കോവിഡ് വ്യാപനം വല്ലാതെ കൂടുന്ന സാഹചര്യത്തില്‍ ഇന്ത്യക്ക് കരുത്തായി ലോക രാജ്യങ്ങളും വമ്പന്‍ കമ്പനികളും. പ്രധാനമന്ത്രി നരേന്ദ്ര മോദി യുഎസ് പ്രസിഡന്റ് ജോ ബൈഡനുമായി ചര്‍ച്ച നടത്തി. ടെലിഫോണിലൂടെ ഇരുവരും രണ്ടു രാജ്യത്തെയും കോവിഡ് സാഹചര്യത്തെ കുറിച്ച് സംസാരിച്ചെന്ന് പ്രധാനമന്ത്രി ട്വീറ്റ് ചെയ്തു. ഇന്ത്യയ്ക്ക് യുഎസ് നല്‍കുന്ന പിന്തുണയ്ക്ക് നന്ദി അറിയിച്ചതായും മോദി ട്വിറ്ററില്‍ പറഞ്ഞു.

കോവീഷീല്‍ഡ് വാക്‌സീന്‍ നിര്‍മിക്കാനായി വേണ്ട അസംസ്‌കൃത വസ്തുക്കള്‍ ഇന്ത്യയിലേക്ക് അയയ്ക്കുമെന്ന് യുഎസ് അറിയിച്ചതിനു പിന്നാലെയാണ് ഇരുവരുടെയും സംഭാഷണം. അഞ്ചു ടണ്‍ ഓക്‌സിജന്‍ കോണ്‍സന്‍ട്രേറ്റും യുഎസ് ഇന്ത്യയ്ക്ക് കൈമാറി. കോവിഡിന്റെ രണ്ടാം തരംഗത്തില്‍ തകര്‍ന്നു പോയ ഇന്ത്യയ്ക്ക് സഹായഹസ്തവുമായി യൂറോപ്യന്‍ യൂണിയന്‍, ഫ്രാന്‍സ്, ജര്‍മനി തുടങ്ങിയ രാജ്യങ്ങള്‍ രംഗത്തുവന്നതിനു പിന്നാലെയാണ് യുഎസും സഹായം വാഗ്ദാനം ചെയ്തത്.

അതേസമയം കോവിഡ് വ്യാപനം രൂക്ഷമായ ഇന്ത്യയ്ക്ക് പിന്തുണയുമായി ഗൂഗിളും മൈക്രോസോഫ്റ്റും രംഗത്തെത്തി. അടിയന്തര മെഡിക്കല്‍ ഉപകരണങ്ങള്‍ ലഭ്യമാക്കുന്നതിനും ബോധവല്‍ക്കരണ, ദുരിതാശ്വാസ പ്രവര്‍ത്തനങ്ങള്‍ക്കും സഹായമെത്തിക്കുമെന്ന് ഇരുകമ്പനികളുടെയും ഇന്ത്യക്കാരായ സിഇഒമാര്‍ അറിയിച്ചു.

യൂനിസെഫ്, സന്നദ്ധസംഘടന ഗിവ് ഇന്ത്യ എന്നിവ വഴി 135 കോടി രൂപയുടെ സഹായം എത്തിക്കുമെന്ന് ഗൂഗിള്‍ ചീഫ് എക്‌സിക്യൂട്ടീവ് ഓഫിസര്‍ സുന്ദര്‍ പിച്ചൈ ട്വീറ്റ് ചെയ്തു. ഗൂഗിളിന്റെ ജീവകാരുണ്യ വിഭാഗമായ ഗൂഗിള്‍ ഡോട്ട് ഓര്‍ഗില്‍ നിന്നുള്ള 20 കോടിയുടെ രണ്ട് ഗ്രാന്റുകളും ഗൂഗിള്‍ ജീവനക്കാരുടെ സംഭാവനയായ 3.7 കോടി രൂപയും ഇതില്‍പ്പെടും. ഇന്ത്യയിലെ കോവിഡ് സ്ഥിതി തന്നെ ഉലച്ചതായി സുന്ദര്‍ പിച്ചൈ ട്വീറ്റ് ചെയ്തു.

ഇന്ത്യയിലെ അവസ്ഥ ഹൃദയഭേദകമാണെന്ന് മൈക്രോസോഫ്റ്റ് സിഇഒ സത്യ നദെല്ല ട്വീറ്റ് ചെയ്തു. ദുരിതാശ്വാസ പ്രവര്‍ത്തനങ്ങള്‍ക്കും ഓക്‌സിജന്‍ ഉപകരണങ്ങള്‍ വാങ്ങുന്നതിനും എല്ലാ സഹായവും നല്‍കുമെന്നും പ്രതിരോധ പ്രവര്‍ത്തനങ്ങളെ സഹായിക്കാന്‍ തങ്ങളുടെ സാങ്കേതിക വൈദഗ്ധ്യം വിനിയോഗിക്കുമെന്നും അദ്ദേഹം പറഞ്ഞു. ഇന്ത്യയെ സഹായിക്കാന്‍ മുന്നോട്ടുവന്ന യുഎസിനോടുള്ള നന്ദിയും നദെല്ല അറിയിച്ചു.

10,000 ഓക്‌സിജന്‍ കോണ്‍സന്‍ട്രേറ്ററുകളും ബിപാപ് മെഷിനുകളും അടിയന്തരമായി ഇന്ത്യയില്‍ എത്തിക്കുമെന്ന് ഇ കൊമേഴ്‌സ് കമ്പനി ആമസോണ്‍ അറിയിച്ചു. ഒട്ടേറെ ഇന്ത്യന്‍-അമേരിക്കന്‍ സംഘടനകളും ധനസമാഹരണ ക്യാംപെയ്‌നുകള്‍ക്കു തുടക്കമിട്ടു കഴിഞ്ഞു.

അതേസമയം ഇന്ത്യയെ കോവിഡിന് എതിരായ പോരാട്ടത്തില്‍ ലോകരാജ്യങ്ങള്‍ സഹായിക്കാന്‍ തയ്യാറായത് നരേന്ദ്ര മോദി സര്‍ക്കാരിന്റെ നയത്തിനുളള അംഗീകാരമാണെന്ന് കേന്ദ്രമന്ത്രി വി. മുരളീധരന്‍ പറഞ്ഞു. വികസിതരാജ്യങ്ങള്‍ സഹായം വാഗ്ദാനം ചെയ്തതായ മാദ്ധ്യമ വാര്‍ത്തകള്‍ അദ്ദേഹം ചൂണ്ടിക്കാട്ടി. മോദിയുടെ നയത്തിനുള്ള അംഗീകാരമാണ് ഇപ്പോള്‍ പറന്നെത്തുന്ന സഹായങ്ങളെന്ന് വിമര്‍ശകര്‍ പോലും അംഗീകരിക്കുമെന്നും മുരളീധരന്‍ ഫേസ്ബുക്കില്‍ കുറിച്ചു.

കോവിഡ് ഒന്നാം തരംഗത്തില്‍ പകച്ചുപോയ വികസിത രാജ്യങ്ങള്‍ക്ക് ഇന്ത്യ നല്‍കിയ സഹായത്തിനുള്ള പ്രത്യുപകാരമാണ് ഇപ്പോള്‍ ലഭിക്കുന്നത്. 'ലോകാസമസ്താ സുഖിനോ ഭവന്തു' എന്ന ഭാരതീയ തത്വശാസ്ത്രത്തില്‍ ഉറച്ചു നിന്നാണ് അമേരിക്കയും ബ്രിട്ടണുമടക്കമുള്ള രാജ്യങ്ങള്‍ക്ക് മരുന്നും സേവനങ്ങളും എത്തിച്ചു നല്‍കിയത്. മഹാമാരിക്കെതിരായ പോരാട്ടം ആഗോളസമൂഹം ഒറ്റക്കെട്ടായി നടത്തേണ്ടതാണ് എന്നാണ് മോദി സര്‍ക്കാരിന്റെ നയമെന്നും മുരളീധരന്‍ തന്റെ ഫേസ്ബുക്ക് പോസ്റ്റില്‍ പറയുന്നു.