കേരളത്തില്‍ ബിജെപിക്ക് അപ്രതീക്ഷിത നേട്ടം ഉണ്ടാകുമെന്ന് തെരഞ്ഞെടുപ്പിന് ശേഷം സിപിഎം വിലയിരുത്തുന്നു. മഞ്ചേശ്വരത്ത് കെ സുരേന്ദ്രനും പാലക്കാട് ഇ ശ്രീധരനും കഴക്കൂട്ടത്ത് ശോഭ സുരേന്ദ്രനും ജയിച്ചേക്കുമെന്നാണ് പാര്‍ട്ടി വിലയിരുത്തുന്നത്.

എന്നാലിത് പരസ്യമായി പറയാന്‍ സിപിഎം തയ്യാറല്ല. വോട്ടുകള്‍ മെഷീനിലായതിനാല്‍ പ്രവചനത്തിന് അര്‍ത്ഥമില്ല. രണ്ടാം തീയതിവരെ കാത്തിരിക്കണം.

അതേസമയം കോണ്‍ഗ്രസിന്റേയും സിപിഎമ്മിന്റേയും അട്ടിമറികള്‍ ബിജെപി പ്രതീക്ഷിക്കുന്നുണ്ട്. ജയിക്കാവുന്ന മണ്ഡലത്തില്‍ വോട്ട് മറിച്ച് തോല്‍പ്പിക്കുന്ന രീതിയാണ് പല ബിജെപി സ്ഥാനാര്‍ത്ഥികളേയും തോല്‍പ്പിക്കുന്നത്.

ശോഭ സുരേന്ദ്രന്‍ തികഞ്ഞ ആത്മവിശ്വാസത്തിലാണ്. താഴെ തട്ടില്‍ പ്രവര്‍ത്തനം നടന്നത് എണ്ണയിട്ട യന്ത്രം പോലെയായിരുവെന്നും യുഡിഎഫ് വോട്ടുകള്‍ ബിജെപിക്ക് കിട്ടുമെന്ന് ശോഭ സുരേന്ദ്രന്‍ പറഞ്ഞു. ബിജെപിയുടെ ഓരോ വോട്ടും ഇരുമ്പുമറ കെട്ടി സംരക്ഷിച്ച് ഉറപ്പാക്കിയിട്ടുണ്ട്. കെ സുരേന്ദ്രനോട് സ്‌നേഹമുള്ള സഖാക്കള്‍ മഞ്ചേശ്വരത്ത് സുരേന്ദ്രന് വോട്ട് ചെയ്ത് കാണുവെന്നും ശോഭാ സുരേന്ദ്രന്‍ അഭിപ്രായപ്പെട്ടു.

അയ്യപ്പവിശ്വാസികളെ ദ്രോഹിച്ചതുമായി ബന്ധപ്പെട്ട നീറ്റല്‍ കൊണ്ട് നടക്കുന്ന വോട്ടര്‍മാരുടെ കൂടി വോട്ട് ഇത്തവണ എന്‍ ഡി എയ്ക്ക് ലഭിച്ചു. വിശ്വാസവുമായി ബന്ധപ്പെട്ട് വോട്ടെടുപ്പ് ദിവസമായ ഇന്നലെ മുഖ്യമന്ത്രി പിണറായി വിജയന്‍ പറഞ്ഞത് ബുദ്ധിക്ക് നിരക്കുന്നതല്ല. മുഖ്യമന്ത്രി അയ്യപ്പനെ ഭയപ്പെട്ടു. ഒരു ഘട്ടത്തില്‍ അയ്യപ്പന്റെ ശാപം കിട്ടുമോ എന്ന് കൂടി മുഖ്യമന്ത്രിക്ക് തോന്നിയതായി ശോഭാ സുരേന്ദ്രന്‍ മാദ്ധ്യമങ്ങളോട് പറഞ്ഞു.

മുഖ്യമന്ത്രി അയ്യപ്പസ്വാമിയുടെ പേരില്‍ സാഷ്ടാംഗം നമസ്‌കരിക്കുന്ന കാഴ്ചയാണ് കണ്ടത്. ദേവഗണങ്ങള്‍ തങ്ങളുടെ കൂടെയുണ്ട് എന്ന് പറയുമ്പോള്‍ അയ്യപ്പനെ ഭയപ്പെട്ടു എന്നത് തന്നെയാണ് വ്യക്തമാകുന്നത്. എന്നാല്‍ ഇടതുപക്ഷത്തിന്റെ കൂടെ അസുരന്മാര്‍ മാത്രമേയുളളൂവെന്നും ശോഭ കൂട്ടിച്ചേര്‍ത്തു.

ബി.ജെ.പി അധികാരത്തില്‍ എത്തിയാല്‍ പിണറായി സര്‍ക്കാര്‍ കൊണ്ടുവന്ന പല കാര്യങ്ങളും ഉടച്ചുവാര്‍ക്കുമെന്ന് പാലക്കാട്ടെ എന്‍.ഡി.എ സ്ഥാനാര്‍ത്ഥി ഇ ശ്രീധരന്‍ പറഞ്ഞു. മുഖ്യമന്ത്രിയാവാന്‍ ബി.ജെ.പി ആവശ്യപ്പെട്ടാല്‍ നിരസിക്കില്ലെന്നും ശ്രീധരന്‍ പറഞ്ഞല്ല. പിണറായി വിജയനേക്കാള്‍ മികച്ച മുഖ്യമന്ത്രിയാവും. മറ്റ് ഏതു സംസ്ഥാനത്തെയും മുഖ്യമന്ത്രിയേക്കാള്‍ മികവോടെ പ്രവര്‍ത്തിക്കാന്‍ കഴിയുമെന്നും ചാനല്‍ അഭിമുഖത്തില്‍ ഇ ശ്രീധരന്‍ പറഞ്ഞു.

ജയിച്ചുകഴിഞ്ഞാലുള്ള ഒരുക്കങ്ങളെല്ലാം സംവിധാനം ചെയ്തുകഴിഞ്ഞു. എം.എല്‍.എ ഓഫിസ് എടുത്തു, അതിനൊപ്പം ഗസ്റ്റ് ഹൗസുമുണ്ട്. പാലക്കാട്ട് ഞാന്‍ അധികകാലം ജീവിച്ചിട്ടില്ല. പക്ഷേ, എന്നെപ്പറ്റി എല്ലാവര്‍ക്കും എല്ലാം അറിയാം. എന്നെപ്പറ്റി ആറു പുസ്തകങ്ങളുണ്ട്. പലരും പല പുസ്തകങ്ങളും വായിച്ചിട്ടുണ്ട്. ചെറിയ കുട്ടികള്‍ക്കു കൂടി എന്നെപ്പറ്റി അറിയാം. വലിയ ആവേശവും വലിയ ആദരവുമൊക്കെയായിരുന്നു അവര്‍ക്ക്. വ്യക്തിപ്രഭാവം കൊണ്ടാണ് എനിക്കു വോട്ടു കിട്ടുകയെന്നും ശ്രീധരന്‍ പറഞ്ഞു.

ഒരു സീറ്റുള്ള ബി.ജെ.പി 35 സീറ്റില്‍ എത്തുമെന്നാണ് എക്‌സിറ്റ് പോള്‍ പറയുന്നത്. 35 സീറ്റ് കിട്ടിയാല്‍ ബി.ജെ.പി ആയിരിക്കും കിംഗ് മേക്കര്‍. ആരു ഭരിക്കണമെന്നും എങ്ങനെ ഭരിക്കണമെന്നും അവര്‍ തീരുമാനിക്കുമെന്നും ശ്രീധരന്‍ പറഞ്ഞു.

മഞ്ചേശ്വരത്ത് സുരേന്ദ്രനും തികഞ്ഞ ആത്മവിശ്വാസത്തിലാണ്. മുല്ലപ്പള്ളിയുടെ നിലവിളി തന്നെ സുരേന്ദ്രന്‍ ജയിക്കുമെന്ന് മുന്‍കൂട്ടി കണ്ടതുകൊണ്ടാണ്. എന്തായാലും മേയ് രണ്ടുവരെ കാത്തിരിക്കാം.