പയ്യാവൂരില്‍ റിസോര്‍ട്ട് ഉടമ വെടിയേറ്റ് മരിച്ച സംഭവത്തില്‍ രണ്ട് പേര്‍ അറസ്റ്റില്‍. കാഞ്ഞിരക്കൊല്ലി സ്വദേശികളുമായ രജീഷ് അമ്പാട്ട്, പള്ളത്ത് നാരായണന്‍ എന്നിവരാണ് അറസ്റ്റിലായത്.

കാഞ്ഞിരക്കൊല്ലി സ്വദേശി അരുവി ഹോംസ്റ്റേ ഉടമ ബെന്നി പരത്തനാല്‍ (55) ആണ് മരിച്ചത്. ബെന്നിക്കൊപ്പം നായാട്ടിനുപോയവരാണ് അറസ്റ്റിലായിരിക്കുന്നത്. ഇവര്‍ ബെന്നിയുടെ സുഹൃത്തുക്കള്‍ കൂടിയാണ്. ശനിയാഴ്ച പുലര്‍ച്ചെ ഒരുമണിയോടെ കേരള-കര്‍ണാട വനാതിര്‍ത്തിയിലെ കാഞ്ഞിരക്കൊല്ലി ശശിപ്പാറക്ക് സമീപം ഏലപ്പാറയിലെ സ്വകാര്യ വ്യക്തിയുടെ സ്ഥലത്തായിരുന്നു സംഭവം നടന്നത്.

മൂന്നംഗ സംഘം വേട്ടയ്ക്ക് പോയപ്പോള്‍ അബദ്ധത്തില്‍ വെടി പൊട്ടിയാണ് ബെന്നി മരിച്ചതെന്നാണ് പോലീസ് പറയുന്നത്. സംഭവത്തെ കുറിച്ച് പോലീസ് പറയുന്നതിങ്ങനെ. നായാട്ടിനായി വൈകുന്നേരമാണ് മൂവരും കാട് കയറിയത്. നാരായണനെ നിര്‍ബന്ധിച്ചാണ് ഒപ്പം കൂട്ടിയത്. കയറ്റം കയറി മൂവരും ഒരിടത്തിരിക്കുകയായിരുന്നു. ബെന്നിയുടെ അരികിലാണ് വലിയ തിര നിറച്ച തോക്ക് വച്ചിരുന്നത്.

രാത്രി വൈകി ശബ്ദം കേട്ട് ഞെട്ടി എഴുന്നേല്‍ക്കുന്നതിനിടെ കാഞ്ചിയില്‍ വിരല്‍തട്ടി അബദ്ധത്തില്‍ വെടി പൊട്ടുകയായിരുന്നു. ബെന്നിയുടെ വലത് നെഞ്ചിലാണ് വെടിയേറ്റത്. പയ്യാവൂരിലെ ആ ശുപത്രിയില്‍ എത്തിക്കുമ്പോഴേക്കും ജീവന്‍ നഷ്ടപ്പെട്ടിരുന്നു.