ഇറാന്റെ തലസ്ഥാനമായ ടെഹ്റാനില് സ്ഫോടനം
ഇറാന്റെ തലസ്ഥാനമായ ടെഹ്റാന്റെ പടിഞ്ഞാറന്, കിഴക്കന് ഭാഗങ്ങളില് നിരവധി സ്ഫോടന ശബ്ദങ്ങള് കേട്ടതായാണ് വിവരം. ടെഹ്റാനിലെ ഒരു സൈനിക താവളത്തില് ഇസ്രയേല് ആക്രമണം നടത്തിയതായി വാര്ത്താ ഏജന്സികള് റിപ്പോര്ട്ട് ചെയ്യുന്നു. ഇറാന് ദേശീയ ടെലിവിഷന് ആസ്ഥാനത്തും ഇസ്രയേല് ആക്രമണം നടത്തി. തല്സമയ സംപ്രേഷണത്തിനിടെ ആയിരുന്നു മിസൈല് ആക്രമണം. നിരവധി മാധ്യമപ്രവര്ത്തകര്ക്കു പരുക്കേറ്റതായാണു വിവരം. ആക്രമണം നടന്ന ശേഷം ടെലിവിഷന് ചാനലിന്റെ സംപ്രേഷണം പുനരാരംഭിച്ചു. വീണ്ടും ആക്രമണം നടത്താന് അവതാരക ഇസ്രയേലിനെ വെല്ലുവിളിച്ചു.
ടെഹ്റാനിലെ ജനങ്ങളോട് എത്രയും വേഗം ഒഴിഞ്ഞുപോകാന് ഇസ്രയേല് പ്രധാനമന്ത്രി ബെന്യാമിന് നെതന്യാഹു ആവശ്യപ്പെട്ടതിനു പിന്നാലെയാണ് സ്ഫോടന വാര്ത്ത പുറത്തുവരുന്നത്. ടെഹ്റാന്റെ വ്യോമപരിധി പൂര്ണമായും നിയന്ത്രണത്തിലാക്കിയെന്ന് ഇസ്രയേല് പ്രതിരോധന സേന അവകാശപ്പെട്ടിരുന്നു.
ടെഹ്റാനു മുകളിലുള്ള ആകാശം പൂര്ണമായും ഇസ്രയേല് വ്യോമസേനയുടെ നിയന്ത്രണത്തിലാണെന്നായിരുന്നു നെതന്യാഹുവിന്റെ മുന്നറിയിപ്പ്. നഗരത്തിലെ പ്രധാനപ്പെട്ട ഭരണകേന്ദ്രങ്ങളെല്ലാം ഉടന് ആക്രമിക്കും. ഇറാനെ പോലെ സാധാരണ ജനങ്ങളെ കൊന്നൊടുക്കാന് തങ്ങള് ഇഷ്ടപ്പെടുന്നില്ല. അതുകൊണ്ട് ടെഹ്റാനിലെ ജനങ്ങളോട് അവിടെനിന്നും ഒഴിഞ്ഞുപോകാന് ആവശ്യപ്പെടുന്നുവെന്നാണ് നെതന്യാഹു പറഞ്ഞത്. ടെല് അവീവില് നിന്നും ജനങ്ങള് പിന്മാറണമെന്ന് ഇറാനും മുന്നറിയിപ്പ് നല്കിയിട്ടുണ്ട്.
https://www.facebook.com/Malayalivartha
