സംസ്ഥാനത്ത് 2026 മാര്‍ച്ചില്‍ നടക്കാനിരിക്കുന്ന എസ്എസ്എല്‍സി, ഹയര്‍ സെക്കന്‍ഡറി, വൊക്കേഷണല്‍ ഹയര്‍ സെക്കന്‍ഡറി പരീക്ഷകള്‍ക്കായുള്ള എല്ലാ തയാറെടുപ്പുകളും പൂര്‍ത്തിയായതായി പൊതുവിദ്യാഭ്യാസ വകുപ്പ്. 3031 പരീക്ഷാകേന്ദ്രങ്ങളിലായി 4,17,497 കുട്ടികളും, ഗള്‍ഫ്‌മേഖലയില്‍ 7 പരീക്ഷാകേന്ദ്രങ്ങളിലായി 633 കുട്ടികളും ലക്ഷദ്വീപില്‍ 9 പരീക്ഷാകേന്ദ്രങ്ങളിലായി 386 കുട്ടികളും എസ്എസ്എല്‍സി പരീക്ഷയ്ക്ക് റജിസ്റ്റര്‍ ചെയ്തു.

ചോദ്യപേപ്പര്‍ 41 ജില്ലാ വിദ്യാഭ്യാസ ഓഫിസുകളിലും എത്തിച്ചു സോര്‍ട്ടിങ് പൂര്‍ത്തിയാക്കി ബാങ്ക്/ട്രഷറി എന്നിവയുടെ സേഫ് ലോക്കറിലേയ്ക്ക് മാറ്റി. 26000 അധ്യാപകരാണ് ഇന്‍വിജിലേഷന്‍ ജോലി നിര്‍വഹിക്കുന്നത്. മൂല്യനിര്‍ണയ ക്യാംപുകള്‍ ഏപ്രില്‍ 7 ന് ആരംഭിച്ച് ഏപ്രില്‍ 28 ന് പൂര്‍ത്തീകരിക്കും. ഫലപ്രഖ്യാപനം 2026 മേയ് മൂന്നാംവാരത്തിനുള്ളില്‍ നടത്തും. റിസള്‍ട്ട് പ്രസിദ്ധീകരിച്ച് തൊട്ടടുത്ത ദിവസം മുതല്‍ പ്ലസ് വണ്‍ പ്രവേശനത്തിനായി ഓണ്‍ലൈന്‍ അപേക്ഷകള്‍ സമര്‍പ്പിക്കാം.

ഒന്നാം വര്‍ഷ ഹയര്‍ സെക്കന്‍ഡറി/ വൊക്കേഷനല്‍ ഹയര്‍ സെക്കന്‍ഡറി പരീക്ഷകള്‍ മാര്‍ച്ച് 5 നും രണ്ടാം വര്‍ഷ ഹയര്‍ സെക്കന്‍ഡറി/വൊക്കേഷനല്‍ ഹയര്‍ സെക്കന്‍ഡറി പരീക്ഷകള്‍ മാര്‍ച്ച് 6 നും ആരംഭിക്കും. 1984 പരീക്ഷ കേന്ദ്രങ്ങളില്‍ 4,11,025 വിദ്യാര്‍ഥികള്‍ ഹയര്‍ സെക്കന്‍ഡറി ഒന്നാം വര്‍ഷ പരീക്ഷയും 4,52,437 വിദ്യാര്‍ഥികള്‍ ഹയര്‍ സെക്കന്‍ഡറി രണ്ടാം വര്‍ഷ പരീക്ഷയും എഴുതും. ഏപ്രില്‍ 6 മുതല്‍ മൂല്യനിര്‍ണയം ആരംഭിക്കും. മേയ് 22 ന് ഫലപ്രഖ്യാപനം നടത്തും.

വൊക്കേഷനല്‍ ഹയര്‍ സെക്കന്‍ഡറി ഒന്നാം വര്‍ഷത്തില്‍ 26,829 വിദ്യാര്‍ഥികളും രണ്ടാം വര്‍ഷത്തില്‍ 26,826 വിദ്യാര്‍ഥികളുമാണ് പരീക്ഷ എഴുതുന്നത്. 389 കേന്ദ്രങ്ങളിലായി നടക്കുന്ന പരീക്ഷയുടെ മൂല്യനിര്‍ണയം ഏപ്രില്‍ 6ന് 8 ക്യാംപുകളിലായി ആരംഭിക്കും.