കാമുകനെ ഒഴിവാക്കുന്നതിനായി യുവതിയുടെ ക്വട്ടേഷന്‍
കാമുകനെ ഒഴിവാക്കുന്നതിനായി ക്വട്ടേഷന്‍ നല്‍കി കൊലപ്പെടുത്താന്‍ ശ്രമിച്ച കേസില്‍ യുവതിയും സുഹൃത്തുക്കളും പൊലീസ് പിടിയില്‍. കവര്‍ച്ച നടത്തി കൊലപ്പെടുത്താനായിരുന്നു ക്വട്ടേഷന്‍ നല്‍കിയത്. പട്ടാമ്പി സ്വദേശിനിയായ പനങ്ങാട്ടുതൊടി സഫാന (19), സുഹൃത്തുക്കളായ തിരൂര്‍ നോര്‍ത്ത് അന്നാര സ്വദേശിനികളായ പുതുക്കുളങ്ങര വീട്ടില്‍ നാദിയ (20), പുതുക്കുളങ്ങര വീട്ടില്‍ റബീബ (25), പറവണ്ണ സ്വദേശികളായ കുട്ടിയസന്റെ പുരയ്ക്കല്‍ ഇര്‍ഷാദ് (28), ബദനത്ത് വീട്ടില്‍ അസറുദ്ദീന്‍ (25) എന്നിവരെയാണ് ബുധനാഴ്ച തിരൂര്‍ ഇന്‍സ്‌പെക്ടര്‍ ജലീല്‍ കറുത്തേടത്തിന്റെ നേതൃത്വത്തിലുള്ള പോലീസ് സംഘം തിരൂര്‍ താഴെപ്പാലത്തുവെച്ച് പിടികൂടിയത്.
പിടിയിലായ ഇര്‍ഷാദ്, അസറുദ്ദീന്‍ എന്നിവര്‍ മയക്കുമരുന്ന് കടത്തുകേസില്‍ ഉള്‍പ്പെട്ട് മുന്‍പ് റിമാന്‍ഡിലായിട്ടുണ്ട്. ഇരുവരും തീരദേശമേഖലയിലെ വധശ്രമം, അടിപിടി തുടങ്ങിയ കേസുകളില്‍ പ്രതികളാണെന്ന് പോലീസ് പറഞ്ഞു. തിരൂര്‍ മജിസ്‌ട്രേറ്റ് മുന്‍പാകെ ഹാജരാക്കിയ പ്രതികളെ റിമാന്‍ഡ്‌ചെയ്തു.
പട്ടാമ്പി സ്വദേശിനിയായ യുവതിയുടെ ആണ്‍സുഹൃത്തിനെ ഒഴിവാക്കുന്നതിനായി സുഹൃത്തുക്കളെ ക്വട്ടേഷന്‍ ഏല്‍പ്പിച്ച് തട്ടിക്കൊണ്ടുപോകുകയും മൊബൈല്‍ഫോണ്‍ കവര്‍ച്ചചെയ്ത് ക്രൂരമായി മര്‍ദിച്ച് വധിക്കാന്‍ ശ്രമിക്കുകയുംചെയ്ത പരാതിയിലാണ് കാമുകിയായ യുവതിയും സുഹൃത്തുക്കളും പിടിയിലായതെന്ന് പോലീസ് പറഞ്ഞു.
കഴിഞ്ഞദിവസം അര്‍ധരാത്രിയില്‍ തന്റെ പെണ്‍സുഹൃത്തിനെ അന്വേഷിച്ച് തിരൂരിലെത്തിയ പട്ടാമ്പി സ്വദേശിയായ യുവാവിനെ സുഹൃത്തിന്റെ അടുത്തെത്തിക്കാമെന്നുപറഞ്ഞ് ബൈക്കില്‍ കൂട്ടിക്കൊണ്ടുപോകുകയും പ്രതികള്‍ ഒത്തൊരുമിച്ചുള്ള സ്ഥലത്തെത്തി കാറില്‍ കയറ്റി ക്രൂരമായി മര്‍ദിക്കുകയും താഴെപ്പാലം പുഴയോരത്തുവെച്ച് പ്രതികള്‍ യുവാവിനെ റോഡരികില്‍ ഉപേക്ഷിച്ച് കടന്നുകളയുകയുമായിരുന്നുവെന്ന് പോലീസ് പറയുന്നു.
https://www.facebook.com/Malayalivartha
