അമ്പൂരി പഞ്ചായത്തില്‍ ഇന്ന് ഹര്‍ത്താല്‍. രാവിലെ ആറ് മുതല്‍ വൈകിട്ട് ആറ് വരെയാണ് ഹര്‍ത്താല്‍. ജില്ലയിലെ നെയ്യാര്‍, പേപ്പാറ വന്യജീവി സങ്കേതങ്ങളുടെ ബഫര്‍സോണ്‍ പ്രഖ്യാപനത്തിനെതിരെയാണ് പാറശാല എംഎല്‍എ സി.കെ. ഹരീന്ദ്രന്‍ രക്ഷാധികാരിയായ അമ്പൂരി ആക്ഷന്‍ കൗണ്‍സില്‍ ഹര്‍ത്താലിന് ആഹ്വാനം നല്‍കിയിരിക്കുന്നത്.

ഹര്‍ത്താലിന് കോണ്‍ഗ്രസും പിന്തുണ നല്‍കുന്നുണ്ട്. ജനവാസ മേഖലകള്‍ സംരക്ഷിത മേഖലയില്‍ നിന്നും ഒഴിവാക്കണമെന്നാണ് പ്രതിഷേധക്കാരുടെ ആവശ്യം.

അതായത് കഴിഞ്ഞ് 25 നാണ് പേപ്പാറ, നെയ്യാര്‍ വന്യജീവി സങ്കേതങ്ങളുടെ ചുറ്റളവില്‍ 2.72 കിലോമീറ്റര്‍ വരെയുള്ള പ്രദേശം സംരക്ഷിത മേഖലയാക്കി കേന്ദ്രസര്‍ക്കാര്‍ കരട് വിജ്ഞാപനം പുറത്തിറക്കിയത്.

ജൈവവൈവിധ്യം, വംശനാശം സംഭവിക്കുന്ന മൃഗങ്ങളുടെ സാന്നിധ്യം, മേഖലയുടെ ഭൂമിശാസ്തരപരമായ പ്രത്യേകത തുടങ്ങി വിവിധ കാരണങ്ങള്‍ പരിഗണിച്ചാണ് പേപ്പാറ, നെയ്യാര്‍ വന്യജീവി സങ്കേതങ്ങള്‍ക്ക് ചുറ്റുമുള്ള പ്രദേശം സംരക്ഷിത വനമേഖലയായി പ്രഖ്യാപിക്കുന്നത്. നാല് പഞ്ചായത്തുകളിലെ ജനവാസപ്രദേശങ്ങളും നിര്‍ദ്ദിഷ്ട സംരക്ഷിത വനമേഖലയില്‍ ഉള്‍പ്പെടും. ജനവാസപ്രദേശങ്ങളെ ഒഴിവാക്കണമെന്നാണ് പഞ്ചായത്തുകള്‍ ആവശ്യപ്പെടുന്നത്.

തടിയുമായി ബന്ധപ്പെട്ട വ്യവസായങ്ങള്‍, ചൂളകള്‍, ജലവൈദ്യുതി പദ്ധതികള്‍, വന്‍കിട ഫാമുകള്‍, വിറകിന്റെ വ്യാവസായിക ഉപയോഗം, സ്ഫോടക വസ്തുക്കളുടെ സംഭരണം, എന്നിവയും അനുവദിക്കില്ല. അനുവാദമില്ലാതെ മരം മുറിക്കാനാകില്ല. ഒരു കിലോമീറ്റര്‍ ചുറ്റളവില്‍ പുതിയ ഹോട്ടലുകളോ റിസോര്‍ട്ടുകളോ അനുവദിക്കില്ല. വീട് നിര്‍മ്മാണവും റോഡ് വികസനവും അനുവദിക്കും. പരിസ്ഥിതി സൗഹൃദ ടൂറിസം പ്രവര്‍ത്തനങ്ങള്‍ക്ക് അനുമതിയുണ്ടാകും.

കരട് വിജ്ഞാപനം അനുസരിച്ച് അമ്പൂരി, വിതുര, കള്ളിക്കാട്, ആര്യനാട് പഞ്ചായത്തുകളുടെ പ്രദേശങ്ങള്‍ സംരക്ഷിത മേഖലയില്‍ ഉള്‍പ്പെടും. അമ്പൂരി പഞ്ചായത്തിന്റെ ഒന്‍പത് വാര്‍ഡുകളാണ് സംരക്ഷിത മേഖലയിലുള്‍പ്പെടുന്നത്.


അതേസമയം പഞ്ചായത്തുകളുടെ പ്രശ്നം ചര്‍ച്ച ചെയ്യാനായി വനംമന്ത്രി സി കെ ശശീന്ദ്രന്‍ വെള്ളിയാഴ്ച യോഗം വിളിച്ചിട്ടുണ്ട്. ഉദ്യോഗസ്ഥരും ജനപ്രതിനിധികളടക്കം യോഗത്തില്‍ പങ്കെടുത്തേക്കും.