കുറ്റബോധം ലവലേശം പോലും പ്രകടിപ്പിക്കാതെ... ചെയ്ത കൃത്യത്തില്‍ കുറ്റബോധം ലവലേശം പോലും പ്രകടിപ്പിക്കാതെ... ഊരൂട്ടമ്പലം ഇരട്ടക്കൊലപാതക കേസിലെ പ്രതി മാഹിന്‍ കണ്ണുമായി അന്വേഷണ സംഘം തമിഴ്‌നാട്ടിലെത്തി തെളിവെടുത്തു....

എങ്ങനെയാണ് കൊല നടത്തിയതെന്ന ക്രൈംബ്രാഞ്ച് ഡിവൈ.എസ്. പി ജോണ്‍സണിന്റെ ചോദ്യത്തിന് 'സാറിനെ തള്ളിയിട്ട് കാണിക്കണോ' എന്നായിരുന്നു മാഹിന്‍ കണ്ണ് മറുപടി നല്‍കിയത്.

കന്യാകുമാരി ജില്ലയിലെ വള്ളവിളയ്ക്കടുത്ത് ആളിലാത്തുറ എന്ന സ്ഥലത്താണ് തെളിവെടുപ്പ് നടത്തിയത്. ചെയ്ത കൃത്യത്തില്‍ കുറ്റബോധം ലവലേശം പോലും പ്രകടിപ്പിക്കാതെയായിരുന്നു പ്രതിയുടെ ചേഷ്ടകള്‍ മുഴുവനും.


ഊരൂട്ടമ്പലം സ്വദേശിനി ദിവ്യയെയും (23), മകള്‍ ഗൗരിയെയും (2) കടലിലേക്ക് തള്ളിയിട്ട് കൊലപ്പെടുത്തിയതെങ്ങനെയാണെന്ന് മാഹിന്‍കണ്ണ് കാണിച്ചു കൊടുത്തു.2011 ഓഗസ്റ്റ് 18ന് രാത്രി 9 മണിയോടെയാണ് കൃത്യം ചെയ്തതെന്ന് മൊഴി നല്‍കി.

ജില്ലാ ക്രൈംബ്രാഞ്ച് ഡിവൈ.എസ്. പി ജോണ്‍സണിന്റെ നേതൃത്വത്തിലുള്ള സംഘമാണ് ഉച്ചയ്ക്ക് പന്ത്രണ്ടോടെ പ്രതിയുമായെത്തിയത്. ഊരൂട്ടമ്പലത്തെ വീട്ടില്‍ നിന്നാണ് ദിവ്യയെയും മകളെയും ആളില്ലാത്തുറയിലെത്തിച്ചത് ആളൊഴിഞ്ഞ തീരത്തുവച്ച് ഇരുവര്‍ക്കിമിടയില്‍ തര്‍ക്കമുണ്ടായി.

പ്രകോപിതനായ പ്രതി ദിവ്യയെ ആദ്യം കടലിലേക്ക് തള്ളിയിട്ടു. പിന്നാലെ കുഞ്ഞിനെ എടുത്തെറിഞ്ഞു. ഇരുവരും കടലില്‍ മുങ്ങിയെന്ന് ഉറപ്പാക്കിയ ശേഷമാണ് മാഹീന്‍ തിരികെ പോയത്.

തെളിവെടുപ്പിന് ശേഷം വൈകുന്നേരം ആറോടെ പൊലീസ് സംഘം പ്രതിയുമായി മടങ്ങി. മാഹിന്‍ കണ്ണിനെ 13ന് കോടതിയില്‍ ഹാജരാക്കും.