ആശങ്കയോടെ ജനങ്ങള്‍.... നിലമ്പൂരില്‍ ഇരുപതോളം പേരെ കടിച്ച തെരുവു നായയ്ക്ക് പേവിഷ ബാധ സ്ഥിരീകരിച്ചു. നാട്ടുകാരെ ആക്രമിച്ച നായ നിരീക്ഷണത്തിലിരിക്കെ ചത്തിരുന്നു.

ഇതിന് പിന്നാലെ നടത്തിയ പരിശോധനയിലാണ് പേവിഷബാധ സ്ഥിരീകരിച്ചത്. ഇതോടെ നാട്ടുകാര്‍ക്കിടയില്‍ ആശങ്ക ശക്തമായിരിക്കുകയാണ്. ആളുകള്‍ക്ക് പുറമെ നിരവധി മൃഗങ്ങളേയും ഈ നായ ആക്രമിച്ചു.

പ്രദേശത്ത് പരാക്രമം കാണിച്ച് നായയെ ഇആര്‍എഫ് ടീം എത്തിയാണ് പിടികൂടിയത്. മൃഗസംരക്ഷണ വകുപ്പിന്റെ നിരീക്ഷണത്തിലിരിക്കെയാണ് നായ ചത്തത്.

നിലമ്പൂരിന്റെ വിവിധ ഭാഗങ്ങളില്‍ നിന്നായി ഇരുപതോളം പേരെ നായ കടിച്ചതായാണ് ഇതുവരെ വിവരം ലഭിച്ചിരിക്കുന്നത്. അക്രമസ്വഭാവം കാണിച്ചു നടന്നിരുന്ന നായയെ ഒരു ദിവസത്തെ പരിശ്രമത്തിനൊടുവിലാണ് പിടികൂടാനായത്. അതേസമയം നായയുമായി സമ്പര്‍ക്കം പുലര്‍ത്തിയ മുഴുവന്‍ നായകളേയും പിടികൂടി വാക്സിനേഷന്‍ നല്‍കും.