പിതൃസഹോദരി സ്‌നേഹത്തോടെ വെച്ചുനീട്ടിയ ഐസ്‌ക്രീമിന്റെ ചെറിയൊരുഭാഗം ആ പന്ത്രണ്ടുകാരന്‍ അല്പാല്പമായി നുണഞ്ഞു, രുചിവ്യത്യാസം ഉണ്ടായതിനെത്തുടര്‍ന്ന് ബാക്കി ഉപേക്ഷിച്ചു... ഉമ്മയും രണ്ടുസഹോദരങ്ങളും ഇല്ലാത്തതിനാല്‍ അവര്‍ രക്ഷപ്പെട്ടു....
സഹോദരന്റെ കുടുംബത്തെ മുഴുവനായി ഉന്മൂലനം ചെയ്യുക എന്ന ലക്ഷ്യം വച്ചായിരുന്നു പിതൃസഹോദരി ഈ കൃത്യം ചെയ്തത്.
അരിക്കുളത്തെ കോറോത്ത് താഹിറ തന്റെ 'ക്രിമിനല്‍' ബുദ്ധി പ്രയോഗിച്ചതെന്ന് പോലീസ് നിഗമനം.

ഇതിനായി കുടുംബത്തിന് മൊത്തംകഴിക്കാനുള്ള ഐസ്‌ക്രീം പാക്കറ്റ് വാങ്ങി അതില്‍ വിഷംകലര്‍ത്തിയാണ് താഹിറ സഹോദരന്‍ മുഹമ്മദലിയുടെ വീട്ടിലെത്തിയത്. താഹിറ വീട്ടിലെത്തിയ നേരത്ത് മുഹമ്മദലിയുടെ മകന്‍ അഹമ്മദ് ഹസന്‍ റിഫായി മാത്രമാണ് അവിടെയുണ്ടായിരുന്നത്. അതിനാല്‍ ആ ബാലന്‍ മാത്രമാണ് ഐസ്‌ക്രീം കഴിച്ചത്.

മുഹമ്മദലിയും ഭാര്യയും മൂന്നുമക്കളുമടങ്ങുന്ന കുടുംബം ചങ്ങരോത്തായിരുന്നു താമസം. ഈ അടുത്താണ് അരിക്കുളത്ത് വീട് വാടകയ്‌ക്കെടുത്ത് അതിലേക്ക് താമസംമാറ്റിയത്. കുട്ടികളെല്ലാം ചങ്ങരോത്ത് എം.യു.പി. സ്‌കൂളിലായിരുന്നു പഠിച്ചിരുന്നത്. മരിച്ച അഹമ്മദ് ഹസന്‍ റിഫായി ആറാംക്ലാസ് വിദ്യാര്‍ഥിയാണ്. മുഹമ്മദലിയുടെ ഭാര്യ അസ്മയോട് താഹിറയ്ക്ക് നേരത്തേതന്നെ വിദ്വേഷമുണ്ടായിരുന്നു. കുട്ടികളോടൊപ്പം ഇവരെയും താഹിറ ലക്ഷ്യമിട്ടിരുന്നുവെന്നാണ് പോലീസ് അനുമാനം.


ഐസ്‌ക്രീം കഴിച്ചതിനെത്തുടര്‍ന്നുണ്ടായ ഭക്ഷ്യവിഷബാധയെത്തുടര്‍ന്നാണ് കുട്ടി മരിച്ചതെന്ന സംശയത്തെത്തുടര്‍ന്ന് ആരോഗ്യവകുപ്പധികൃരും പോലീസും ഐസ്‌ക്രീം വിറ്റ കട സീല്‍ചെയ്ത് രണ്ടുദിവസം അടപ്പിച്ചിരുന്നു.

എന്നാല്‍, ഇവിടെനിന്ന് ഐസ്‌ക്രീം വാങ്ങിക്കഴിച്ച മറ്റുള്ളവര്‍ക്കൊന്നും ഭക്ഷ്യവിഷബാധ ഏല്‍ക്കാതിരുന്നതും, പോസ്റ്റ്മോര്‍ട്ടം റിപ്പോര്‍ട്ടില്‍ മരിച്ച അഹമ്മദ് ഹസന്‍ റിഫായിയുടെ ശരീരത്തില്‍ അമോണിയയുടെയും ഫോസ്ഫേറ്റിന്റെയും അംശം കൂടുതലായി കണ്ടെത്തിയതും പോലീസിന്റെ സംശയം വര്‍ദ്ധിപ്പിച്ചു.


എന്നാല്‍, മൊഴികളിലെ വൈരുദ്ധ്യങ്ങളും സൂപ്പര്‍മാര്‍ക്കറ്റില്‍ നിന്ന് ശേഖരിച്ച സി.സി.ടി.വി. ദൃശ്യങ്ങളും ബന്ധപ്പെടുത്തി അന്വേഷണം നടത്തിയപ്പോള്‍ താഹിറ തന്നെയാണ് കൊലപാതകം ആസൂത്രണം ചെയ്തതെന്ന് പോലീസിന് വ്യക്തമായി. തുടര്‍ന്നാണ് സംഭവത്തിനുശേഷം നാലാംനാള്‍ ആവുമ്പോഴേക്കും കുറ്റവാളിയെ കണ്ടെത്താന്‍ പോലീസിന് കഴിഞ്ഞത്.


പന്ത്രണ്ടുവയസ്സുമാത്രമുള്ള കുട്ടിയെ സ്വന്തം പിതാവിന്റെ സഹോദരിതന്നെ വിഷം നല്‍കി കൊലപ്പെടുത്തിയെന്ന വാര്‍ത്തയുടെ ഞെട്ടലിലാണ് അരിക്കുളം നിവാസികള്‍. കേവലം ഭക്ഷ്യവിഷബാധയെന്ന് ആദ്യഘട്ടത്തില്‍ അനുമാനിച്ച സംഭവമാണ് പോലീസിന്റെ കാര്യക്ഷമമായ അന്വേഷണത്തിലൂടെ ചുരുളഴിഞ്ഞത്.

അതേസമയം വെള്ളിയാഴ്ച പുലര്‍ച്ചെയാണ് താഹിറയുടെ അറസ്റ്റ് പോലീസ് രേഖപ്പെടുത്തിയത്. പിന്നീട്, അരിക്കുളത്തെത്തിച്ച് താഹിറ താമസിക്കുന്ന വീട്ടിലും മരിച്ച അഹമ്മദ് ഹസന്‍ റിഫായിയുടെ വീട്ടിലും ഐസ്‌ക്രീം വാങ്ങിയ കടയിലുമെത്തിച്ച് തെളിവെടുത്തു. തുടര്‍ന്ന് കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. സഹോദരന്‍ മുഹമ്മദാലിയുടെ കുടുംബത്തോടുള്ള മുന്‍വൈരാഗ്യമാണ് കൊലയ്ക്ക് കാരണമായതെന്ന് പോലീസ് പറഞ്ഞു. വന്‍ പോലീസ് സന്നാഹത്തോടെയാണ് പ്രതിയെ തെളിവെടുപ്പിന് എത്തിച്ചത്.