രാജ്ഭവന്‍ നടത്തുന്ന സര്‍ക്കാര്‍ പരിപാടികളില്‍ നിന്ന് ഭാരതാംബ ചിത്രം ഒഴിവാക്കാന്‍ തീരുമാനം
ഒടുവില്‍ തീരുമാനം....വിവാദങ്ങള്‍ക്ക് പിന്നാലെ രാജ്ഭവന്‍ നടത്തുന്ന സര്‍ക്കാര്‍ പരിപാടികളില്‍ നിന്ന് ഭാരതാംബ ചിത്രം ഒഴിവാക്കാന്‍ തീരുമാനമായി. ഔദ്യോഗിക ചടങ്ങുകളില്‍ നിന്ന് ഭാരതാംബ ചിത്രവും നിലവിളക്കും ഒഴിവാക്കുമെന്ന് രാജ്ഭവന്‍ അറിയിച്ചതായാണ് സൂചനകളുള്ളത്. സത്യപ്രതിജ്ഞ, കേരളശ്രീ പുരസ്‌കാരദാന ചടങ്ങുകള്‍ തുടങ്ങിയ പരിപാടികളില്‍ നിന്ന് ചിത്രവും നിലവിളക്കും ഒഴിവാക്കാനാണ് തീരുമാനമായത്.
എന്നാല്‍ രാജ്ഭവന്റെ ചടങ്ങുകളില്‍ ചിത്രവും വിളക്കും തുടരും. നാളെത്തെ പ്രഭാഷണവേദിയിലും ഇവ ഉണ്ടാകും. കാവിക്കൊടിയേന്തിയ ഭാരതമാതാവിന്റെ ചിത്രവും അതിന് മുന്നില്‍ വിളക്ക് കൊളുത്തുന്നതും മറ്റും സ്വീകാര്യമല്ലെന്ന കാര്യം സര്‍ക്കാര്‍ അറിയിച്ചതിനെ തുടര്‍ന്നാണ് ഉടക്കാനില്ലെന്ന നിഗമനത്തിലേക്ക് രാജ്ഭവന്‍ എത്തിയത്.
രാജ്ഭവനിലെ പരിസ്ഥിതി ദിനാഘോഷ പരിപാടിയിലാണ് ആര്‍എസ്എസ് ഉപയോഗിക്കുന്ന തരത്തിലുള്ള ഭാരതാംബ ചിത്രം വേദിയില്‍ സ്ഥാപിച്ചത്.
ഇതേത്തുടര്‍ന്ന് കൃഷി വകുപ്പ് മന്ത്രി പി പ്രസാദ് പരിപാടി ബഹിഷ്‌കരിക്കുകയായിരുന്നു. ചിത്രം മാറ്റണമെന്ന് കൃഷി വകുപ്പ് ആവശ്യപ്പെട്ടെങ്കിലും ഗവര്‍ണര്‍ ആര്‍.വി. അര്‍ലേക്കര്‍ വഴങ്ങിയില്ല. തുടര്‍ന്നായിരുന്നു കൃഷിമന്ത്രി പരിപാടി ബഹിഷ്‌കരിച്ചത്. തുടര്‍ന്ന് സിപിഐയുടെ നേതൃത്വത്തില്‍ വന്‍ പ്രതിഷേധവുമുണ്ടായിരുന്നു.
https://www.facebook.com/Malayalivartha
