ആഭ്യന്തരത്തില് പൊളിച്ചെഴുത്ത്, മുഖ്യന് ഒടുവില് മുട്ടുമടക്കി; ആഭ്യന്തര വകുപ്പ് ഉദ്യോഗസ്ഥരുടെ പ്രകടനം മെച്ചപ്പെടുത്താനായും പലതും ചെയ്യുകയാണ് സംസ്ഥാന സര്ക്കാര്; പ്രത്യേകസമിതി സര്ക്കാരിന് റിപ്പോര്ട്ട് സമര്പ്പിച്ചു
ഒടുവില് ആഭ്യന്തര വകുപ്പ് രണ്ടും കല്പിച്ച് അത് തീരുമാനിച്ചു. ഇനി കയറിടേണ്ടിടത്ത് ഇടാമെന്ന്. തീര്ന്നില്ല സര്ക്കാര് ഉദ്യോഗസ്ഥരുടെ പ്രകടനം മെച്ചപ്പെടുത്താനായും പലതും ചെയ്യുകയാണ് സംസ്ഥാന സര്ക്കാര്. പോലീസുകാര്ക്കെതിരെ ഉയരുന്ന പരാതികളും പോലീസുകാര് ചെയ്യുന്ന കുറ്റങ്ങളും വര്ധിച്ചതോടെ പോലീസിലെ കുറ്റവാളികള്ക്ക് മൂക്കുകയറിടാനൊരുങ്ങി സര്ക്കാര്.
പോലീസിന്റെ കുറ്റകൃത്യം അന്വേഷിക്കാന് പുതിയ ഏജന്സിക്ക് ശിപാര്ശ. പ്രത്യേകസമിതി സര്ക്കാരിന് റിപ്പോര്ട്ട് സമര്പ്പിച്ചു. ചീഫ്സെക്രട്ടറി അധ്യക്ഷനും ആഭ്യന്തര സെക്രട്ടറി അംഗവുമായ സമിതിയാണ് പോലീസുകാരുടെ കുറ്റങ്ങള് അന്വേഷിക്കാന് പുതിയ ഏജന്സി വേണമെന്ന നിര്ദേശം സമര്പ്പിച്ചത്. നിലവില് പോലീസ് ഉദ്യോഗസ്ഥര്ക്കെതിരെ ഉയരുന്ന പരാതികളും പോലീസുകാര് ചെയ്യുന്ന കുറ്റങ്ങളും അന്വേഷിക്കുന്നത് പോലീസ് സേനയിലുള്ളവരാണ്.
വകുപ്പുതല അന്വേഷണം പലപ്പോഴും എങ്ങുമെത്തുന്നില്ല. നടപടി സസ്പെന്ഷനിലോ സ്ഥലംമാറ്റത്തിലോ മാത്രമായി ഒതുക്കും. അതുമല്ലെങ്കില് കുറച്ചുകാലം കഴിയുമ്പോള് പരാതികള് പോലും കാണാതാകുന്നു. ഇത് അവസാനിപ്പിക്കാനാണ് പുതിയ ഏജന്സി വേണമെന്ന നിര്ദേശം മുന്നോട്ടുവച്ചത്. സര്ക്കാര് തലത്തില് പുതിയ ഏജന്സിയെ കൊണ്ടുവരാനാണ് ശിപാര്ശ. സ്വകാര്യ ഏജന്സികളെ ഉള്പ്പെടുത്തുന്നതിനെ കുറിച്ചും ആലോചിക്കാമെന്നും നിര്ദേശിച്ചിട്ടുണ്ട്. നിലവില് പോലീസുകാര്ക്കെതിരെ ജനങ്ങളില് നിന്നും ഉയരുന്ന പരാതികള് അന്വേഷിക്കാന് പോലീസ് കംപ്ലയിന്റ് അതോറിറ്റിയുണ്ട്. എന്നാല് പോലീസ് കംപ്ലയിന്റ് അതോറിറ്റിക്ക് നടപടികള്ക്ക് ശിപാര്ശ ചെയ്യാന് മാത്രമാണ് അധികാരം. അതേസമയം പോലീസ് സേനയ്ക്കുള്ളിലെ കുറ്റകൃത്യങ്ങളും ക്രമക്കേടും അന്വേഷിക്കാന് അധികാരവും ഇല്ല. അന്വേഷണ ഏജന്സിക്ക് സ്വതന്ത്ര ചുമതല നല്കണമെന്ന നിര്ദേശവും സമിതി മുന്നോട്ട് വച്ചിട്ടുണ്ട്. ഇതിനുള്ള റിപ്പോര്ട്ടും ശിപാര്ശയുമാണ് സര്ക്കാരിലേക്ക് സമര്പ്പിച്ചിട്ടുള്ളത്. ഫയല് ഇപ്പോള് മുഖ്യമന്ത്രിയുടെ പരിഗണനയിലാണ്. മാത്രവുമല്ല മൊത്തത്തില് പൊളിച്ചെഴുതുകയാണ് മുഖ്യനും സര്ക്കാരും. സര്ക്കാര് ജീവനക്കാരുടെ സേവനം മെച്ചപ്പെടുത്താന് നിര്ണായക നടപടികളുമായി സര്ക്കാര്. സ്ഥാനക്കയറ്റം ജോലിയും കാര്യക്ഷമതയും വിലയിരുത്തി മാത്രമാകും. ഫയലുകള് വൈകിപ്പിച്ചാലും ജനങ്ങളോട് മോശമായി പെരുമാറിയാലും സ്ഥാനക്കയറ്റം തടയും. ഉദ്യോഗസ്ഥരുടെ പെരുമാറ്റം സര്വീസ് റൂളിന്റെ ഭാഗമാക്കി. ഭരണപരിഷ്കാര വകുപ്പിന്റെ ശുപാര്ശ സര്ക്കാര് അംഗീകരിച്ചു. മാറ്റങ്ങള് പ്രാബല്യത്തിലാക്കി സര്ക്കുലര് ഉടനിറങ്ങും. ഉദ്യോഗസ്ഥരുടെ സ്ഥാനക്കയറ്റ മാനദണ്ഡങ്ങള് അടിമുടി മാറ്റുകയാണ് സര്ക്കാര്.
ജോലിയും പ്രകടനവും കൃത്യമായി വിലയിരുത്താനാണ് തീരുമാനം. ഫയല് അകാരണമായി വച്ചു താമസിപ്പിക്കുക, ജനങ്ങളോടു മോശമായി പെരുമാറുക, ജോലിസമയത്ത് സീറ്റിലില്ലാതിരിക്കുക ഇവയെല്ലാം ഉദ്യോഗസ്ഥരുടെ പ്രകടനം വിലയിരുത്തുന്നതിനുള്ള മാനദണ്ഡങ്ങളില് ഉള്പ്പെടുത്തി. മേലുദ്യോഗസ്ഥരായിരിക്കും ഇക്കാര്യം പരിശോധിക്കുക. സര്ക്കാര് സര്വീസിലുള്ള ഉദ്യോഗസ്ഥരെ ഗസറ്റഡ്, നോണ്ഗസറ്റഡ് എന്ന് തിരിച്ച് സ്കോറിന്റെ അടിസ്ഥാനത്തിലായിരുന്നു ഇതുവരെ സ്ഥാനക്കയറ്റം നിശ്ചയിച്ചിരുന്നത്. ഗസറ്റഡ് ഓഫിസര്മാര്ക്ക് 13ഉം നോണ് ഗസറ്റഡ് ഓഫിസര്മാര്ക്ക് ഒമ്പതുമായിരുന്നു നേരത്തെയുള്ള സ്കോര്. ഇപ്പോഴത് രണ്ടുകൂട്ടര്ക്കും 20 മാര്ക്കായി. സര്ക്കാര് ഉദ്യോഗസ്ഥരുടെ പ്രകടനം മെച്ചപ്പെടുത്താനായി ഭരണപരിഷ്കാര വകുപ്പ് നല്കിയ നിര്ദേശം ചീഫ് സെക്രട്ടറി അംഗീകരിച്ച് സര്ക്കാരിനു കൈമാറിയിരുന്നു. സര്ക്കാരും അംഗീകരിച്ചതോടെയാണ് മാറ്റങ്ങള് നിലവില് വരുന്നത്. ഉദ്യോഗസ്ഥരുടെ മോശം പെരുമാറ്റത്തെകുറിച്ച് ജനം നല്കുന്ന പരാതികളുടെ എണ്ണത്തിലും വലിയ വര്ധനയുണ്ടായെന്നും കണക്കുകള് പറയുന്നു. പെരുമാറ്റവും സര്വീസ് റൂളിന്റെ ഭാഗമാക്കി മാറ്റിയതോടെ ഉദ്യോഗസ്ഥരുടെ പ്രകടനത്തിലും വലിയ മാറ്റം വരുമെന്നാണ് സര്ക്കാരിന്റെ പ്രതീക്ഷ.
https://www.facebook.com/Malayalivartha
