ഗള്‍ഫ് രാജ്യങ്ങളില്‍ തുടരുന്ന സംഘര്‍ഷങ്ങളുടെ പശ്ചാത്തലത്തില്‍ അവിടെയുള്ള മലയാളികളുടെ സുരക്ഷക്കായി കേന്ദ്ര സര്‍ക്കാര്‍ സാദ്ധ്യമായതെല്ലാം ചെയ്യണമെന്ന് കോണ്‍ഗ്രസ് വര്‍ക്കിംഗ് കമ്മിറ്റിയംഗം രമേശ് ചെന്നിത്തല വിദേശകാര്യമന്ത്രി ജയശങ്കറിന് നല്‍കിയ കത്തില്‍ ആവശ്യപ്പെട്ടു.

യുഎഇ, കുവൈത്ത്, ഇറാന്‍, ബഹ്‌റൈന്‍, ഒമാന്‍, ഖത്തര്‍, സൗദി അറേബ്യ തുടങ്ങിയ ഗള്‍ഫ് രാജ്യങ്ങളില്‍ ലക്ഷക്കണക്കിന് മലയാളികള്‍ ജോലി ചെയ്യുന്നുണ്ട്. നിലവിലെ യുദ്ധസമാനമായ സാഹചര്യം അവരില്‍ വലിയ ഉത്കണ്ഠയും ഭീതിയുമാണ് സൃഷ്ടിച്ചിരിക്കുന്നത്. തങ്ങളുടെ സുരക്ഷയെക്കുറിച്ച് ഇവര്‍ വളരെയേറെ ആശങ്കാകുലരാണെന്ന് അവരില്‍ നിന്നും തനിക്ക് ലഭിക്കുന്ന ഫോണ്‍ സന്ദേശങ്ങള്‍ സൂചിപ്പിക്കുന്നതായും രമേശ് ചെന്നിത്തല കത്തില്‍ പറയുന്നു.

നാട്ടിലുള്ള അവരുടെ ബന്ധുക്കളും കടുത്ത മാനസികസംഘര്‍ഷത്തിലൂടെ കടന്നുപോവുകയാണ്. ഗള്‍ഫ് മേഖലയിലുള്ള മലയാളികള്‍ക്ക്് സുരക്ഷിതത്വബോധവും ആശ്വാസവും നല്‍കുന്നതിന് അടിയന്തര നടപടികള്‍ ആവശ്യമാണ്. ആവശ്യമുള്ളവര്‍ക്ക് ശരിയായ സഹായം ഉറപ്പാക്കുന്നതിനും സമയബന്ധിതമായ പിന്തുണയും മാര്‍ഗ്ഗനിര്‍ദ്ദേശവും നല്‍കുന്നതിനും ഈ രാജ്യങ്ങളിലെ എല്ലാ ഇന്ത്യന്‍ എംബസികളിലും പ്രത്യേക ക്രമീകരണങ്ങള്‍ ഇതിനായി ഏര്‍പ്പെടുത്തേണ്ടതാണെന്ന് രമേശ് ചെന്നിത്തല കത്തില്‍ ആവശ്യപ്പെടുന്നു.

അന്താരാഷ്ട്ര വിമാനകമ്പനികള്‍ സര്‍വ്വീസ് നടത്താന്‍ മടിക്കുന്ന സാഹചര്യത്തില്‍ കുടുങ്ങിക്കിടക്കുന്നവരെ ഒഴിപ്പിക്കുന്നതിനും സുരക്ഷിതമായി തിരിച്ചെത്തിക്കുന്നതിനും കേന്ദ്രസര്‍ക്കാര്‍ പ്രത്യേകമായി നടപടികള്‍ കൈക്കൊള്ളണമെന്നും കത്തില്‍ രമേശ് ചെന്നിത്തല സൂചിപ്പിക്കുന്നു.