എയര്‍ഹോണുകള്‍ വാഹനങ്ങളില്‍ ഘടിപ്പിക്കുന്നത് പോലും നിരോധിച്ചിട്ടുള്ളതാണെന്ന് മോട്ടോര്‍ വാഹന വകുപ്പ്. എയര്‍ ഹോണുകളുടെ ഉപയോഗം വാഹനത്തിന്റെ സുരക്ഷയേയും പൊതു സമൂഹത്തിന്റെ കേള്‍വി ശക്തിയേയും ബാധിക്കുമെന്നും എംവിഡി അറിയിച്ചു. കഴിഞ്ഞ ദിവസം സാമൂഹിക മാധ്യമങ്ങളില്‍ പ്രചരിച്ച വീഡിയോ പങ്കുവെച്ചുകൊണ്ടായിരുന്നു എംവിഡിയുടെ മുന്നറിയിപ്പ്.


ഹോണിനെ പ്രണയിച്ച പെണ്‍കുട്ടി എന്ന പേരില്‍ കഴിഞ്ഞ ദിവസം പ്രചരിച്ച വീഡിയോയാണ് എംവിഡിയുടെ മുന്നറിയിപ്പിന് ആധാരമായുള്ളത്. കാറില്‍ യാത്ര ചെയ്യുന്ന പെണ്‍കുട്ടി തങ്ങളെ ഓവര്‍ ടേക്ക് ചെയ്തു പോകുന്ന ടിപ്പര്‍ ലോറി ഡ്രൈവറോട് ഹോണ്‍ അടിക്കാന്‍ ആവശ്യപ്പെടുകയും പല ട്യൂണുകളില്‍ ടിപ്പര്‍ ഡ്രൈവര്‍ ഹോണ്‍ അടിക്കുന്നതും വീഡിയയോയിലുണ്ട്.

തുടര്‍ന്ന് എംവിഡി ഈ ടിപ്പര്‍ കസ്റ്റഡിയില്‍ എടുത്തിരുന്നു. ഫേസ്ബുക്കിലാണ് മോട്ടാര്‍ വാഹന വകുപ്പ് കുറിപ്പ് പങ്കുവെച്ചിട്ടുള്ളത്.

മോട്ടോര്‍ വാഹന വകുപ്പിന്റെ മുന്നറിയിപ്പ്:

കഴിഞ്ഞ ദിവസങ്ങളില്‍ കൂടുതല്‍ ആളുകള്‍ കണ്ട ഒരു വീഡിയോ ആണ് തുടക്കം. ഹോണിനെ പ്രണയിച്ച പെണ്‍കുട്ടി എന്ന തലക്കെട്ടില്‍ ചില മാധ്യമങ്ങള്‍ ഇതിന് പ്രചാരം നല്‍കിയിരുന്നു. എന്നാല്‍ യഥാര്‍ത്ഥത്തില്‍ ഹോണിനെ പ്രണയിക്കാന്‍ സാധിക്കുമോ? അതും എയര്‍ ഹോണിനെ !
വാഹനങ്ങളില്‍ അനുവദനീയമായ ഹോണുകളുടെ ഡെസിബല്‍ റേഞ്ചിനേക്കാള്‍ വളരെ ഡെസിബല്‍ കൂടിയ ഇവയുടെ ശബ്ദം കേള്‍വി ശക്തിയെ വളരെ ദോഷകരമായി ബാധിക്കുന്ന ഒന്നാണ്.

വളരെ സമീപത്തായി കൂടുതല്‍ നേരം കേള്‍ക്കുകയാണെങ്കില്‍ അത് കേള്‍വി ശക്തി തന്നെ ഇല്ലാതാക്കും. വലിയ വാഹനങ്ങളിലാണ് ഇതിന്റെ ഉപയോഗം കൂടുതല്‍ കണ്ടുവരുന്നത്. മോട്ടോര്‍ സൈക്കിള്‍ പോലുള്ള ചെറിയ വാഹനങ്ങളുടെ ശ്രദ്ധ കിട്ടാന്‍ വേണ്ടിയാണ് എന്നതാണ് ഇതുപയോഗിക്കുന്നവരുടെ വാദം.

എന്നാല്‍ ഇവയുടെ ഉപയോഗം വഴി താന്‍ ഉള്‍പ്പെടുന്ന പൊതുസമൂഹത്തിന്റെ കേള്‍വി ശക്തിയും , ശ്രദ്ധയും തന്നെയാണ് ഇല്ലാതാക്കുന്നത് എന്ന് ഇവര്‍ മനസ്സിലാക്കുന്നില്ല എന്നതാണ് സത്യം.

വലിയ വാഹനങ്ങളില്‍ ഇവയുടെ ഉപയോഗം ബ്രേക്ക് സിസ്റ്റത്തിലെ എയര്‍ ബൈപാസ് ചെയ്താണ്. ഇത് വാഹനത്തിന്റെ സുരക്ഷയെ ബാധിക്കുന്ന വിഷയമാണ് എന്ന് പറയേണ്ടതില്ലല്ലോ ! കൂടാതെ ഇവ വാഹനങ്ങളില്‍ ഘടിപ്പിക്കുന്നത് പോലും നിയമം മൂലം നിരോധിച്ചിട്ടുള്ളതാണ്...അപ്പൊള്‍ പിന്നെ ഇവയുടെ ഉപയോഗത്തെ കുറിച്ച് ചോദിക്കേണ്ട കാര്യമില്ലല്ലോ..