക്കിടയില്‍ സ്‌കൂള്‍ തുറക്കുമോയെന്ന അഭ്യൂഹങ്ങള്‍ക്കിടെ പത്തുമുതലുള്ള ക്ലാസുകള്‍ സെപ്റ്റംബര്‍ ഒന്നു മുതല്‍ തുറക്കാന്‍ സാധ്യത; രണ്ട് ഷിഫ്റ്റായി സാമൂഹിക അകലം പാലിച്ചു കൊണ്ടായിരിക്കും ക്ലാസുകള്‍
സെപ്റ്റംബര്‍ ഒന്നിന് സ്‌കൂള്‍ തുറക്കുമെന്ന് അഭ്യൂഹങ്ങളുണ്ടെങ്കിലും രാജ്യത്ത് സ്‌കൂളുകള്‍ തുറക്കുന്ന കാര്യത്തില്‍ സമയക്രമം നിശ്ചയിച്ചിട്ടില്ലെന്ന് കേന്ദ്രസര്‍ക്കാര്‍. അതേ സമയം പത്തുമുതലുള്ള ക്ലാസുകള്‍ സെപ്റ്റംബര്‍ ഒന്നു മുതല്‍ തുറക്കാനാണ് സാധ്യത. രാവിലെ എട്ടിന് ക്ലാസ് തുടങ്ങും എന്ന പ്രത്യേകതയും ഇക്കുറിയുണ്ട്. രണ്ട് ഷിഫ്റ്റായി സാമൂഹിക അകലം പാലിച്ചു കൊണ്ടായിരിക്കും ക്ലാസുകള്‍ നടത്തുക.
ഇതുവരെ കേന്ദ്രഭരണ പ്രദേശമായ ചണ്ഡീസ്ഗഡ് മാത്രമാണ് കേന്ദ്രത്തോട് സ്‌കൂള്‍ തുറക്കണം എന്ന ആവശ്യം ഉന്നയിച്ചത് എന്നാണ് വാര്‍ത്ത ഏജന്‍സി എഎന്‍ഐ സര്‍ക്കാര്‍ വൃത്തങ്ങളെ ഉദ്ധരിച്ച് റിപ്പോര്‍ട്ട് ചെയ്യുന്നത്. അതേ സമയം കൊവിഡിനെ തുടര്‍ന്ന് അടച്ചിട്ട ശ്രീലങ്കയിലെ സ്‌കൂളുകള്‍ തുറന്നു.
തിങ്കളാഴ്ച ഇക്കാര്യങ്ങള്‍ കേന്ദ്ര വിദ്യാഭ്യാസ വകുപ്പ് ഉദ്യോഗസ്ഥര്‍ പാര്‍ളമെന്ററി കമ്മിറ്റിയെ ധരിപ്പിച്ചു. മുന്‍പ് കേന്ദ്ര മാനവവിഭവ ശേഷി മന്ത്രാലയത്തിലെ സ്‌കൂള്‍ വിദ്യാഭ്യാസ സാക്ഷരത വിഭാഗം രാജ്യത്ത് സ്‌കൂള്‍ തുറക്കുന്നതുമായി ബന്ധപ്പെട്ട വിവിധ സംസ്ഥാനങ്ങളിലെയും, കേന്ദ്രഭരണ പ്രദേശങ്ങളിലെയും രക്ഷിതാക്കളുടെ അഭിപ്രായങ്ങള്‍ സ്വരൂപിക്കാന്‍ അതാത് പ്രദേശിക ഭരണകൂടങ്ങള്‍ക്ക് സര്‍ക്കുലര്‍ നല്‍കിയിരുന്നു.
സ്‌കൂളുകള്‍ തുറക്കാന്‍ പറ്റിയ സമയം ഏതാണ് എന്നത് നിശ്ചയിക്കാന്‍ കൂടിയായിരുന്നു ഈ സര്‍ക്കുലര്‍. മാര്‍ച്ച് മധ്യത്തോടെ കൊവിഡ് ഭീഷണിയെ തുടര്‍ന്ന് രാജ്യത്തെ സ്‌കൂളുകള്‍ പൂര്‍ണ്ണമായും അടഞ്ഞ് കിടക്കുകയാണ്. അതിന് ശേഷം കൊവിഡുമൂലം ഏര്‍പ്പെടുത്തിയ പല നിയന്ത്രണങ്ങളും കേന്ദ്രം എടുത്ത് കളഞ്ഞെങ്കിലും സ്‌കൂളുകള്‍ക്ക് ഇളവ് നല്‍കിയിട്ടില്ല.
അതേ സമയം കേന്ദ്ര സര്‍ക്കാര്‍ കൊവിഡിന്റെ അസാധാരണ സാഹചര്യം കണക്കിലെടുത്ത് രാജ്യത്തെ സ്‌കൂള്‍ സിലബസ് ഒന്‍പത് മുതല്‍ 12വരെയുള്ള ക്ലാസില്‍ 30 ശതമാനം വെട്ടികുറയ്ക്കാന്‍ തീരുമാനിച്ചിരുന്നു. ഒപ്പം ഓണ്‍ലൈന്‍ ക്ലാസുകളെ പരമാവധി പ്രോത്സാഹിപ്പിക്കാനാണ് കേന്ദ്ര സര്‍ക്കാര്‍ തീരുമാനം. എന്നാല്‍ സിലബസ് കുറയ്ക്കാന്‍ കേരള സര്‍ക്കാര്‍ തയ്യാറല്ല. ഇത് വിവാദങ്ങള്‍ക്ക് കാരണമായിട്ടുണ്ട്.
സെപ്റ്റംബര്‍ ഒന്നിന് സ്‌കൂള്‍ തുറക്കുന്ന രീതിയില്‍ തന്നെയാണ് കേരള സര്‍ക്കാര്‍ മുന്നോട്ടുപോകുന്നത്. മാര്‍ച്ചില്‍ സ്‌കൂളുകള്‍ അടച്ചപ്പോള്‍ തന്നെ ഓണം കഴിഞ്ഞ് തുറക്കാമെന്ന ചിന്തയിലായിരുന്നു സംസ്ഥാന പൊതു വിദ്യാഭ്യാസ വകുപ്പ്. കേന്ദ്ര സര്‍ക്കാരിന്റെ തീരുമാനമാണ് ഇക്കാര്യത്തില്‍ അന്തിമം.
പത്തു മുതലുള്ള സ്‌കൂള്‍ ക്ലാസുകളും കോളേജുകളും ആദ്യം തുറക്കുകയും സ്ഥിതിഗതികള്‍ മനസിലാക്കി മറ്റ് ക്ലാസുകള്‍ തുറക്കുകയും ചെയ്യാം എന്നാണ് കേന്ദ്ര സര്‍ക്കാരിന്റെ തീരുമാനം. ഇത് അതേപടി സംസ്ഥാനസര്‍ക്കാര്‍ അംഗീകരിക്കും. ഓണ്‍ലൈന്‍ ക്ലാസുകള്‍ നടക്കുന്നുണ്ടെങ്കിലും അത് പൂര്‍ണമായി ഫലപ്രദമാണോ എന്ന കാര്യത്തില്‍ സര്‍ക്കാരിന് സംശയമുണ്ട്. രക്ഷിതാക്കള്‍ കുട്ടികളുടെ കാര്യത്തില്‍ തീര്‍ത്തും ആശങ്കാകുലരാണ്. കോവിഡ് കുട്ടികളുടെ ജീവിതം തകര്‍ത്തു എന്ന അഭിപ്രായമാണ് പല രക്ഷകര്‍ത്താക്കള്‍ക്കുമുള്ളത്. എന്നാല്‍ ചില രക്ഷകര്‍ത്താക്കള്‍ പകര്‍ച്ചവ്യാധി ഭയന്ന് കുട്ടികളെ സ്‌കൂളില്‍ അയക്കുന്നതിനോട് വിമുഖത പ്രകടിപ്പിക്കുന്നുണ്ട്. കേരളത്തിലെ സ്‌കൂളുകള്‍ നേരിടുന്ന അടിസ്ഥാന സൗകര്യങ്ങളുടെ കുറവാണ്. അവരെ അലട്ടുന്നത്.
ചില സര്‍വകലാശാലകള്‍ പരീക്ഷ നടത്താതെ തന്നെ സര്‍ട്ടിഫിക്കേറ്റ് നല്‍കാനും ആലോചിച്ചിരുന്നു. എന്നാല്‍ കേരളത്തിലെ സര്‍വകലാശാലകള്‍ ഇതിന് തയ്യാറായില്ല. മറ്റ് പല സംസ്ഥാനങ്ങളും ഈ പാത പിന്തുടര്‍ന്നിരുന്നു.
"
https://www.facebook.com/Malayalivartha
