ഇസ്രയേല് ഇറാന് സംഘര്ഷം രൂക്ഷമാകുന്നു; ഇറാന്റെ സൈനിക രഹസ്യാന്വേഷണ വിഭാഗത്തിന്റെ മേധാവിയെയും ഉപമേധാവിയെയും ഇസ്രയേല് കൊലപ്പെടുത്തി
ഇറാന്റെ സൈനിക രഹസ്യാന്വേഷണ വിഭാഗത്തിന്റെ മേധാവിയെയും ഉപ മേധാവിയെയും ഇസ്രയേല് വധിച്ചു. ഇറാന് റവലൂഷനറി ഗാര്ഡിന്റെ ഇന്റലിജന്സ് തലവന് മുഹമ്മദ് കാസിമിയെയും ഉപമേധാവി ഹസന് മോഹഖിയെയുമാണ് വ്യോമാക്രമണത്തില് കൊലപ്പെടുത്തിയത്. കഴിഞ്ഞ നാല് ദിവസങ്ങളില് ഇസ്രയേല് നടത്തിയ വ്യോമാക്രമണങ്ങളില് ഇറാനില് കൊല്ലപ്പെട്ടവരുടെ എണ്ണം 224 ആയി. ഇസ്രയേലി നഗരങ്ങളില് ഇന്നലെ രാത്രി ഇറാന് നടത്തിയ ആക്രമണങ്ങളില് അഞ്ച് പേര് കൂടി കൊല്ലപ്പെട്ടു എന്നാണ് റിപ്പോര്ട്ട്. എണ്പത് പേര്ക്ക് ഇന്നലെ മാത്രം പരിക്കേറ്റു. ഇതുവരെ ഇസ്രയേലി നഗരങ്ങളില് കൊല്ലപ്പെട്ടവരുടെ എണ്ണം ഇരുപതായി. അഞ്ഞൂറിലേറെ പേര്ക്ക് പരിക്കേറ്റു.
ഇറാന്റെ ആണവോര്ജ കേന്ദ്രങ്ങള്, മിസൈല് കേന്ദ്രങ്ങള് എന്നിവയാണ് കഴിഞ്ഞ രാത്രി ഇസ്രായേല് പ്രധാനമായും ലക്ഷ്യമിട്ടത്. തെഹ്റാനില് ഇറാന്റെ സൈനിക കേന്ദ്രം തകര്ക്കുന്ന ദൃശ്യം ഇസ്രായേല് പുറത്തുവിട്ടിട്ടുണ്ട്. പാര്ച്ചിന്, ഫോര്ദോ ആണവോര്ജ കേന്ദ്രങ്ങളില് ഇസ്രായേല് ബോംബിട്ടു. ഇറാന്റെ പ്രതിരോധ, വിദേശകാര്യ മന്ത്രാലയം ആസ്ഥാനങ്ങളും ആക്രമിക്കപ്പെട്ടു. ഇറാന്റെ യുദ്ധവിമാനങ്ങള് ഇന്ധനം നിറയ്ക്കുന്ന വടക്കന് ഇറാനിലെ മാഷാദ് വിമാനത്താവളവും ഇസ്രയേല് ആക്രമിച്ചു. ഇറാന്റെ നൂറുകണക്കിന് കിലോ മീറ്റര് ഉള്ളിലേക്ക് കടന്നുകയറി കനത്ത ആക്രമണം നടത്തി മടങ്ങാന് ഇസ്രയേലി വ്യോമസേനയ്ക്ക് കഴിഞ്ഞു.
അതേസമയം, തുടര്ച്ചയായ നാലാം ദിവസവും ഇസ്രായേലിലെ ഹൈഫ, ടെല് അവീവ്, ജെറുസലേം നഗരങ്ങളില് ഇറാന് കനത്ത ആക്രമണം നടത്തി. ഹൈഫയിലെ ഇസ്രായേലി റിഫൈനറിയില് ഇറാന്റെ ആക്രമണത്തില് തീ പടര്ന്നു. ആക്രമണത്തില് ടെല് അവീവില് നിരവധി കെട്ടിടങ്ങള് തകര്ന്നു. അതിനിടെ, ഇറാന്റെ മിസൈല് പതിച്ച സ്ഥലങ്ങള് ഇസ്രയേല് പ്രധാനമന്ത്രി ബെഞ്ചമിന് നെതന്യാഹു സന്ദര്ശിച്ചു. കഴിഞ്ഞ ദിവസം ഇറാന് മിസൈല് ആക്രമണത്തില് തകര്ത്ത ബാത് യാമില് നിന്ന് കൂടുതല് മൃതദേഹങ്ങള് കണ്ടെത്തി.
ഇരുപക്ഷവും സമാധാന നിര്ദേശങ്ങള് തള്ളുകയാണ്. ഇറാന്റെ ആണവായുധ ഭീഷണി ഒഴിയുംവരെ ആക്രമണം തുടരുമെന്നും ഈ ഓപ്പറേഷന് അവസാനിക്കുമ്പോള് ഇറാനിലെ ഭരണമാറ്റം പോലും പ്രതീക്ഷിക്കാമെന്നും ഇസ്രായേല് പ്രധാനമന്ത്രി ബെഞ്ചമിന് നെതന്യാഹു ടെലിവിഷന് അഭിമുഖത്തില് പറഞ്ഞു. ഡോണള്ഡ് ട്രംപും താനും തമ്മില് ഭിന്നത ഇല്ലെന്നും അദ്ദേഹം അവകാശപ്പെട്ടു. അതേസമയം, ഇറാനും ഇസ്രയേലും സമാധാന കരാറില് എത്തണമെന്ന് ഡോണള്ഡ് ട്രംപ് ആവര്ത്തിച്ചു. ഇസ്രയേലിനുള്ള പ്രതിരോധ പിന്തുണ തുടരും. ഇപ്പോഴത്തെ സൈനിക നടപടിയില് അമേരിക്ക പങ്കാളി അല്ലെങ്കിലും ഭാവിയില് പങ്കുചേരാനുള്ള സാധ്യത തള്ളാന് ആവില്ലെന്നും ട്രംപ് പറഞ്ഞു. ആക്രമണം നേരിടുമ്പോള് തങ്ങള് സമാധാന ചര്ച്ചയ്ക്ക് തയാറല്ലെന്ന് ഇറാന് അറബ് രാജ്യങ്ങളെ അറിയിച്ചു. ശത്രു പിന്വാങ്ങുംവരെ ആക്രമണം തുടരുമെന്നും ഇറാന് അറിയിച്ചു.
https://www.facebook.com/Malayalivartha
