മുല്ലപ്പെരിയാര്‍ അണക്കെട്ട് ജലബോംബെന്നും വിഷയത്തില്‍ തമിഴ്നാട് രാഷ്ട്രീയം കളിക്കുകയാണെന്നും എം എം മണി എംഎല്‍എ. ശര്‍ക്കരയും ചുണ്ണാമ്ബും ഉപയോഗിച്ച്‌ നിര്‍മിച്ച അണക്കെട്ടിന്റെ അകം കാലിയാണ്. അതിന്റെ പുറത്ത് സിമന്റും കമ്ബിയും പൂശിയെന്ന ന്യായം പറഞ്ഞിട്ട് കാര്യമില്ല. ഇത് നില്‍ക്കുമോയെന്ന് തുരന്നുനോക്കാന്‍ പോകുന്നതോളം വിഡ്ഡിത്തം വേറൊന്നില്ലെന്നും മണി പറഞ്ഞു. ഹൈറേഞ്ച് സംരക്ഷണ സമിതി നെടുങ്കണ്ടത്ത് സംഘടിപ്പിച്ച കര്‍ഷക ഉപവാസത്തില്‍ സംസാരിക്കുകയായിരുന്നു അദ്ദേഹം.

"വണ്ടിപ്പെരിയാറില്‍നിന്ന് ആയിരക്കണക്കിന് അടി ഉയരത്തില്‍ ബോംബ് പോലെ നില്‍ക്കുവാ ഈ സാധനം. ഞാനിത് നിയമസഭയില്‍ ഇങ്ങനെ തന്നെ പറഞ്ഞിട്ടുണ്ട്. ഇതുവച്ച്‌ രാഷ്ട്രീയം കളിക്കുകയാണ് തമിഴ്നാട്ടുകാര്‍. അതിനിപ്പം വേറെ വഴിയൊന്നുമില്ല. എന്തേലും സംഭവിച്ചാല്‍, വരാന്‍ പോകുന്നത് അവര്‍ വെള്ളം കുടിക്കാതെയും ചാകും, നമ്മള്‍ വെള്ളം കുടിച്ചും ചാകും,"അദ്ദേഹം പറഞ്ഞു.

സാമാന്യബുദ്ധിക്ക് ഒന്ന് ആലോചിച്ച്‌ നോക്കിക്കെ. ശര്‍ക്കരയും സുര്‍ക്കിയും ചുണ്ണാമ്ബും ഉപയോഗിച്ച അണക്കെട്ടിന്റെ അകം കാലിയാണ്. ഞാന്‍ പല പ്രാവശ്യം അതിന്റെ അകത്ത് മന്ത്രിമാരുടെ കൂടെ പോയിട്ടുണ്ട്. വെള്ളം ഇറ്റിറ്റ് വരുന്നുണ്ട്. അതിന്റെ പുറത്ത് സിമന്റും കമ്ബിയും പൂശിയെന്നൊന്നും ന്യായം പറഞ്ഞിട്ട് കാര്യമില്ല. അതിന്റെ മുകളില്‍ സിമന്റ് പൂശിയാല്‍ നില്‍ക്കുമോ?

പുതിയ അണക്കെട്ടല്ലാതെ വേറെയെന്താ മാര്‍ഗമെന്ന ചോദ്യമുയര്‍ത്തിയ അദ്ദേഹം എല്‍ഡിഎഫ് സര്‍ക്കാരിന് ഇതേ നിലപാടാണെന്നും പറഞ്ഞു. തമിഴ്നാട് മുഖ്യമന്ത്രി സ്റ്റാലിനും അവിടത്തെ നേതൃത്വവും അനുകൂല നിലപാടെടുത്താല്‍ പ്രശ്നം വേഗത്തില്‍ തീരും. മറിച്ചു വല്ലതും സംഭവിച്ചാല്‍ ദുരന്തമായി തീരും. ഇത് നില്‍ക്കുമോയെന്ന് തുരന്നുനോക്കാന്‍ പോകുന്നതോളം വിഡ്ഡിത്തം വേറൊന്നില്ല.

പുതിയ അണക്കെട്ടിനുവേണ്ടി ഹൈറേഞ്ച് സംരക്ഷണ സമിതി ശബ്ദം ഉയര്‍ത്തണമെന്നാണ് തോന്നുന്നതെന്നു പറഞ്ഞ മണി, വിഷയം ഉയര്‍ത്തുമ്ബോള്‍ ഇരു സംസ്ഥാനത്തേയും ജനങ്ങള്‍ തമ്മില്‍ സംഘര്‍ഷമുണ്ടാകാതെ തന്മയത്തത്തോടെ വേണം കൈകാര്യം ചെയ്യണമെന്നും കൂട്ടിച്ചേര്‍ത്തു.