മലയാള സിനിമയുടെ ശോഭനമായ ഭാവിയെക്കുറിച്ച് ശുഭസൂചനകളാണ് അവാര്ഡുകള് നല്കുന്നതെന്ന് മുഖ്യമന്ത്രി
കേരളീയ സമൂഹത്തിന്റെ പുരോഗമനപരമായ പ്രയാണത്തിന് ഊര്ജംപകരുന്ന സിനിമകള്ക്കാണ് ഇത്തവണ പുരസ്കാരം ലഭിച്ചതെന്ന് മുഖ്യമന്ത്രി പിണറായി വിജയന് പറഞ്ഞു. മലയാള സിനിമയുടെ ശോഭനമായ ഭാവിയെക്കുറിച്ച് ശുഭസൂചനകളാണ് അവാര്ഡുകള് നല്കുന്നതെന്നും അദ്ദേഹം പറഞ്ഞു. അമ്ബത്തൊന്നാമത് സംസ്ഥാന ചലച്ചിത്ര പുരസ്കാര വിതരണം ഉദ്ഘാടനം ചെയ്യുകയായിരുന്നു അദ്ദേഹം.
മികച്ച ചിത്രത്തിനും രണ്ടാമത്തെ ചിത്രത്തിനുമുള്ള അംഗീകാരം നേടിയ സിനിമകള് സ്ത്രീപക്ഷ നിലപാട് ഉയര്ത്തിപ്പിടിക്കുന്നു. സ്ത്രീകളുടെ സ്വയംനിര്ണയാവകാശത്തിനുവേണ്ടി വാദിക്കുന്ന ചിത്രങ്ങളാണ് ഇവ. അടുക്കള സ്ത്രീവിരുദ്ധ ഇടമായി തുടരുന്നു എന്ന ആണധികാര വ്യവസ്ഥയെയാണ് മികച്ച സിനിമ തുറന്നുകാട്ടുന്നത്.
പ്രത്യക്ഷമായ ഗാര്ഹിക അതിക്രമങ്ങളോ സ്ത്രീപീഡനങ്ങളോ ഇല്ലാതെ കുടുംബങ്ങള്ക്കകത്ത് നിശ്ശബ്ദമായി പ്രവര്ത്തിക്കുന്ന നിര്ദയ പുരുഷാധിപത്യത്തെ പ്രതിക്കൂട്ടില് നിര്ത്തുന്നു. കുടുംബം എന്ന സാമൂഹ്യസ്ഥാപനത്തെ ജനാധിപത്യവല്ക്കരിക്കേണ്ടതിന്റെ അനിവാര്യത ഊന്നിപ്പറയുന്നു. കുടുംബത്തില് സ്ത്രീ– പുരുഷ ബന്ധങ്ങളിലും പ്രാവര്ത്തികമാക്കേണ്ട വിശാല അര്ഥങ്ങളുള്ള ജീവിതാദര്ശമാണ് ജനാധിപത്യമെന്ന സന്ദേശവും മുന്നോട്ടുവയ്ക്കുന്നു.
സ്ത്രീപക്ഷനിലപാടുകള് ഉയര്ത്തിപ്പിടിക്കുന്ന സിനിമകള്ക്ക് അംഗീകാരം നല്കിയതിലൂടെ ജൂറി അതിന്റെ സാമൂഹ്യപ്രതിബദ്ധത ഉയര്ത്തിപ്പിടിച്ചു. മലയാള സിനിമയെ കൃത്യമായി അടയാളപ്പെടുത്താന് ജൂറിക്കായി.
പ്രമേയത്തിലും ആവിഷ്കാരത്തിലും താരസങ്കല്പ്പത്തിലും അഴിച്ചുപണി നടത്തി കോവിഡ്കാലത്തും സൃഷ്ടിപരമായ പ്രവര്ത്തനങ്ങളില് വ്യാപൃതരായി മലയാള സിനിമയെ മുന്നോട്ടുനയിക്കുന്നവരെ അഭിനന്ദിക്കുന്നതായും മുഖ്യമന്ത്രി പറഞ്ഞു. സാംസ്കാരികമന്ത്രി സജി ചെറിയാന് അധ്യക്ഷനായി.
https://www.facebook.com/Malayalivartha
