ഹയര്‍സെക്കന്‍ഡറി ഒന്നാം വര്‍ഷ പ്രവേശനത്തിന്റെ മൂന്നാം അലോട്ട്മെന്റ് ഇന്ന് പ്രസിദ്ധീകരിക്കും. മുഖ്യഘട്ടത്തിലെ അവസാന അലോട്ട്മെന്റാണിത്. 16നും 17നും പ്രവേശനം നടക്കും. അലോട്ട്മെന്റില്‍ ഇടം ലഭിക്കുന്ന മുഴുവന്‍ പേരും ഫീസടച്ച് സ്ഥിരപ്രവേശനം നേടേണ്ടതാണ്.

ആദ്യരണ്ട് അലോട്ട്മെന്റുകളിലും താല്‍ക്കാലിക പ്രവേശനത്തിന് അനുമതിയുണ്ടായിരുന്നു. പ്രവേശനം നേടാതിരുന്നാല്‍ തുടര്‍ നടപടികളില്‍ നിന്ന് പുറത്താകുന്നതാണ്. രണ്ടാം അലോട്ട്മെന്റ് പൂര്‍ത്തിയായപ്പോള്‍ ആകെ 2,42,688 പേരാണ് പ്രവേശനം നേടിയത്. മൂന്നാം അലോട്ട്മെന്റിനായി മെറിറ്റില്‍ 93,594 സീറ്റ് ശേഷിക്കുന്നുണ്ട്.

വിദ്യാര്‍ഥികള്‍ ഇല്ലാത്തതിനാല്‍ ഒഴിഞ്ഞു കിടക്കുന്ന സംവരണ സീറ്റുകളും ജനറലിലേക്ക് മാറ്റിയാകും അലോട്ട്മെന്റ് പ്രസിദ്ധീകരിക്കുക. അതിനാല്‍ മൂന്നാം അലോട്ട്മെന്റില്‍ കൂടുതല്‍ പേര്‍ക്ക് പ്രവേശനം ലഭിക്കുന്നതാണ്. ഉയര്‍ന്ന ഓപ്ഷനുകള്‍ ലഭിക്കുന്നതിനുള്ള സാധ്യതയും വര്‍ദ്ധിക്കും. 18ന് ക്ലാസ് ആരംഭിക്കും.


ഇതുവരെ അപേക്ഷിക്കാത്തവര്‍ക്കും മുഖ്യഘട്ടത്തില്‍ തെറ്റായ വിവരങ്ങള്‍ നല്‍കിയതിനാലോ ഓപ്ഷനുകള്‍ നല്‍കാത്തതിനാലോ അലോട്ട്‌മെന്റിന് പരിഗണിക്കാത്തവര്‍ക്കും സപ്ലിമെന്ററി ഘട്ടത്തില്‍ അപേക്ഷിക്കാവുന്നതാണ്.

സപ്ലിമെന്ററി അലോട്ട്‌മെന്റിനായുള്ള ഒഴിവും നോട്ടിഫിക്കേഷനും മുഖ്യഘട്ട പ്രവേശന സമയപരിധിക്കുശേഷം വെബ്‌സൈറ്റില്‍ പ്രസിദ്ധീകരിക്കും. വൊക്കേഷണല്‍ ഹയര്‍സെക്കന്‍ഡറി വിഭാഗം ഒന്നാംവര്‍ഷ പ്രവേശനത്തിന്റെ മൂന്നാം അലോട്ട്മെന്റ് 16 മുതല്‍ പ്രവേശനം സാധ്യമാകും വിധം പ്രസിദ്ധീകരിക്കുന്നതാണ്.