ശൂരനാട് ഭരണിക്കാവിലെ സ്വകാര്യബാറിന്‌ മുന്നില്‍ യുവാവിന്റെ മരണത്തിനിടയാക്കിയ അപകടത്തിന്റെ സിസിടിവി ദൃശ്യങ്ങള്‍ പുറത്ത്‌. പോരുവഴി കമ്ബലടി പുതുമംഗലത്ത് നിസാം (33) ഞായര്‍ രാത്രി 10.30ന്‌ ആണ്‌ ഭരണിക്കാവ് ജങ്‌ഷന് സമീപത്തുവെച്ച്‌ അപകടത്തില്‍ മരിച്ചത്‌. അമിതമായി മദ്യപിച്ച നിസാമിനെ ബാറിലെ സെക്യൂരിറ്റി ജീവനക്കാര്‍ തിരക്കേറിയ റോഡിലേക്ക് ഇറക്കിവിടുകയായിരുന്നു.

റോഡ് മുറിച്ചുകടക്കാന്‍ ശ്രമിക്കവെ ഇയാള്‍ റോഡിന്‌ നടുവില്‍ വീണെങ്കിലും ജീവനക്കാര്‍ കാഴ്ചക്കാരായി നോക്കിനിന്നു. ആദ്യമെത്തിയ കാര്‍ വെട്ടിച്ച്‌ കടന്നുപോയെങ്കിലും പ്രദേശത്ത്‌ ഇരുട്ടായതിനാല്‍ ശ്രദ്ധയില്‍പ്പെടാതെ പിന്നാലെയെത്തിയ രണ്ട്‌ വാഹനങ്ങള്‍ യുവാവിന്റെ ശരീരത്തിലൂടെ കയറിയിറങ്ങി. യുവാവ്‌ റോഡില്‍ വീണ് കിടക്കുന്നത് സെക്യൂരിറ്റി ജീവനക്കാര്‍ നോക്കിനില്‍ക്കുന്നതും സിസിടിവി ദൃശ്യങ്ങളില്‍ വ്യക്തമാണ്‌.