ജനിതകമാറ്റം വന്ന കൊവിഡ് വൈറസിന്റെ പ്രബലസാന്നിദ്ധ്യം സ്ഥിരീകരിച്ച സാഹചര്യത്തില്‍ ജനങ്ങള്‍ അതീവഗൗരവത്തോടെ സഹകരിച്ചില്ലെങ്കില്‍ സംസ്ഥാനത്ത് ലോക്ക് ഡൗണ്‍ വേണ്ടിവരുമെന്ന് മുഖ്യമന്ത്രി .


ജീവനോപാധി തടസപ്പെടരുതെന്ന് കരുതലിലാണ് ലോക്ക് ഡൗണ്‍ ഒഴിവാക്കുന്നത്. എന്നാല്‍ കാര്യങ്ങള്‍ അതിവേഗം കൈവിടുന്ന സ്ഥിതിയാണ്. ജനിതകമാറ്റം വന്ന കൊവിഡ് രോഗത്തിന്റെ വ്യാപന വേഗതയും മരണസാദ്ധ്യതയും കൂടുതലാണ്.

വാക്‌സിനുപയോഗിച്ച് ഇരട്ട ജനിതകവ്യതിയാനമുണ്ടായ കൊവിഡിനെ ചെറുക്കുക പ്രയാസമാണ്. അത്തരം വൈറസ്ബാധ നിലവില്‍ ഏഴ് ശതമാനമാണ്.

സ്വകാര്യമെഡിക്കല്‍ കോളേജുകളിലെ 75 ശതമാനം കിടക്കകളും കൊവിഡ് ബെഡാക്കി മാറ്റാന്‍ നിര്‍ദ്ദേശിച്ചിട്ടുണ്ട്. ഇതില്‍ പകുതി ഇന്നുതന്നെ കിട്ടും. ഇതില്‍ പകുതി കാരുണ്യ സ്‌കീമിലെ രോഗികള്‍ക്ക് നല്‍കും.



ഓക്‌സിജന്‍ ലഭ്യത എല്ലായിടത്തും ഉറപ്പാക്കും. എല്ലാ ചികിത്സാകേന്ദ്രങ്ങളിലും ഒരു ബെഡ് അടിയന്തര ഓക്‌സിജന്‍ ബെഡാക്കി മാറ്റും.കൂടുതല്‍ രോഗികളുണ്ടാകുന്നത് തടയാന്‍ ജനകൂട്ടം തടയുക മാത്രമാണ് മാര്‍ഗം.

കല്ല്യാണം, ഗൃഹപ്രവേശം തുടങ്ങിയ കാര്യങ്ങള്‍ കഴിയുന്നതും ഒഴിവാക്കണം. ആരാധനാലയങ്ങളിലെ ആള്‍ക്കൂട്ടവും വേണ്ടെന്ന് വയ്ക്കണം. 50 പേര്‍ വരെ കല്ല്യാണത്തിന് പങ്കെടുക്കാമെന്ന് പറഞ്ഞാലും അതില്‍ താഴെയാക്കാന്‍ ശ്രമിക്കണം.




സാനിറ്റൈസേഷന്‍, കഴിയുമെങ്കില്‍ ഇരട്ട മാസ്‌ക്, അല്ലെങ്കില്‍ എന്‍ 95 മാസ്‌ക് എന്നിവ ധരിക്കണം. കൂടുതല്‍ വാക്‌സിന്‍ കിട്ടിയാല്‍ എല്ലാവര്‍ക്കും രജിസ്റ്റര്‍ ചെയ്ത് കഴിയുന്നത്രയാളുകള്‍ക്ക് ഉടന്‍ അത് ലഭ്യമാക്കും.

ആളുകള്‍ കഴിയുന്നതും വീടുകളില്‍ തന്നെ കഴിയണം. ഇത്തരത്തില്‍ രോഗപ്രതിരോധത്തിന്റെ നേതൃത്വം ജനങ്ങള്‍ ഏറ്റെടുക്കണമെന്നും മുഖ്യമന്ത്രി ആഹ്വാനം ചെയ്തു.