സാധാരണ പൊതുവിദ്യാലയങ്ങളിലെത്തുന്ന കുട്ടികളുടെ എണ്ണം കൂടി വരുന്നതാണ് കഴിഞ്ഞ കുറെ വ‍ർഷങ്ങളായി കാണുന്നത്. എന്നാൽ ഇത്തവണ അതിന് മാറ്റം സംഭവിച്ചിരിക്കുന്നു. ഈ വർഷം ഒന്നാംക്ലാസിൽ 45,573 കുട്ടികളുടെ കുറവാണ് വന്നത്.

വിദ്യാഭ്യാസ മന്ത്രി വി ശിവന്‍കുട്ടിയാണ് ഇത് നിയമസഭയെ അറിയിച്ചത്. ഈ വർഷം സർക്കാർ, എയ്ഡഡ്, അൺഎയ്ഡഡ് സ്കൂളുകളിൽ ഒരുപോലെ കുറവുണ്ട്. ആറാം പ്രവർത്തിദിനത്തിലെ കണക്ക് പ്രകാരം ഒന്നാം ക്ലാസിൽ പ്രവേശനം നേടിയ ആകെ കുട്ടികളുടെ എണ്ണം 3,03,168 ആണ്. ഇതിൽ സർക്കാർ സ്കൂളുകളിൽ 15,380, എയ്ഡഡ് സ്കൂളുകളിൽ 22,142 കുട്ടികളുടെ കുറവാണുള്ളത്.

അംഗീകൃത അൺ എയ്ഡഡ് സ്കൂളുകളിൽ 8051 കുട്ടികൾ കുറഞ്ഞതായും മന്ത്രി വി. ശിവൻകുട്ടി നിയമസഭയെ അറിയിച്ചു. അതേസമയം അൺ എയ്ഡഡ് സ്കൂളുകളിൽ ഉൾപ്പെടെ മുൻവർഷം ഒന്നാംക്ലാസിൽ പ്രവേശനം നേടിയത് 3,48,741 കുട്ടികളായിരുന്നെങ്കിൽ ഇന്നത് 3,03,168 ആയി കുറഞ്ഞു. കോവിഡിനുശേഷം കുട്ടികൾ ഇതര സിലബസുകളിലേക്കു ചേക്കേറിയതും എണ്ണം കുറയാൻ കാരണമായതായി കരുതുന്നു.

എന്നാൽ അതേസമയം രണ്ട് മുതൽ പത്ത് വരെയുള്ള ക്ലാസുകളിലെ കുട്ടികളുടെ ഏണ്ണം കൂടി. ഒന്നുമുതൽ 10 വരെയുള്ള ക്ലാസുകളിൽ മുൻവർഷത്തെ അപേക്ഷിച്ച് 45,519 പേരുടെ കുറവുണ്ട്. മാത്രമല്ല ഇതിൽ പത്തോ അതിൽ കുറവോ കുട്ടികൾ പഠിക്കുന്ന 40 സർക്കാർ സ്കൂളുകളും 109 എയ്ഡഡ് സ്കൂളുകളുമുണ്ടെന്നും മന്ത്രി അറിയിച്ചു.

സാധാരണയായി അഞ്ചും എട്ടും ക്ലാസുകളിലാണ് അൺ എയ്ഡഡ് സ്കൂളുകളിൽനിന്ന് കൂടുതൽ കുട്ടികൾ സർക്കാർ, എയ്ഡഡ് സ്കൂളുകളിലേക്ക് എത്താറുള്ളതെങ്കിൽ ഇന്ന് സർക്കാർ സ്കൂളുകളിൽ അഞ്ചാംക്ലാസിൽ 7134 കുട്ടികളുടെ കുറവ്‌ വന്നിട്ടുണ്ട്. എയ്ഡഡ് സ്കൂളുകളിൽ പത്താംക്ലാസിൽ 669 കുട്ടികൾ കുറഞ്ഞു.