ഇടുക്കി പൂപ്പാറയില്‍ നിയന്ത്രണം വിട്ട വാഹനം കൊക്കയിലേക്ക് മറിഞ്ഞ് നാലു മരണം. തിരുനെല്‍വേലി സ്വദേശികളായ സി പെരുമാള്‍ (59), വള്ളിയമ്മ (70), സുശീന്ദ്രന്‍ (8) എന്നിവരാണ് മരിച്ചത്. തമിഴ്‌നാട് തിരുനെല്‍വേലി സ്വദേശികള്‍ സഞ്ചരിച്ച വാഹനമാണ് അപകടത്തില്‍പ്പെട്ടത്. പരിക്കേറ്റവരെ രാജാക്കാട്, രാജകുമാരി എന്നിവിടങ്ങളിലെ ആശുപത്രികളില്‍ പ്രവേശിപ്പിച്ചുവെന്നാണ് സൂചനകള്‍.


ഇവരെ നാട്ടുകാരും ഇതുവഴി വന്ന യാത്രക്കാരും ചേര്‍ന്നാണ് രക്ഷാപ്രവര്‍ത്തനം നടത്തിയത്. സാരമായി പരിക്കേറ്റവരെ പ്രാഥമിക ശുശ്രൂഷ നല്‍കിയ ശേഷം തേനി മെഡിക്കല്‍ കോളേജ് ആശുപത്രിയിലേക്ക് മാറ്റി. തിരുനെല്‍വേലി സ്വദേശികളായതിനാലാണ് ഇവരെ തേനിയിലേക്ക് മാറ്റുന്നത്.


മൂന്നാറില്‍ വിവാഹത്തില്‍ പങ്കെടുക്കാനെത്തിയവരാണ് ഇവരെന്നാണ് വിവരം. മടക്കയാത്രയിലാണ് അപകടം സംഭവിച്ചത്. വാനില്‍ 20 യാത്രക്കാര്‍ ഉണ്ടായിരുന്നു. ഇവരില്‍ പതിനാറു പേര്‍ക്കാണ് പരിക്കേറ്റതെന്നാണ് ലഭ്യമായ വിവരം. വൈകുന്നേരം ആറരയോടെയാണ് അപകടം ഉണ്ടായത്.


പൂപ്പാറയ്ക്കും തോണ്ടിമലയ്ക്കും ഇടയിലായാണ് അപകടം . എസ് വളവില്‍ വെച്ചാണ് അപകടം നടന്നത്. തോണ്ടിമല ഇറച്ചില്‍ പാലത്തിന് സമീപത്തായിരുന്നു അപകടം നടന്നത്.