സിപിഎം മുൻ സംസ്ഥാന സെക്രട്ടറി കോടിയേരി ബാലകൃഷ്ണന്റെ മൃതദേഹം തലശ്ശേരി ടൗൺ ഹാളിൽ എത്തിച്ചപ്പോൾ വികാര നിർഭരമായ കാഴ്ച്ചകളാണ് അരങ്ങേറിയത്. പ്രിയതമന്റെ നിശ്ചലമായ ശരീരത്തിന്റെ അരികിൽ നിന്ന് പൊട്ടി കരഞ്ഞ് ഭാര്യ വിനോദിനി. കോടിയേരിയുടെ മുഖത്തേക്കു നോക്കി വാവിട്ടു കരയുകയായിരുന്നു വിനോദിനി.

അമ്മയെ ആശ്വസിപ്പിക്കാൻ മകൻ ബിനീഷ് കോടിയേരി അരികിൽ ഉണ്ടായിരുന്നു. മുൻ മന്ത്രിമാരായ പി.കെ.ശ്രീമതിയും കെ.കെ.ശൈലജയും ചേർന്നായിരുന്നു വിനോദിനിയെ സാന്ത്വനിപ്പിച്ചത്. മകൻ ബിനീഷ് കോടിയേരി അമ്മയെ ചേർത്തു പിടിക്കുകയും ചെയ്തു. കരഞ്ഞുകരഞ്ഞ് തളർന്നുവീണ വിനോദിനിയെ ബിനീഷും മറ്റുള്ളവരും ചേർന്ന് താങ്ങിപ്പിടിച്ചാണു കൊണ്ടുപോയത്. വിനോദിനിയുടെ കരച്ചിൽ കണ്ടുനിന്നവരുടെയെല്ലാം ഉള്ളുലച്ചു.

ഉച്ച കഴിഞ്ഞു മൂന്നര മണിയോടെ കോടിയേരിയുടെ മൃതദേഹവുമായി വിലാപയാത്ര തലശ്ശേരിയില്‍ എത്തുകയായിരുന്നു. മുഖ്യമന്ത്രി പിണറായി വിജയനും മറ്റു നേതാക്കളും അന്ത്യാഞ്ജലി അർപ്പിക്കുകയുണ്ടായി. നാളെ രാവിലെ കണ്ണൂര്‍ ജില്ലാ കമ്മിറ്റി ഓഫിസിലും പൊതുദര്‍ശനത്തിന് വയ്ക്കുവാനിരിക്കുകയാണ് . തിങ്കളാഴ്ച വൈകിട്ട് മൂന്നിനു ആണ് സംസ്കാരം. പയ്യാമ്പലത്ത് പൂര്‍ണ ഔദ്യോഗിക ബഹുമതികളോടെ സംസ്കാരം നടത്തും.