ആറ്റുകാല്‍ പൊങ്കാലയ്ക്ക് കുടിവെള്ളം മുടങ്ങില്ലെന്ന് ജലവിഭവ മന്ത്രി റോഷി അഗസ്റ്റിന്‍. തിരുവനന്തപുരത്തെ കുടിവെള്ള പ്രശ്‌നം പരിഹരിക്കാന്‍ കാര്യക്ഷമമായി ഇടപെട്ടു കഴിഞ്ഞു. പ്രശ്‌നം രൂപപ്പെട്ടത് മുതല്‍ ജില്ലയുടെ ചുമതലയുള്ള മന്ത്രി വി.ശിവന്‍കുട്ടിയുടെ കൂടി അഭിപ്രായം തേടി ജലഅതോറിറ്റി എംഡി, ജോയിന്റ് എംഡി എന്നിവരെ ഉള്‍പ്പെടുത്തി നിരവധി യോഗങ്ങള്‍ വിളിച്ചു ചേര്‍ത്തു.

മന്ത്രി ശിവന്‍കുട്ടിയുടെ നേതൃത്വത്തില്‍ ഉദ്യോഗസ്ഥരുടെ യോഗം വിളിച്ചിരുന്നു. തിരുവനന്തപുരം കോര്‍പറേഷനും ജലഅതോറിറ്റിയും സഹകരിച്ചാണ് മുന്നോട്ട് പോകുന്നത്. തിരുവനന്തപുരം മേയറുമായി വിഷയം സംസാരിച്ചു. പ്രശ്‌നങ്ങള്‍ അടിയന്തരമായി പരിഹരിക്കാന്‍ കണ്‍ട്രോള്‍ തുറന്നിട്ടുണ്ട്.

ഓരോ സെക്ഷന്‍ ഓഫിസും കേന്ദ്രീകരിച്ച് പ്രത്യേക സ്‌ക്വാഡ് രൂപീകരിച്ചിട്ടുണ്ടെന്നും മന്ത്രി പറഞ്ഞു. കുടിവെള്ളത്തില്‍ രാഷ്ട്രീയം കലര്‍ത്താന്‍ എല്‍ഡിഎഫ് ആഗ്രഹിക്കുന്നില്ല. കോര്‍പറേഷന്‍ ചെയ്യേണ്ടത് കോര്‍പറേഷന്‍ ചെയ്യണം. ഇത്തരം സന്ദര്‍ഭങ്ങളില്‍ സഹകരിച്ചു പോകുകയാണ് വേണ്ടതെന്നും മന്ത്രി പറഞ്ഞു.