അത് ഒന്നൊന്നര വരവാകും... റബറിന് 300 രൂപയാക്കൂ ഒരു എം പി പോലുമില്ലെന്ന വിഷമം ഈ കുടിയേറ്റ ജനത മാറ്റിത്തരാം; ആര്ച്ച് ബിഷപ്പ് ജോസഫ് പാംപ്ളാനിയ്ക്ക് പിന്നാലെ ജോസ് കെ മാണി; മോദി കേരളത്തില് എത്തുമ്പോള് റബറിന്റെ താങ്ങുവില 250 രൂപയാക്കി പ്രഖ്യാപനം നടത്തണം
പ്രധാനമന്ത്രി കേരളത്തിലെത്തുമ്പോള് റബര് കര്ഷകര് ഏറെ ആവേശത്തിലാണ്. റബറിന് 300 രൂപയാക്കൂ ഒരു എം പി പോലുമില്ലെന്ന വിഷമം ഈ കുടിയേറ്റ ജനത മാറ്റിത്തരാം എന്നാണ് ആര്ച്ച് ബിഷപ്പ് ജോസഫ് പാംപ്ളാനി പറഞ്ഞത്. അതേറെ ചര്ച്ചയായി. ആര്ച്ച് ബിഷപ്പിന് പിന്നാലെ ജോസ് കെ മാണിയും രംഗത്തെത്തിയിരിക്കുകയാണ്.
രാജ്യത്തെ സ്വാഭാവിക റബര് ഉല്പാദനത്തിന്റെ 95 ശതമാനവും നടക്കുന്ന കേരളത്തില് പ്രധാനമന്ത്രി എത്തുമ്പോള് സ്വാഭാവിക റബറിന്റെ താങ്ങുവില 250 രൂപയാക്കിക്കൊണ്ടുളള പ്രഖ്യാപനം നടത്തണമെന്നാണ് കേരളാ കോണ്ഗ്രസ് (എം) ചെയര്മാന് ജോസ് കെ മാണി ആവശ്യപ്പെട്ടത്. റബര്തോട്ടങ്ങളില് ഉത്പാദിപ്പിക്കുന്ന മുഴുവന് സ്വാഭാവിക റബറും കേന്ദ്രസര്ക്കാര് നേരിട്ട് സംഭരിച്ച് വ്യാവസായിക ആവശ്യക്കാര്ക്കായി നല്കുന്ന സമ്പ്രദായം നിയമാനുസൃതം നടപ്പാക്കണം.
കേന്ദ്രസര്ക്കാര് കുത്തക സംഭരണത്തിലൂടെ കര്ഷകരില് നിന്നും നേരിട്ട് വാങ്ങുന്ന സ്വാഭാവിക റബര് വാങ്ങിയിട്ടേ ടയര് വ്യവസായികളെയും ഇതര ഉത്പാദകരെയും റബറും സിന്തറ്റിക് റബറും ഇറക്കുമതി ചെയ്യാന് അനുവദിക്കാവൂ. ഈ നയം കേന്ദ്ര സര്ക്കാര് നയപരമായി നടപ്പാക്കിയാല് മാത്രമേ റബര് കര്ഷകര്ക്ക് ന്യായവില ലഭിക്കു. കേന്ദ്രസര്ക്കാര് നയങ്ങളാണ് റബര് വിലയെ സ്വാധീനിക്കുന്നത്.
ഉത്തരേന്ത്യന് നാണ്യവിളകളായ ചണവും പരുത്തിയും കാര്ഷിക വിളകളുടെ പട്ടികയിലുള്പ്പെടുത്തിയിട്ടും റബറിനെ കേന്ദ്ര സര്ക്കാര് അവഗണിച്ചു. കേന്ദ്ര സര്ക്കാര് നിയോഗിച്ച ടാസ്ക് ഫോഴ്സ് ശുപാര്ശ ചെയ്തിട്ടും റബര് കാര്ഷിക വിളയായി പ്രഖ്യാപിച്ചില്ല. ഇതുമൂലം കൃഷിക്കാര്ക്ക് ലഭിക്കുന്ന നിരവധി ആനുകൂല്യങ്ങള് റബര് കര്ഷകര്ക്ക് നിഷേധിക്കപ്പെട്ടിരിക്കുകയാണ്.
ഇറക്കുമതി ചുങ്കത്തിലൂടെ കേന്ദ്ര സര്ക്കാരിന് ലഭിച്ച 2000 കോടി രൂപയോളം വരുന്ന വരുമാനത്തില്നിന്നും 1000 കോടി രൂപ നല്കിയാല് റബര് വിലസ്ഥിരതാ ഫണ്ടിലേക്ക് കേരള സര്ക്കാര് പ്രഖ്യാപിച്ച തുകയും ചേര്ത്ത് റബറിന്റെ താങ്ങുവില കിലോക്ക് 250 രൂപയാക്കി ഉയര്ത്താനാവും. കേരളത്തിലെ റബര് കര്ഷകരെ സഹായിക്കാന് കഴിയുന്ന ഇക്കാര്യം രാഷ്ട്രീയ ലക്ഷ്യങ്ങള് ഒഴിവാക്കിയാല് നിസ്സാരമായി പ്രധാനമന്ത്രിക്ക് ചെയ്യാന് കഴിയുന്നതാണെന്നും ജോസ് കെ മാണി ചൂണ്ടിക്കാട്ടി.
റബറിന്റെ വില മുന്നൂറു രൂപയായി കേന്ദ്രസര്ക്കാര് പ്രഖ്യാപിക്കുകയാണെങ്കില് തിരഞ്ഞെടുപ്പില് ബി ജെ പിയെ സഹായിക്കുമെന്ന് തലശേരി രൂപത ആര്ച്ച് ബിഷപ്പ് ജോസഫ് പാംപ്ളാനി പറഞ്ഞത് ഏറെ ചര്ച്ചയായിരുന്നു. ബി ജെ പി നേതാക്കളെ കണ്ടതിന് ശേഷമാണ് പാംപ്ളാനി പറഞ്ഞതെന്ന് വ്യക്തമായി. ബിഷപ്പ് ഹൗസിലെത്തി ബി ജെ പി നേതാക്കള് പാംപ്ളാനിയെ കണ്ടിരുന്നു. തുടര്ന്നാണ് ബി ജെ പിയ്ക്ക് വോട്ട് നല്കുമെന്ന് ബിഷപ്പ് പ്രസ്താവന നടത്തിയത്.
പ്രസ്താവനയ്ക്ക് രണ്ടുദിവസം മുന്പ് ബിഷപ്പിനെ കണ്ടതായി ബി ജെ പി ജില്ലാ പ്രസിഡന്റും ന്യൂനപക്ഷമോര്ച്ച ഭാരവാഹികളും അടക്കമുള്ളവര് സ്ഥിരീകരിച്ചു. സാധാരണ സന്ദര്ശനത്തിന്റെ ഭാഗമായാണ് കണ്ടതെന്നും ഇതിനിടെ കര്ഷകരുടെയും കുടിയേറ്റക്കാരുടെയും പ്രതിസന്ധികളെക്കുറിച്ച് ചര്ച്ച ചെയ്തുവെന്നും നേതാക്കള് പറയുന്നു. ഇന്നലെ ബിഷപ്പിന്റെ പ്രസ്താവന വന്നതിന് പിന്നാലെ ബി ജെ പി കണ്ണൂര് ജില്ലാ കമ്മിറ്റിയുടെ ഫേസ്ബുക്ക് പേജില് ബിഷപ്പിനെ സന്ദര്ശിക്കുന്നതിന്റെ ചിത്രങ്ങള് പ്രസിദ്ധീകരിച്ചിരുന്നു. ബിഷപ്പിന്റെ പ്രസ്താവനയെ സ്വാഗതം ചെയ്യുന്നതായും ഇതില് വ്യക്തമാക്കുന്നുണ്ട്.
കത്തോലിക്ക കോണ്ഗ്രസ് തലശേരി അതിരൂപതയില് സംഘടിപ്പിച്ച കര്ഷകറാലിയിലായിരുന്നു ആര്ച്ച് ബിഷപ്പിന്റെ പരാമര്ശം.'റബറിന് വിലയില്ല. വിലത്തകര്ച്ചയിലാണ്. കേന്ദ്രം ഭരിക്കുന്ന സര്ക്കാര് വിചാരിച്ചാല് റബറിന്റെ വില 250 രൂപയാക്കാന് കഴിയും. തിരഞ്ഞെടുപ്പില് വോട്ടായി മാറാത്ത ഒരു പ്രതിഷേധത്തിനും ജനാധിപത്യത്തില് വിലയില്ലെന്ന സത്യമോര്ക്കുക. നമുക്ക് കേന്ദ്രസര്ക്കാരിനോട് പറയാം, നിങ്ങളുടെ പാര്ട്ടി ഏതുമായിക്കൊള്ളട്ടെ, ഞങ്ങള് നിങ്ങളെ വോട്ട് ചെയ്ത് ജയിപ്പിക്കാം. നിങ്ങള് വില 300 രൂപയായി പ്രഖ്യാപിച്ച് കര്ഷകരില് നിന്ന് റബര് എടുക്കുക. നിങ്ങള്ക്ക് ഒരു എം പി പോലുമില്ലെന്ന വിഷമം ഈ കുടിയേറ്റ ജനത മാറ്റിത്തരാം'- എന്നായിരുന്നു ബിഷപ്പിന്റെ പ്രസ്താവന. എന്തായാലും മോദിയുടെ വരവില് റബ്ബറിന്റെ കാര്യം എന്താകുമെന്ന് കണ്ടറിയാം.
"
https://www.facebook.com/Malayalivartha
