പ്ലാസ്റ്റിക് നിരോധനം ശക്തമായി നടപ്പാക്കുമെന്ന് മേയർ ആര്യ രാജേന്ദ്രൻ.; നിരോധിത പ്ലാസ്റ്റിക് ഉല്പന്നങ്ങൾ ഉപയോഗിക്കില്ല എന്നും, സ്വീകരിക്കില്ല എന്നും ഓരോ നഗരവാസികളും സ്വയം തീരുമാനിക്കണമെന്ന അഭ്യർത്ഥനയും ആര്യ നടത്തി. മേയറിന്റെ വാക്കുകൾ ഇങ്ങനെ;

പ്ലാസ്റ്റിക് നിരോധനം ശക്തമായി നടപ്പാക്കും. ഒറ്റതവണ ഉപയോഗിക്കുന്ന പ്ലാസ്റ്റിക്ക് ക്യാരി ബാഗും ഡിസ്പോസിബിൾസും നിരോധിച്ചു കൊണ്ടുള്ള സർക്കാർ ഉത്തരവ് തിരുവനന്തപുരം നഗരസഭയിൽ വിട്ട് വീഴ്ച്ചയില്ലാതെ നടപ്പാക്കും. അതിന് മുന്നോടിയായി വിവിധ പ്രചരണ പരിപാടികൾ സംഘടിപ്പിക്കാൻ തീരുമാനിച്ചിട്ടുണ്ട് .

പ്ലാസ്റ്റിക് ബദൽ ഉൽപ്പന്നങ്ങളുടെ ഒരു മേള ആദ്യ ഘട്ടമായി സംഘടിപ്പിക്കുന്നു. ബദൽ ഉല്പന്നങ്ങളുടെ നിർമ്മാതാകൾക്കും വിതരണക്കാർക്കും മേളയിൽ പങ്കാളികളാകാം. താല്പര്യമുള്ളവർ ചുവടെയുള്ള link-ൽ രജിസ്റ്റർ ചെയ്യേണ്ടതാണ്. http://smarttvm.tmc.lsgkerala.gov.in/index/plastic

പ്ലാസ്റ്റിക് രഹിത നഗരത്തിനായി ജനങ്ങളുടെ സഹകരണം അത്യന്താപേക്ഷിതമാണ്. നിരോധിത പ്ലാസ്റ്റിക് ഉല്പന്നങ്ങൾ ഉപയോഗിക്കില്ല എന്നും, സ്വീകരിക്കില്ല എന്നും ഓരോ നഗരവാസികളും സ്വയം തീരുമാനിക്കണം എന്ന് അഭ്യർത്ഥിക്കുന്നു.

ബദൽ ഉല്പന്നങ്ങൾ പരിചയപ്പെടാനും ഉപയോഗിക്കാനും ഈ മേള സഹായകരമാകും. നാളേയ്ക്ക് വേണ്ടിയുള്ള കരുതലായി ഈ തീരുമാനം മാറും. പരിസ്ഥിതിയ്ക്കും ഭാവിക്കും ഭീഷണിയായ പ്ലാസ്റ്റിക്കിനെതിരെ നമുക്കൊരുമിച്ച് അണിനിരക്കാം.