കോവിഡിന്റെ രണ്ടാം വരവിൽ കാര്യങ്ങൾ കൈവിട്ടു പോകുകയാണ്. മറ്റൊരു ലോക്ഡൗണിലേക്ക് നാട് പോകാനുള്ള സാധ്യതയും ഏറെയാണ് എന്നാണ് സൂചന. ശരവേഗത്തിൽ പായുന്ന കോവിഡ് കേസുകളും നെഞ്ചിടിപ്പേറ്റുന്ന മരണവാർത്തകളും നാട്ടിൽ നിറയുമ്പോൾ ഇനി എന്ത് എന്ന ചോദ്യം ബാക്കി നിൽക്കുകയാണ്.

പതുക്കെ പതുക്കെ ലോക്ഡൗണിലേക്ക് കാര്യങ്ങൾ നീങ്ങുമ്പോൾ സ്ത്രീകളെ ഭയപ്പെടുത്തുന്ന ചില സംഗതികളിലേക്ക് ശ്രദ്ധക്ഷണിക്കുകയാണ് അപർണ സൗപർണിക. ജോലി സ്ഥലങ്ങളും ഹോസ്റ്റലുകളും വിട്ട് വീട്ടിലേക്ക് തിരികെ കയറേണ്ടി വരുമ്പോൾ ചിലർക്കെങ്കിലും അത് കാരാഗൃഹത്തിന് തുല്യമാണെന്ന് സൗപർണിക കുറിക്കുന്നു. ഫെയ്സ്ബുക്കിലൂടെയാണ് സൗപർണികയുടെ കുറിപ്പ്.

ഫെയ്സ്ബുക്ക് കുറിപ്പ് വായിക്കാം:

പതുക്കെ പതുക്കെ ലോക്ഡൗണിലേക്ക് കാര്യങ്ങൾ നീങ്ങുകയാണ്!!!

മുഴുവനായി ഇനിയുമൊരു ലോക്ഡൗൺ ഉണ്ടാവില്ലെന്ന് നമുക്കറിയാമെങ്കിൽകൂടെയും പലർക്കും ജോലി നഷ്ടപ്പെടാനും അല്ലെങ്കിൽ വീട്ടിൽ നിന്നു ജോലിചെയ്യേണ്ട സാഹചര്യത്തിലേക്ക് എത്തിപെടാനും തുടങ്ങിയിരിക്കുന്നു.

ജോലിസ്ഥലവും, അയൽക്കൂട്ടവും, അങ്ങിനെയങ്ങിനെ വീട്ടിൽനിന്നു അൽപനേരം മാറിനിൽക്കാനുള്ള എല്ലാ സാഹചര്യങ്ങളും രക്ഷപ്പെടലുകളായിരുന്നവർ ഒരിക്കൽകൂടി കാരാഗൃഹ വാസത്തിലേക്കു തിരിച്ചു കയറുകയാണ്. ഒന്നിരുന്നു ശ്വാസമെടുക്കാനായി വീട്ടിലെ ഉടയോൻ ജോലിക്കു പോകാൻ കാത്തിരിക്കേണ്ടിവരുന്നവർക്കും ശ്വാസംമുട്ടൽ ഏറിവരികയാണ്.

നോക്കൂ പെണ്ണുങ്ങളെ... നമുക്ക് കൊറോണയെ മാത്രം പേടിച്ചാൽ പോരല്ലോ....

വീട്ടിനകത്തെ ശാരീരിക മാനസിക പീഡനങ്ങളിൽ നിന്നും സേഫ് ആയിരിക്കു...

181, 1091 എന്നീ helpline നമ്പറുകൾ ഓർത്തു വെക്കു...

മാനസിക പിരിമുറുക്കങ്ങൾ കുറക്കൂ ....

സുഹൃത്തുക്കളുമായി കോണ്ടാക്ടിൽ ഇരിക്കാൻ ശ്രമിക്കു....

ആത്മഹത്യ എന്ന് തോന്നിത്തുടങ്ങുന്നുവെങ്കിൽ പെട്ടന്നുതന്നെ ചികിത്സയോ മറ്റു ഉപാധികളോ തേടൂ....

കൊറോണ പോയാലും നമ്മൾ ഇവിടെ ഉണ്ടാകണം!!!

Love you all

Aparna Souparnika