മേയ് അഞ്ച് മുതല് നടത്താനിരുന്ന എസ്.എസ്.എല്.സി ഐ.ടി പ്രാക്ടിക്കല് പരീക്ഷ മാറ്റി
മേയ് അഞ്ച് മുതല് നടത്താനിരുന്ന എസ്.എസ്.എല്.സി ഐ.ടി പ്രാക്ടിക്കല് പരീക്ഷ മാറ്റിവച്ചു. പുതുക്കിയ തീയതിയും നിര്ദ്ദേശങ്ങളും പിന്നീട് അറിയിക്കുമെന്ന് പൊതുവിദ്യാഭ്യാസ ഡയറക്ടര് അറിയിച്ചു. കൊവിഡ് വ്യാപനം രൂക്ഷമായ സാഹചര്യത്തില് അദ്ധ്യാപകരുടെയും വിദ്യാര്ത്ഥികളുടെയും സുരക്ഷ കണക്കിലെടുത്താണ് പരീക്ഷകള് മാറ്റിയത്. 28 മുതല് ആരംഭിക്കാനിരുന്ന പ്ലസ് ടു പ്രാക്ടിക്കല് പരീക്ഷകള് കഴിഞ്ഞദിവസം മാറ്റിയിരുന്നു. പ്ലസ് ടുക്കാരുടെ പരീക്ഷകള് മാറ്റിയിട്ടും എസ്.എസ്.എല്.സി ഐ.ടി പരീക്ഷ മാറ്റാതിരുന്നതില് വ്യാപക പരാതി ഉയര്ന്നിരുന്നു. പരീക്ഷകള് മാറ്റണമെന്നാവശ്യപ്പെട്ട് അദ്ധ്യാപക സംഘടനകളും രംഗത്തെത്തി. അതേസമയം ഈ മാസം 30 മുതല് മേയ് നാല് വരെ നടത്താന് നിശ്ചയിച്ചിരിക്കുന്ന ടെക്നിക്കല് സ്കൂള് പരീക്ഷകള് മാറ്റിയിട്ടില്ല. പരീക്ഷകള് കൊവിഡ് മാനദണ്ഡങ്ങള് പാലിച്ച് നടത്താനാണ് വിദ്യാഭ്യാസ വകുപ്പ് നിര്ദേശിച്ചിരിക്കുന്നത്. സംസ്ഥാനത്തെ നിലവിലെ സാഹചര്യങ്ങള് കണക്കിലെടുത്ത് ടി.എച്ച്.എസ്.എല്.സി പരീക്ഷകളും മാറ്റണമെന്ന് ആവശ്യമുയര്ന്നിട്ടുണ്ട്. മേയ് അഞ്ച് മുതല് ആരംഭിക്കേണ്ട പ്ലസ് ടു മൂല്യനിര്ണയവും മാറ്റണമെന്ന് അദ്ധ്യാപകര് ആവശ്യപ്പെട്ടു.
https://www.facebook.com/Malayalivartha
