റഷ്യ യുക്രെയിന്‍ യുദ്ധം നടക്കുമ്പോള്‍ ചൈന മറ്റൊരു യുദ്ധത്തിലാണ്. കൊറോണയ്‌ക്കെതിരായ യുദ്ധത്തിലാണ്. യുദ്ധത്തേക്കാളും ഭീകരമായിരുന്നു ചൈന ലോകത്തിന് സമ്മാനിച്ച കൊറോണ വൈറസ്. ലക്ഷക്കണക്കിന് ആളുകളാണ് മരിച്ച് വീണത്. കോടിക്കണക്കിന് ആളുകളെയാണ് ബാധിച്ചത്.

വീണ്ടും സമാന അവസ്ഥയിലേക്കാണ് ചൈന പോകുന്നത്. ചൈനയില്‍ അതിവേഗം കോവിഡ് വ്യാപിക്കുന്നു. തലേദിവസത്തെക്കാള്‍ ഇരട്ടിയായിരുന്നു ഇന്നലെ രോഗബാധിതരുടെ എണ്ണം. ഇതാകട്ടെ കഴിഞ്ഞ 2 വര്‍ഷമുണ്ടായതിലും ഉയര്‍ന്ന നിരക്കാണ്. നിലവില്‍ പൂര്‍ണ ലോക്ഡൗണിനു കീഴിലായ 13 നഗരങ്ങളില്‍ 3 കോടി ആളുകളാണു വരുന്നത്.

ഇന്നലെ 5280 പേര്‍ക്കാണ് വൈറസ് പകര്‍ന്നുകിട്ടിയത്. തലേദിവസം 3507 ആയിരുന്നു. ലോക രാജ്യങ്ങളിലെ കണക്കുവച്ചു നോക്കിയാല്‍ ഇതു വളരെ കുറവാണ്. വരുന്ന ഏതാനും ആഴ്ചകളിലെ കണക്കു കൂടി വരുമ്പോള്‍ മാത്രമേ കോവിഡിനെ തല്‍ക്ഷണം നിയന്ത്രിച്ചുപോന്നിരുന്ന ചൈനീസ് തന്ത്രം, അതിവേഗം വ്യാപിക്കുന്ന ഒമിക്രോണ്‍ വകഭേദത്തിനെതിരെ ഫലപ്രദമാകുമോ എന്നു വ്യക്തമാകൂ.

ഏപ്രില്‍ പകുതിയോടെ നിയന്ത്രണവിധേയമാകുമെന്നാണ് ലാന്‍ഷൗ യൂണിവേഴ്‌സിറ്റിയിലെ കോവിഡ് പ്രവചനവിഭാഗത്തിന്റെ കണക്കുകൂട്ടല്‍. അപ്പോഴേക്കും കേസുകളുടെ എണ്ണം 35,000 ആകും. ഏറ്റവും ഒടുവിലത്തെ കോവിഡ് ബാധ ഇതുവരെയുണ്ടായതില്‍ ഏറ്റവും ആശങ്കാജനകമാകാമെന്നാണ് യൂണിവേഴ്‌സിറ്റി പറയുന്നത്.

കര്‍ശനമായ രോഗനിയന്ത്രണം വിപണിയെയും പിടിച്ചുലച്ചുതുടങ്ങി. ചൈനയുടെ സാമ്പത്തികവളര്‍ച്ചയെ ബാധിക്കുമോയെന്ന ഭീതിക്കിടയില്‍ ഓഹരിക്കമ്പോളം 21 മാസത്തെ ഏറ്റവും താഴ്ന്ന നിലയിലെത്തി. കഴിഞ്ഞ വര്‍ഷത്തെ സാമ്പത്തിക വളര്‍ച്ച 8.1 ശതമാനമാണ്. ഈ വര്‍ഷം പ്രതീക്ഷിക്കുന്നതു 5.5% മാത്രമാണ്. എന്നാല്‍ ഇപ്പോഴത്തെ പ്രതിസന്ധി ഇതിനും വലിയ വെല്ലുവിളി ഉയര്‍ത്തുന്നു.

ബിസിനസ് കേന്ദ്രങ്ങളായ ഷെന്‍സെന്‍, ചാങ്ചുന്‍ നഗരങ്ങള്‍ ലോക്ഡൗണിലായതും ഓഹരിവിപണിക്ക് തിരിച്ചടിയായി. ഇവിടെ ഭക്ഷണം, ഇന്ധനം എന്നിവ ഒഴികെയുള്ള വ്യാപാരമേഖലകള്‍ അടച്ചിട്ടിരിക്കുകയാണ്.

ചാങ്ചുന്‍ വരുന്ന ജിലിന്‍ പ്രവിശ്യയിലാണ് രോഗബാധ ഏറ്റവും കൂടുതല്‍. തുറമുഖങ്ങളില്‍ നിയന്ത്രണങ്ങള്‍ ഏര്‍പ്പെടുത്തിയതോടെ ഫാക്ടറികള്‍ അടച്ചിടേണ്ടിവന്നു. ഏറ്റവും വലിയ നഗരവും ബിസിനസ് തലസ്ഥാനവുമായ ഷാങ്ഹായിലേക്കു ബസ് സര്‍വീസ് പോലും നിര്‍ത്തി. ചൈനയുടെ വടക്കുകിഴക്കന്‍ ഭാഗത്ത് പൊട്ടിപ്പുറപ്പെട്ട പുതിയ കൊറോണ വൈറസ് കേസുകളുടെ എണ്ണം മൂന്നിരട്ടിയായതോടെയാണ് അധികൃതര്‍ ലോക്ക് ഡൗണ്‍ ഏര്‍പ്പെടുത്തിയത്.

2019 അവസാനത്തോടെ ചൈനയിലെ നഗരമായ വുഹാനിലാണ് ആദ്യമായി കൊറോണ വൈറസ് കേസുകള്‍ കണ്ടെത്തിയത്. രണ്ടു വര്‍ഷം പിന്നിട്ടതോടെ ലോകം സാധാരണ നില കൈവരിച്ചു തുടങ്ങി. ജനജീവിതം സാധാരണനിലയിലേക്കു തിരിച്ചു വന്നു. കുട്ടികള്‍ സ്‌കൂളുകള്‍ തുറന്നു പ്രവര്‍ത്തിക്കുന്നു. കോവിഡ് വ്യാപനം തുടങ്ങിയ ശേഷം ചൈന, സ്ഥിരീകരിച്ചത് 1,15,466 കേസുകളും 4,636 മരണങ്ങളുമാണ്. വേള്‍ഡോമീറ്റര്‍ പ്രകാരം തിങ്കളാഴ്ച ചൈനയില്‍ 24 മണിക്കൂറിനുള്ളില്‍ 1436 കേസുകള്‍ റിപ്പോര്‍ട്ട് ചെയ്തു.

ചില രാജ്യങ്ങളുമായി താരതമ്യപ്പെടുത്തുമ്പോള്‍ ഇതിന്റെ എണ്ണം കുറവാണ്, എന്നാല്‍ ഒരു കേസ് കണ്ടെത്തിയാല്‍ പോലും ലോക്ക് ഡൗണ്‍ ഏര്‍പ്പെടുത്താന്‍ തയ്യാറാണെന്ന നിലപാടാണ് ചൈനീസ് അധികൃതര്‍. കൊറോണ വൈറസ് പൊട്ടിപ്പുറപ്പെടുമെന്ന ഭീഷണി ഭയന്നാണ് ചൈനീസ് നഗരത്തില്‍ ഞായറാഴ്ച മുതല്‍ ലോക്ക് ഡൗണ്‍ ഏര്‍പ്പടുത്തി. എന്നാല്‍ സാമൂഹിക അകലം പാലിക്കുക എന്ന കരുതല്‍ നടപടി കൂടുതല്‍ കര്‍ശനമാക്കാന്‍ തീരുമാനിച്ചതായി ഹോങ്കോംഗ് നേതാവ് കാരി ലാം അറിയിച്ചു. ചൈനയില്‍ കോവിഡ് വന്നതോടെ നമ്മളും അങ്കലാപ്പിലാണ്. ചൈനീസ് വകഭേദം കേരളത്തിലും എത്താന്‍ സാധ്യതയേറെയാണ്.