സംസ്ഥാന നിയമസഭാ തെരഞ്ഞെടുപ്പിലേക്കുള്ള കോൺഗ്രസിന്റെ സ്ഥാനാർത്ഥി നിർണ്ണയം നിർണ്ണായക ഘട്ടത്തിലേക്ക്. നടനും സംവിധായകനുമായ രമേശ് പിഷാരടി ഇത്തവണ പാലക്കാട് മണ്ഡലത്തിൽ നിന്നും ജനവിധി തേടുമെന്നാണ് ഏറ്റവും പുതിയ റിപ്പോർട്ടുകൾ സൂചിപ്പിക്കുന്നത്. പാലക്കാട് സിറ്റിംഗ് എം.എൽ.എ ആയിരുന്ന രാഹുൽ മാങ്കൂട്ടത്തിൽ പാർട്ടിക്ക് പുറത്തായ സാഹചര്യത്തിലാണ് മണ്ഡലം നിലനിർത്താൻ ജനപ്രിയ താരം കൂടിയായ രമേശ് പിഷാരടിയെ കോൺഗ്രസ് രംഗത്തിറക്കുന്നത്. കെ.പി.സി.സി അധ്യക്ഷൻ സണ്ണി ജോസഫ്, പ്രതിപക്ഷ നേതാവ് വി.ഡി. സതീശൻ എന്നിവർ പങ്കെടുത്ത സ്‌ക്രീനിംഗ് കമ്മിറ്റി യോഗത്തിലാണ് ആദ്യഘട്ട പട്ടികയ്ക്ക് രൂപമായത്.

പാലക്കാടും തൃപ്പൂണിത്തുറയും ഒഴികെയുള്ള മണ്ഡലങ്ങളിൽ സിറ്റിംഗ് എം.എൽ.എമാരെ തന്നെ മത്സരിപ്പിക്കാനാണ് കോൺഗ്രസ് ഹൈക്കമാൻഡുമായുള്ള ചർച്ചയിൽ ധാരണയായത്. പ്രതിപക്ഷ നേതാവിന്റെ 'പുതുയുഗ യാത്ര' സമാപിച്ച ശേഷമാകും സ്ഥാനാർത്ഥികളുടെ ഔദ്യോഗിക പ്രഖ്യാപനം ഉണ്ടാവുകയെന്ന് കെ.പി.സി.സി അധ്യക്ഷൻ വ്യക്തമാക്കിയിട്ടുണ്ട്.