ലാവ്‌ലിന്‍ കേസില്‍ മടിയില്‍ കനമില്ലെങ്കില്‍ എന്തിന് പിണറായിക്ക് പേടിപ്പനി. രണ്ട് പതിറ്റാണ്ടിലേറെ ആയി പിണറായി വിജയനെന്ന കപട രാഷ്ട്രീയക്കാരന്‍ പണവും സ്വീധീനവും ഉപയോഗിച്ച് ലാവ്‌ലിന്‍ കേസിട്ട് തട്ടുന്നു. കേസ് സുപ്രീംകോടതി തിങ്കളാഴ്ച പരിഗണിക്കാനിരിക്കെ പുതിയ തിരക്കഥയുമായ് പിണറായി. കേസ് പരിഗണിക്കുന്നത് മാറ്റിവെക്കണമെന്ന് ആവശ്യപ്പെട്ട് കക്ഷികളില്‍ ഒരാളുടെ അഭിഭാഷകന്‍ സുപ്രീം കോടതി രജിസ്ട്രാര്‍ക്ക് കത്ത് നല്‍കി. ഊര്‍ജ്ജ വകുപ്പ് മുന്‍ ജോയിന്റ് സെക്രട്ടറി എ. ഫ്രാന്‍സിസിന്റെ അഭിഭാഷകന്‍ എം.എല്‍. ജിഷ്ണുവാണ് കത്ത് നല്‍കിയത്. പേടിപ്പനി അഭിഭാഷകനല്ല പിണറായിക്കാണ്. കേസിന്റെ വിചാരണ വീണ്ടും വലിച്ച് നീട്ടാന്‍ കണ്ടെത്തിയിരിക്കുന്ന അടവ് മാത്രമാണിത്. ഈ വിഷയത്തില്‍ പ്രതികരിക്കുകയാണ് അഭിഭാഷകനും രാഷ്ട്രീയ നിരീക്ഷകനുമായ കെഎം ഷാജഹാന്‍.

ജനപ്രതിനിധികള്‍ക്കെതിരായ കേസുകളില്‍ ഉടനടി നടപടി ഉണ്ടാകണമെന്ന് പറയുന്ന കോടതി തന്നെയാണ് ലാവലിന്‍ കേസ് ഇങ്ങനെ വലിച്ച് നീട്ടുന്നത്. ജനങ്ങള്‍ക്ക് കോടതികളിലുള്ള വിശ്വാസം തന്നെ നഷ്ടപ്പെടുകയാണ്. പണത്തിന് മേലെ പറക്കില്ല ഈ രാജ്യത്തെ നിയമങ്ങളെന്ന് പറയാതെ പറയുകയാണ് നീതിപീഠങ്ങള്‍. ഇത് ജനങ്ങളോടുള്ള വെല്ലുവിളിയാണ്. 32 തവണ ലിസ്റ്റ് ചെയ്തിട്ടും പല കാരണങ്ങളാല്‍ പരിഗണിക്കപ്പെടാതിരുന്ന ഹര്‍ജി 5 മാസത്തിനു ശേഷമാണു വീണ്ടും ലിസ്റ്റ് ചെയ്തത്. ഇപ്പോള്‍ വീണ്ടും മാറ്റിവെപ്പിക്കാന്‍ കളി നടക്കുന്നത്.

എത്രകാലം ലാവ്‌ലിന്‍ കേസ് ഇട്ട് തട്ടും. 2001 ല്‍ ആരംഭിച്ച വിജിലന്‍സ് അന്വേഷണത്തില്‍ അന്ന് തന്നെ പ്രതിസ്ഥാനത്തേക്ക് വന്നവരില്‍ പ്രധാനി പിണറായി വിജയനായിരുന്നു. ഹൈക്കോടതിയില്‍ വാദം കേട്ട് കേട്ട് 2017 ആയപ്പോള്‍ പിണറായി വിജയന്‍, ഊര്‍ജ വകുപ്പു സെക്രട്ടറി കെ.മോഹനചന്ദ്രന്‍, ജോയിന്റ് സെക്രട്ടറി എ.ഫ്രാന്‍സിസ് എന്നിവര്‍ കുറ്റവിമുക്തരാക്കിപ്പെട്ടു. 2017ലെ ഹൈക്കോടതി വിധിക്കെതിരെയാണ് സിബിഐ സുപ്രീംകോടതിയെ സമീപിച്ചത്. സുപ്രീംകോടതിയിലും കേസിട്ട് തട്ടുന്നതല്ലാതെ ഒന്നും നടക്കുന്നില്ല. ലാവ്‌ലിനില്‍ പിണറായി ശിക്ഷിക്കപ്പെടുമെന്ന് ഇനിയും നിങ്ങള്‍ കരുതുന്നുണ്ടോ മലയാളികളെ.