പ്രതിപക്ഷ നേതാവിന്റെ ഔദ്യോഗിക വസതിയായ കന്റോണ്‍മെന്റ് ഹൗസില്‍ വിളിച്ചു ചേര്‍ത്ത യോഗത്തില്‍ നിന്ന് മുതിര്‍ന്ന നേതാക്കളായ രമേശ് ചെന്നിത്തലയും ഉമ്മന്‍ചാണ്ടിയും വിട്ടുനിന്നത് സ്വാഭാവികമാണെന്ന് കെ.പി.സി.സി പ്രസിഡന്റ് കെ.സുധാകരന്‍.

പാര്‍ട്ടിയില്‍ പ്രശ്‌നങ്ങളില്ലെന്നും സുധാകരന്‍ കോഴിക്കോട് പറഞ്ഞു. മമ്പറം ദിവാകരനെതിരെ നടപടിയെടുത്തത് ശരിയായ തീരുമാനമാണെന്നും അദ്ദേഹം പറഞ്ഞു. അച്ചടക്കലംഘനം കാട്ടിയതിനാലാണു നടപടിയെടുത്തത്. ഇതു വച്ചുപൊറുപ്പിക്കാനാകില്ലെന്നും സുധാകരന്‍ പറഞ്ഞു.
വിവിധ വിഷയങ്ങളില്‍ സര്‍ക്കാരിനെതിരായ സമരം ശക്തമാക്കുന്നതുള്‍പ്പെടെയുള്ള വിഷയങ്ങള്‍ ചര്‍ച്ച ചെയ്യാനായിട്ടായിരുന്നു പ്രതിപക്ഷ നേതാവിന്റെ ഔദ്യോഗിക വസതിയായ കന്റോണ്‍മെന്റ് ഹൗസില്‍ കോണ്‍ഗ്രസ് യോഗം വിളിച്ചു ചേര്‍ത്തത്.
തിങ്കളാഴ്ച രാവിലെ വിളിച്ച യോഗം രമേശ് ചെന്നിത്തലയും ഉമ്മന്‍ ചാണ്ടിയും ബഹിഷ്‌കരിക്കുകയായിരുന്നു. തിരുവനന്തപുരത്തുണ്ടായിരുന്നിട്ടും ഇരുവരും യോഗത്തിനെത്തിയിരുന്നില്ല. പാര്‍ട്ടി പുനസംഘടനയിലെ അതൃപ്തി പരസ്യമാക്കുന്നതാണ് യു.ഡി.എഫിന്റെ യോഗത്തിലെ മുതിര്‍ന്ന നേതാക്കളുടെ അസാനിധ്യം. തങ്ങള്‍ ഉന്നയിച്ച പ്രശ്‌നങ്ങള്‍ പരിഗണിച്ചില്ലെങ്കില്‍ ശക്തമായ നടപടികളിലേക്ക് കടക്കുമെന്ന സൂചന കൂടിയാണ് ഇരുവരും നേതൃത്വത്തിന് നല്‍കുന്നത്.