കുപ്രസിദ്ധ കുറ്റവാളി ബാലമുരുകൻ പൊലീസ് പിടിയിലായി. തെങ്കാശിയിൽ വാഹന പരിശോധനയ്ക്കിടെയാണ് ഇയാൾ പിടിയിലായത്. നേരത്തെ വിയ്യൂർ ജയിലിന് സമീപത്തു നിന്നാണ് ഇയാൾ രക്ഷപ്പെട്ടത്.

തമിഴ്‌നാട് കോടതിയിൽ ഹാജരാക്കി തിരികെ വിയ്യൂർ ജയിലിലേക്ക് കൊണ്ടു വരുന്നതിനിടെയാണ് ബാലമുരുകൻ പൊലീസിന്റെ കണ്ണുവെട്ടിച്ച് രക്ഷപ്പെട്ടത്. ഒന്നര മാസം മുമ്പാണ് ബാലമുരുകൻ പൊലീസ് വാഹനത്തിൽ നിന്നും ഇറങ്ങി ഓടി രക്ഷപ്പെടുന്നത്.

അഞ്ചു കൊലപാതകം, മോഷണം അടക്കം 53 കേസുകളിലെ പ്രതിയാണ് ബാലമുരുകനെന്ന് പൊലീസ് പറഞ്ഞു. തമിഴ്‌നാട് പൊലീസ് കസ്റ്റഡിയിലെടുത്ത ബാലമുരുകനെ കോടതിയിൽ ഹാജരാക്കും. ഇതിനുശേഷമാകും വിയ്യൂരിലെത്തിക്കുക. 2023 സെപ്റ്റംബർ 24 മുതൽ വിയ്യൂരിലെ അതീവ സുരക്ഷാ ജയിലിലായിരുന്നു ബാലമുരുകൻ. പൊലീസിനെ ആക്രമിച്ച് നേരത്തേയും ജയിൽ ചാടിയിട്ടുണ്ടായിരുന്നു.