ചില കാര്യങ്ങള്‍ ചില സമയത്ത് ഫലിക്കുമെന്ന് കേട്ടിട്ടില്ലേ. അത് ചിലപ്പോള്‍ സ്വാഭാവികമായി സംഭവിച്ചതാകാം. എങ്കിലും താന്‍ പറഞ്ഞത് കൊണ്ടാണ് അത് സംഭവിച്ചതെന്ന് പറയുമ്പോഴാണ് അതിനെ ദിവ്യദൃഷ്ടി എന്ന് പറയുന്നത്. പുരാണങ്ങളിലെ ദുര്‍വാശാവിന് ശേഷം പിസി ജോര്‍ജിന്റെ ഭാര്യ ഉഷ ജോര്‍ജ് പറഞ്ഞത് ഫലിച്ചെന്നാണ് സോഷ്യല്‍ മീഡിയ കണ്ടെത്തുന്നത്. ആ ക്രെഡിറ്റ് നിറഞ്ഞ മനസോടെ സ്വീകരിക്കുകയാണ് ഉഷ ജോര്‍ജ്.

സജി ചെറിയാന്‍ മന്ത്രിസ്ഥാനം രാജിവച്ചതിനു പിന്നാലെ സമൂഹമാധ്യമങ്ങളില്‍ വൈറലായ തന്റെ 'ശാപവാക്കു'കളെക്കുറിച്ച് പ്രതികരിച്ച് മുന്‍ എംഎല്‍എ പി.സി.ജോര്‍ജിന്റെ ഭാര്യ ഉഷ ജോര്‍ജ് രംഗത്തെത്തി. ഉഷയുടെ ശാപമാണ് സജി ചെറിയാന്റെ രാജിക്കു കാരണമെന്ന മട്ടിലാണ് സമൂഹമാധ്യമങ്ങളിലാകെ ചര്‍ച്ചകള്‍ നടന്നത്. സോളര്‍ കേസ് പ്രതിയുടെ പീഡനപരാതിയില്‍ പി.സി.ജോര്‍ജിനെ പൊലീസ് അപ്രതീക്ഷിതമായി അറസ്റ്റ് ചെയ്തതിനു പിന്നാലെയാണ് പിണറായി വിജയനെതിരെ രൂക്ഷവിമര്‍ശനം ഉന്നയിച്ചത്.

'എന്റെ കൊന്തയ്ക്ക് സത്യം ഉണ്ടെങ്കില്‍ ഈ ചെയ്തതിന് പിണറായി അനുഭവിക്കു'മെന്നായിരുന്നു ഉഷയുടെ വാക്കുകള്‍. മുഖ്യമന്ത്രിയെ വെടിവച്ചു കൊല്ലാനുള്ള ദേഷ്യമുണ്ടെന്നും അവര്‍ പ്രതികരിച്ചിരുന്നു. ഈ പരാമര്‍ശം നടത്തി ഏതാനും ദിവസങ്ങള്‍ക്കുള്ളില്‍ രണ്ടാം പിണറായി വിജയന്‍ സര്‍ക്കാരിലെ ആദ്യ രാജിയെന്ന നിലയില്‍ സജി ചെറിയാന് മന്ത്രിസ്ഥാനം നഷ്ടമായതോടെയാണ് ഉഷയുടെ വാക്കുകള്‍ സമൂഹമാധ്യമങ്ങളില്‍ വൈറലായത്.

ഈ സാഹചര്യത്തില്‍ തന്റെ പരാമര്‍ശത്തെക്കുറിച്ചും അതുമായി ബന്ധപ്പെട്ട ട്രോളുകളെക്കുറിച്ചും ഉഷ പ്രതികരിച്ചു. മുഖ്യമന്ത്രിയെക്കുറിച്ച് അങ്ങനെ പറയേണ്ടിവന്നതില്‍ മാത്രം വിഷമമുണ്ടെന്ന് ഉഷ ജോര്‍ജ് വ്യക്തമാക്കി.

''കഴിഞ്ഞ ദിവസങ്ങളില്‍ വന്ന ട്രോളുകളൊക്കെ കണ്ടു. വിഷമമുണ്ടാക്കിയത് മാതാവിന്റെ കൊന്തയെക്കുറിച്ചുള്ള ട്രോളുകളാണ്. മുഖ്യമന്ത്രിയെക്കുറിച്ച് പറഞ്ഞ വാക്കുകള്‍ ആ നിമിഷം വന്നുപോയതാണ്. ഒന്നും സംഭവിക്കണം എന്നു വിചാരിച്ച് പറഞ്ഞതല്ല. പക്ഷേ അത് ഏറ്റു. എല്ലാവരും പറയുന്നു, ചേച്ചിയുടെ പ്രാര്‍ഥനയാണ് എന്ന്'' ഉഷ ജോര്‍ജ് പറഞ്ഞു.

''പി.സി.ജോര്‍ജിനെ തകര്‍ക്കാനാണ് ഇല്ലാത്ത കാര്യങ്ങള്‍ പറഞ്ഞുണ്ടാക്കുന്നത്. അദ്ദേഹം തകര്‍ന്നു പോകാതിരിക്കാനാണ് ഞങ്ങള്‍ കൊന്തയില്‍ മുറുകെപ്പിടിച്ചിരിക്കുന്നത്' ഉഷ പറഞ്ഞു. നേരത്തെ, പീഡനപരാതിയില്‍ പി.സി.ജോര്‍ജിനെ അറസ്റ്റ് ചെയ്തതിനു പിന്നില്‍ മുഖ്യമന്ത്രി പിണറായി വിജയനാണെന്ന് ആരോപിച്ച് ഉഷ ജോര്‍ജ് രംഗത്തെത്തിയിരുന്നു. രാഷ്ട്രീയ വൈരാഗ്യമാണിത്. ഒരു കുടുംബത്തെ ഇങ്ങനെ വേട്ടയാടുന്നതു ശരിയാണോ? പി.സി.ജോര്‍ജിന് ആത്മാര്‍ഥത കൂടിയതാണു പ്രശ്‌നം. പരാതിക്കാരി വീട്ടില്‍ വന്നിട്ടുണ്ട്. ഞാന്‍ സംസാരിച്ചിട്ടുണ്ട്.

സാക്ഷിയാക്കാമെന്നു പറഞ്ഞാണു വിളിച്ചുകൊണ്ടു പോയത്. അറസ്റ്റിനെക്കുറിച്ച് സൂചന ഇല്ലായിരുന്നു. പിണറായിയുടെ പ്രശ്‌നങ്ങള്‍ പുറത്തു വരാതിരിക്കാനാണ് ജോര്‍ജിനെ അറസ്റ്റ് ചെയ്തത്. മുഖ്യമന്ത്രിയെ വെടിവച്ചു കൊല്ലാനുള്ള ദേഷ്യമുണ്ട്. ഒരു കുടുംബം തകര്‍ക്കുന്ന പണിയാണു ചെയ്തത്. എന്റെ കൊന്തയ്ക്ക് സത്യം ഉണ്ടെങ്കില്‍ ഈ ചെയ്തതിന് പിണറായി അനുഭവിക്കും' ഇതായിരുന്നു അന്ന് ഉഷയുടെ പ്രതികരണം.

രണ്ടാം പിണറായി സര്‍ക്കാരിലെ ആദ്യ രാജി സജി ചെറിയാനിലൂടെ സംഭവിച്ചതോടെയാണ് ചേച്ചിയുടെ ശാപം സോഷ്യല്‍ മീഡിയ ഏറ്റെടുത്തത്. ഭരണഘടനയെ അവഹേളിച്ചതിലൂടെയാണ് മന്ത്രിസ്ഥാനം അദ്ദേഹത്തിന് നഷ്ടമായത്. എന്നാല്‍ ഇപ്പോള്‍ സോഷ്യല്‍ മീഡിയ ഈ രാജിക്ക് കാരണം കണ്ടെത്തിയിരിക്കുകയാണ്. പിസി ജോര്‍ജിന്റെ ഭാര്യ ഉഷ ജോര്‍ജിന്റെ ഉഗ്രശാപമാണ് പിണറായി സര്‍ക്കാരിന്റെ ആദ്യത്തെ തിരിച്ചടിക്ക് കാരണമെന്നാണ് സോഷ്യല്‍ മീഡിയയുടെ കണ്ടെത്തല്‍.

 "