സംസ്​ഥാനത്ത്​ കോവിഡ്​ വ്യാപനം വര്‍ധിക്കുകയാണെന്നും സ്​ഥിതി രൂക്ഷമാണെന്നും മുഖ്യമ​ന്ത്രി പിണറായി വിജയന്‍. രോഗവ്യാപനം തുടര്‍ന്നാല്‍ മരണ നിരക്ക്​ ഉയരുമെന്ന ആശങ്കയുണ്ട്​. ഇത്​ നേരിടാന്‍ കൂടുതല്‍ പേര്‍ കോവിഡ്​ ബ്രിഗേഡിന്‍റെ ഭാഗമാകണമെന്നും അദ്ദേഹം ആഹ്വാനം ചെയ്​തു.

ഡോക്​ടര്‍മാരും നഴ്​സുമാരും ഉള്‍പ്പെടെ 13,625 പേരാണ്​ നിലവില്‍ കോവിഡ്​ ബ്രിഗേഡില്‍ ഉള്ളത്​. രോഗവ്യാപനം വര്‍ധിക്കുന്ന സാഹചര്യത്തില്‍ ഇത്​ പര്യാപ്​തമല്ല. കൂടുതല്‍ ആളുകള്‍ ഇതിന്‍റെ ഭാഗമാകണം. കോവിഡ്​ ബ്രിഗേഡ്​ വെബ്​സൈറ്റില്‍ രജിസ്റ്റര്‍ ചെയ്ത്​ ഈ ചരിത്ര ദൗത്യത്തില്‍ പങ്കളികളാകണമെന്നും മുഖ്യമന്ത്രി അഭ്യര്‍ഥിച്ചു.

ജനിതക വ്യതിയാനം വന്ന വൈറസുകള്‍ മരണനിരക്ക്​ ഉയര്‍ത്തുമോ എന്ന ആശങ്കയുണ്ട്​. തൃശൂരില്‍ 4 ദിവസം കൊണ്ട്​ രോഗികളുടെ എണ്ണം ഇരട്ടിയാകാന്‍ സാധ്യതയുണ്ടെന്നാണ്​ മുന്നറിയിപ്പ്​. രോഗികളുടെ എണ്ണം നമ്മുടെ ആരോഗ്യ മേഖലക്ക്​ താങ്ങാവുന്നതിലപ്പുറമായാല്‍ ചികിത്സ അവതാളത്തിലാകും. അത്തരം അവസ്​ഥ ഒഴിവാകാന്‍ നമ്മള്‍ ഇതുവരെ പുലര്‍ത്തിയ ജാഗ്രത തുടരണം. കഴിവതും എന്‍ 95 മാസ്​ക്​ ധരിക്കുക. അല്ലെങ്കില്‍ ഇരട്ട മാസ്​ക്​ ധരിക്കുക. ഇക്കാര്യത്തില്‍ സൂക്ഷ്​മത പാലിക്കണമെന്നും മുഖ്യമന്ത്രി പറഞ്ഞു.

തിരുവനന്തപുരത്ത്​ വാക്​സിനേഷന്‍ കേന്ദ്രങ്ങളിലെ തിരക്കൊഴിവാക്കാന്‍ ക്രമീകരണം ഏര്‍പ്പെടുത്തിയിട്ടുണ്ട്​. ജില്ലയില്‍ 51 കേന്ദ്രങ്ങളിലാണ്​ വാക്​സിനേഷന്‍. സ്വകാര്യ മെഡിക്കല്‍ കോളജുകളിലെ 75ശതമാനം കിടക്കകള്‍ കോവിഡ്​ ​രോഗികള്‍ക്ക്​ മാറ്റിവെക്കും. ഇതില്‍ 30 ശതമാനം നാളെ സജ്ജമാകും. താലൂക്ക്​ തലത്തില്‍ ആംബുലന്‍സ്​ ടീമുകളെ നിയമിച്ചതായും മുഖ്യമന്ത്രി അറിയിച്ചു.