മൂന്നു മാസത്തിലേറെയായി അറുനൂറോളം ജൂനിയര്‍ ഡോക്ടര്‍മാര്‍ക്ക് ശമ്പളമില്ല
സംസ്ഥാനത്തെ വിവിധ പ്രാഥമിക ആരോഗ്യ കേന്ദ്രങ്ങളിലും കോവിഡ് ഫസ്റ്റ് ലൈന്‍ ട്രീറ്റ്മെന്റ് സെന്ററുകളിലും മൂന്നു മാസത്തിലേറെയായി ജോലി ചെയ്യുന്ന അറൂനൂറിലേറെ ജൂനിയര്‍ ഡോക്ടര്‍മാര്‍ക്ക് വേതനവും തസ്തികയുമില്ല. ഇവരുടെ കാര്യത്തില്‍ സര്‍ക്കാര്‍ അവഗണന തുടരുന്നു.
വിവിധ സര്‍ക്കാര്‍ മെഡിക്കല്‍ കോളജുകളില്‍നിന്നായി 980 പേരെയാണു സര്‍ക്കാര്‍ ഡ്യൂട്ടിക്കായി നിയമിച്ചത്. 2014 ബാച്ചില്‍ സര്‍ക്കാര്‍ മെഡിക്കല്‍ കോളജില്‍നിന്നു പഠിച്ചിറങ്ങി കഴിഞ്ഞ മാര്‍ച്ചില്‍ ഹൗസ് സര്‍ജന്‍സിയും പൂര്‍ത്തിയാക്കിയ യുവ ഡോക്ടര്‍മാരെയാണു സര്‍ക്കാര്‍ ചൂഷണം ചെയ്യുന്നത്.സാമൂഹിക ആരോഗ്യ കേന്ദ്രങ്ങളിലായിരുന്നു ആദ്യം നിയമനം.
പ്രത്യേക ഉത്തരവിലൂടെ ജില്ലാ മെഡിക്കല്‍ ഓഫീസര്‍മാര്‍ പിന്നീട് ഇവരെ എഫ്.എല്‍.ടി.സികളിലേക്കു മാറ്റുകയായിരുന്നു. പലര്‍ക്കും 24 മണിക്കൂറാണ് ജോലി, തിരുവനന്തപുരം ഉള്‍പ്പെടെയുള്ള ജില്ലകളില്‍ ഒരു എഫ്.എല്‍.ടി.സിയില്‍ ഒരു ഡോക്ടര്‍ മാത്രമാണുണ്ടാകുക. ഇതോടെ ജോലിഭാരവും വര്‍ധിക്കും. മൂന്നു മാസം ജോലി ചെയ്തവര്‍ക്ക് പോലും ഇതുവരെ വണ്ടിക്കൂലി പോലും ലഭിച്ചിട്ടില്ല.
ഇതേസമയം, സ്വകാര്യ മെഡിക്കല്‍ കോളജുകളില്‍ നിന്നും പഠിച്ചിറങ്ങിയവരെ കോവിഡ് ഡ്യൂട്ടിയ്ക്കു നിയോഗിച്ചിട്ടില്ലാത്തതും പരാതിയ്ക്ക് ഇടയാക്കി. ഇത്തരത്തില്‍ സംസ്ഥാനത്തിനകത്തും പുറത്തുനിന്നുമായി സ്വകാര്യ മെഡിക്കല്‍ കോളജുകളില്‍ നിന്നു പഠിച്ചിറങ്ങിയവര്‍ ജോലിക്കു കയറുകയോ ഉപരിപഠനത്തിനു തയാറെടുക്കുകയോ ചെയ്യുമ്പോള്‍ സര്‍ക്കാര്‍ കോളജുകളില്‍ നിന്നുള്ള ജൂനിയര്‍ ഡോക്ടര്‍മാര്‍ 24 മണിക്കൂര്‍ വരെ ജോലി ചെയ്യേണ്ട സാഹചര്യമാണെന്നു സംഘടനാ നേതാക്കള്‍ പറഞ്ഞു.
തസ്തിക ഇല്ലാത്തതിനാല്‍ ശമ്പളക്കാര്യത്തിലും അനിശ്ചിതത്വം നിലനില്‍ക്കുന്നു. ഉടന്‍ നല്‍കുമെന്ന് ആരോഗ്യ വകുപ്പ് അറിയിക്കുന്നുണ്ടെങ്കിലും ധനവകുപ്പില്‍ നിന്നു യാതൊരു തീരുമാനവുമുണ്ടായിട്ടില്ലെന്നാണു ലഭിക്കുന്ന വിവരമെന്നും കേരള ജൂനിയര്‍ ഡോക്ടേഴ്സ് അസോസിയേഷന്‍ ഭാരവാഹികള്‍ പറഞ്ഞു. കോവിഡ് ഡ്യൂട്ടിക്കെന്നാണു പറയുന്നതെങ്കിലും ആരോഗ്യകേന്ദ്രങ്ങളിലെ കടലാസ് ജോലികള്‍ വരെ ചെയ്യേണ്ട ഗതികേടിലാണെന്നു ജൂനിയര്‍ ഡോക്ടര്‍മാര്‍ പരാതിപ്പെടുന്നു. പ്രതിഷേധ സൂചകമായി പത്തു മുതല്‍ കറുത്ത ബാഡ്ജുമണിഞ്ഞാണ് ജോലി ചെയ്യുന്നതെന്നു അസോസിയേഷന്‍ സംസ്ഥാന പ്രസിഡന്റ് ഔസം ഹുസൈന്‍ പറഞ്ഞു.
https://www.facebook.com/Malayalivartha
